ಕಾರೆನ್‌ ಉಲ್ಹೆನ್‌ ಬೆಕ್‌

ಅಮೆರಿಕದ ಗಣಿತಜ್ಞೆ ಕಾರೆನ್‌ ಉಲ್ಹೆನ್‌ ಬೆಕ್‌ ಪ್ರತಿಷ್ಠಿತ ಅಬೆಲ್‌ ಪುರಸ್ಕಾರಕ್ಕೆ ಭಾಜನರಾಗಿದ್ದಾರೆ. ಈ ಪ್ರಶಸ್ತಿ ಸ್ವೀಕರಿಸುತ್ತಿರುವ ಪ್ರಥಮ ಮಹಿಳೆ ಎನ್ನುವ ಹೆಗ್ಗಳಿಕೆಗೂ ಇವರು ಪಾತ್ರರಾಗಿದ್ದಾರೆ. ಕ್ಲೀವ್‌ ಲ್ಯಾಂಡ್‌ ಮೂಲದ ಕರೆನ್‌ ಉಲ್ಹೆನ್‌ ಬೆಕ್‌ (76) ಪ್ರಿಸ್ಸ್‌ಟನ್‌ ವಿಶ್ವವಿದ್ಯಾಲಯದ ಹಿರಿಯ ಸಂದರ್ಶಕ ವಿಜ್ಞಾನಿ ಹಾಗೂ ಇನ್‌ಸ್ಟಿಟ್ಯೂಟ್‌ ಆಫ್‌ ಅಡ್ವಾನ್ಸ್‌ ಸ್ಟಡಿಯಲ್ಲೂ ಪಾಠ ಮಾಡುತ್ತಾರೆ. ಜ್ಯಾಮಿತೀಯ ವಿಶ್ಲೇಷಣೆ ಹಾಗೂ ಗೇಜ್‌ ಸಿದ್ಧಾಂತದಲ್ಲಿ ಕಾರೆನ್‌ ಅವರ ಮೂಲಭೂತ ಸಂಶೋಧನೆಯನ್ನು ಪರಿಗಣಿಸಿ ಈ ಪುರಸ್ಕಾರಕ್ಕೆ ಆಯ್ಕೆ ಮಾಡಲಾಗಿದೆ. ಇವರು 1988ರಲ್ಲಿ ರಿಚರ್ಡ್ಸ್ನ್‌ ಫೌಂಡೇಶನ್‌ನಲ್ಲಿ ಚೇರ್ಮನ್‌ ಆಗಿಯೂ ಕೆಲಸ ಮಾಡಿದ್ದಾರೆ. ಇವರ ಗಣಿತ ಸಂಶೋಧನೆಗೆ ಮ್ಯಾಕ್‌ಆರ್ಥರ್‌ ಫೆಲೋಷಿಪ್‌, ನೊಥರ್‌ ಲೆಕ್ಚರರ್‌ ಪ್ರಶಸ್ತಿ (1988), ನ್ಯಾಷನಲ್‌ ಮೆಡಲ್‌ ಸೈನ್ಸ್‌ ಅವಾರ್ಡ್‌ (2000) ಹಾಗೂ ಲೆರಾಯ್‌ ಪಿ ಸ್ಟೀಲ್‌ ಪ್ರಶಸ್ತಿ (2007) ಸಂದಿವೆ. ಮಿಚಿಗನ್‌ ವಿಶ್ವವಿದ್ಯಾಲಯದ ಆನ್‌ ಆರ್ಬರ್‌ ಕಾಲೇಜ್‌ನಲ್ಲಿ ಬಿಎ ಪದವಿ, ನ್ಯೂಯಾರ್ಕ್‌ ವಿಶ್ವವಿದ್ಯಾಲಯದಲ್ಲಿ ಸ್ನಾತಕೋತ್ತರ ಪದವಿ ಪಡೆದಿದ್ದಾರೆ. ಕಾರೆನ್‌ ಉಲ್ಹೆನ್‌ ಬೆಕ್‌ ಅವರು ಆಗಸ್ಟ್‌ 24, 1942ರಲ್ಲಿ ಅಮೆರಿಕದ ಓಹಿಯೋದಲ್ಲಿ ಜನಿಸಿದರು.

ಪ್ರಶಸ್ತಿ ಬಗ್ಗೆ: ಓಸ್ಲೋ ಸರ್ಕಾರ 2002ರಲ್ಲಿ 19ನೇ ಶತಮಾನದ ನಾರ್ವೆಯ ಗಣಿತಶಾಸ್ತ್ರಜ್ಞ ನೀಲ್ಸ್‌ ಹೆನ್ರಿಕ್‌ ಅಬೆಲ್‌ ಅವರ ಹೆಸರಿನಲ್ಲಿ ಗಣಿತಶಾಸ್ತ್ರದಲ್ಲಿ ಅತ್ಯುತ್ತಮ ಸಂಶೋಧನೆ ನಡೆಸಿದವರಿಗೆ ನೀಡಲೆಂದು ಈ ಪುರಸ್ಕಾರವನ್ನು ಸ್ಥಾಪಿಸಿದೆ. ಪ್ರಶಸ್ತಿಯು 7.03 ಲಕ್ಷ ಡಾಲರ್‌ ನಗದು ಒಳಗೊಂಡಿದೆ.