ಗೇಲ್‌ ಗ್ಯಾಸ್‌ ಲಿಮಿಟೆಡ್‌ನ ಅಧ್ಯಕ್ಷರಾಗಿ ಡಾ.ಆಶುತೋಷ್‌ ಕರ್ನಾಟಕ್‌ ಆಯ್ಕೆ

ಗೇಲ್‌(ಇಂಡಿಯಾ) ಲಿಮಿಡೆಡ್‌ ಅಂಗಸಂಸ್ಥೆಯಾದ ಗೇಲ್‌ ಗ್ಯಾಸ್‌ ಲಿಮಿಟೆಡ್‌ನ ಅಧ್ಯಕ್ಷರಾಗಿ ಡಾ.ಆಶುತೋಷ್‌ ಕರ್ನಾಟಕ್‌ ಅವರು ಅಧಿಕಾರ ಸ್ವೀಕರಿಸಿದ್ದಾರೆ. ಗೇಲ್‌ ಇಂಡಿಯಾದ ಅಧ್ಯಕ್ಷ ಮತ್ತು ಎಂಡಿಯಾಗಿಯೂ ಅವರು ಕಾರ್ಯ ನಿರ್ವಹಿಸುತ್ತಿದ್ದಾರೆ. ಹೈಡ್ರೊಕಾರ್ಬನ್‌ ವಲಯದಲ್ಲಿ 37 ವರ್ಷಗಳ ಅನುಭವವನ್ನು ಹೊಂದಿದ್ದು ಕರ್ನಾಟಕ್‌ ಗೇಲ್‌ ಗ್ಯಾಸ್‌ ಮಂಡಳಿಯ ನಿರ್ದೇಶಕರಾಗಿ 2010ರಿಂದ ಕಾರ್ಯ ನಿರ್ವಹಿಸಿದ್ದರು. ಭುವನೇಶ್ವರದಲ್ಲಿ ಮೊದಲ ಎಲ್‌-ಸಿಎನ್‌ಜಿ ಸ್ಟೇಷನ್‌ ಆರಂಭಿಸುವಲ್ಲಿಯೂ ಅವರ ಪಾತ್ರ ದೊಡ್ಡದು. ಬಹುಮುಖ ಪ್ರತಿಭೆಯ ಆಶುತೋಷ್‌ ಅವರು ಪ್ರಾಜೆಕ್ಟ್ ಮ್ಯಾನೇಜ್‌ಮೆಂಟ್‌, ಆಯಿಲ್‌ ಆ್ಯಂಡ್‌ ಗ್ಯಾಸ್‌, ಸೆಲ್ಫ್‌-ಡೆವಲಪ್‌ಮೆಂಟ್‌ ಮತ್ತಿತರ ವಿಷಯಗಳಲ್ಲಿ ಪುಸ್ತಕಗಳನ್ನೂ ಬರೆದಿದ್ದಾರೆ. ಎಲೆಕ್ಟ್ರಾನಿಕ್‌ ಎಂಜಿನಿಯರಿಂಗ್‌ನಲ್ಲಿ ಬಿಟೆಕ್‌ ಪದವಿ, ಇಂಡಿಯನ್‌ ಇನ್‌ಸ್ಟಿಟ್ಯೂಟ್‌ ಆಫ್‌ ಟೆಕ್ನಾಲಜಿ ದಿಲ್ಲಿಯಲ್ಲಿ ಎಂಟೆಕ್‌ ಪದವಿ, ಡೆಹರಾಡೂನ್‌ನ ಪೆಟ್ರೋಲಿಯಂ ಮತ್ತು ಎನರ್ಜಿ ವಿಶ್ವವಿದ್ಯಾಲಯದಲ್ಲಿ (ಖಾಸಗಿ ವಿವಿ)ಪಿಎಚ್‌.ಡಿ ಪದವಿ ಹಾಗೂ ಎಂಬಿಎ ಪದವಿ ಕೂಡ ಪಡೆದಿದ್ದಾರೆ.

ಗೇಲ್‌ ಇಂಡಿಯಾ : ಇದು ಕೇಂದ್ರ ಸರಕಾರಿ ಸ್ವಾಮ್ಯದ ಅತ್ಯಂತ ದೊಡ್ಡ ನೈಸರ್ಗಿಕ ಅನಿಲ ಸರಬರಾಜು ಸಂಸ್ಥೆಯಾಗಿದೆ. ಸಂಸ್ಥೆಯು ಈ ಹಿಂದೆ ಗ್ಯಾಸ್‌ ಅಥಾರಿಟಿ ಆಫ್‌ ಇಂಡಿಯಾ ಲಿಮಿಟೆಡ್‌ ಎಂಬ ಹೆಸರಿನಿಂದ ಪರಿಚಿತವಾಗಿತ್ತು. ಇದನ್ನು ಭಾರತ ಸರಕಾರ ಆಗಸ್ಟ್‌ 1984ರಲ್ಲಿ ಅನಿಲ ಕ್ಷೇತ್ರದಲ್ಲಿ ಮೂಲಭೂತ ವ್ಯವಸ್ಥೆ ಕಲ್ಪಿಸಲು ಸ್ಥಾಪನೆ ಮಾಡಿತು. ಇದು ಕೇಂದ್ರದ ಪೆಟ್ರೋಲಿಯಂ ಮತ್ತು ನೈಸರ್ಗಿಕ ಸಚಿವಾಲಯ ವ್ಯಾಪ್ತಿಯಲ್ಲಿ ಬರುತ್ತದೆ.