ವಿದ್ಯಾರ್ಥಿಗಳಿಗೆ ಇಸ್ರೊ ಕ್ವಿಜ್‌ ಆ.10ರಿಂದ ಆರಂಭ

ಹೊಸದಿಲ್ಲಿ: ವಿಜ್ಞಾನ, ತಂತ್ರಜ್ಞಾನ ವಿಷಯದಲ್ಲಿ ವಿದ್ಯಾರ್ಥಿಗಳಲ್ಲಿ ಆಸಕ್ತಿ ಕೆರಳಿಸಲು ಮುಂದಾಗಿರುವ ಇಸ್ರೊ, ಇದೇ ತಿಂಗಳು 10ರಿಂದ 20ರವರೆಗೆ ದೇಶಾದ್ಯಂತ ಆನ್‌ಲೈನ್‌ ಕ್ವಿಜ್‌ ಏರ್ಪಡಿಸಿದೆ. ಅಂತಿಮವಾಗಿ ವಿಜೇತರಾಗುವ ವಿದ್ಯಾರ್ಥಿಗಳಿಬ್ಬರಿಗೆ ಪ್ರಧಾನಿ ನರೇಂದ್ರ ಮೋದಿ ಅವರ ಜತೆ ಕುಳಿತು ಚಂದ್ರಯಾನ-2 ನೌಕೆಯು ಚಂದ್ರನ ಮೇಲೆ ಇಳಿಯುವ ಲೈವ್‌ ನೋಡುವ ಅವಕಾಶ ದಕ್ಕಲಿದೆ.

ಬಾಹ್ಯಾಕಾಶ ಕುರಿತ 20 ಪ್ರಶ್ನೆಗಳಿಗೆ 300 ಸೆಕೆಂಡ್‌ಗಳಲ್ಲಿ ಉತ್ತರಿಸಬೇಕು. 8ರಿಂದ 10ನೇ ತರಗತಿವರೆಗಿನ ವಿದ್ಯಾರ್ಥಿಗಳ ಸ್ಪರ್ಧೆಗೆ ಮಾತ್ರ ಅವಕಾಶ ಇದೆ. ಅತ್ಯಂತ ಕಡಿಮೆ ಅವಧಿಯಲ್ಲಿ ಯಾರು ಸರಿಯಾದ ಉತ್ತರ ನೀಡುತ್ತಾರೋ ಅವರನ್ನು ವಿಜೇತರೆಂದು ಘೋಷಿಸಲಾಗುತ್ತದೆ. ಇಬ್ಬರಿಗಿಂತಲೂ ಹೆಚ್ಚು ವಿದ್ಯಾರ್ಥಿಗಳು ಒಂದೇ ಸಮಯಕ್ಕೆ ಸರಿಯಾದ ಉತ್ತರ ಹೇಳಿದ ಪಕ್ಷದಲ್ಲಿ ಲಾಟರಿ ಮೂಲಕ ಇಬ್ಬರನ್ನು ಆಯ್ಕೆ ಮಾಡಲಾಗುತ್ತದೆ.

ಸೆಪ್ಟೆಂಬರ್‌ 7ರಂದು ಚಂದ್ರಯಾನ-2 ನೌಕೆ ಚಂದ್ರನ ನಿರ್ದಿಷ್ಟ ಭಾಗದ ಮೇಲೆ ಇಳಿಯಲಿದ್ದು, ಬೆಂಗಳೂರಿನ ಇಸ್ರೊ ಪ್ರಧಾನ ಕಚೇರಿಯಲ್ಲಿ ಅದರ ಲೈವ್‌ ಶೋ ವೀಕ್ಷಣೆಗೆ ವ್ಯವಸ್ಥೆ ಮಾಡಲಾಗಿದೆ. ಕ್ವಿಜ್‌ ಕುರಿತ ಹೆಚ್ಚಿನ ಮಾಹಿತಿ ಹಾಗೂ ನೋಂದಣಿಗಾಗಿ https://quiz.mygov.in/ ಗೆ ಭೇಟಿ ನೀಡಬಹುದಾಗಿದೆ.