ಬೆಂಗಳೂರು ಮೂಲದ ಮಾಜಿ ಶಿಕ್ಷಕ ಬೈಜು ರವೀಂದ್ರನ್ ಈಗ ಭಾರತದ ಹೊಸ ಬಿಲಿಯನೇರ್ ಆಗಿ ಹೊರಹೊಮ್ಮಿದ್ದಾರೆ! ರವೀಂದ್ರನ್ ಕೆಲ ವರ್ಷಗಳ ಹಿಂದೆ ಸ್ಥಾಪಿಸಿದ 'ಬೈಜೂಸ್-ಲರ್ನಿಂಗ್ ಆ್ಯಪ್' ಎಂಬ ಶೈಕ್ಷಣಿಕ ವಲಯದ ಸ್ಟಾರ್ಟಪ್ ಈಗ ಅಂದಾಜು 37,000 ಕೋಟಿ ರೂ. ಮೌಲ್ಯದ ದಿಗ್ಗಜ ಕಂಪನಿಯಾಗಿ ಬೆಳೆದಿದೆ. 37 ವರ್ಷ ವಯಸ್ಸಿನ ಬೈಜು ರವಿಂದ್ರನ್ ಕೇರಳದ ಕಣ್ಣೂರು ಜಿಲ್ಲೆಯ ಅಜಿಕೋಡ್ ನವರು. ಮೆಕ್ಯಾನಿಕಲ್ ಎಂಜನಿಯರ್ ಆಗಿರುವ ಇವರು, ಬ್ರಿಟನ್ ಮೂಲದ ಶಿಪ್ಪಿಂಗ್ ಕಂಪನಿಯೊಂದರಲ್ಲಿ ಎಂಜಿನಿಯರ್ ಆಗಿದ್ದರು. ನಂತರ ವಿದ್ಯಾರ್ಥಿಗಳ ಸಣ್ಣ ಗುಂಪಿಗೆ ಟ್ಯೂಷನ್ ಕೊಡಲು ಆರಂಭಿಸಿದರು. ಬೆಂಗಳೂರಿನಲ್ಲಿ 2015ರಲ್ಲಿ ಬೈಜೂಸ್ ಆ್ಯಪ್ಗೆ ರವೀಂದ್ರನ್ ಚಾಲನೆ ನೀಡಿದರು. ಇದು ಅವರಿಗೆ ಭಾರಿ ಯಶಸ್ಸು ತಂದುಕೊಟ್ಟಿತಲ್ಲದೆ, ಭಾರತದ ಹೊಸ ಬಿಲಿಯನೇರ್ ಆಗಿಸಿದೆ. 1-12ನೇ ತರಗತಿಯ ಮಕ್ಕಳು, ಜೆಇಇ, ಸಿಎಟಿ, ಐಎಎಸ್ ಇತ್ಯಾದಿ ಸ್ಪರ್ಧಾತ್ಮಕ ಪರೀಕ್ಷೆಯ ಆಕಾಂಕ್ಷಿಗಳು ಇದರ ಪ್ರಯೋಜನ ಪಡೆಯಬಹುದು. 3.5 ಕೋಟಿ ವಿದ್ಯಾರ್ಥಿಗಳು, 24 ಲಕ್ಷ ಮಂದಿ ಹಣ ಪಾವತಿಸಿ ಸೇವೆ ಪಡೆಯುವ ಚಂದಾದಾರರನ್ನು ಕಂಪನಿ ಹೊಂದಿದೆ. ಬೆಂಗಳೂರಿನಲ್ಲಿ ಪ್ರಧಾನ ಕಚೇರಿ ಇದೆ. ಹೊಸ ಹೂಡಿಕೆಯೊಂದಿಗೆ ಬೈಜು ರವೀಂದ್ರನ್ ಅವರ ಸಂಪತ್ತೂ ಏರಿಕೆಯಾಗಿದ್ದು, ಅವರೀಗ ಬಿಲಿಯನೇರ್ ಉದ್ಯಮಿ ಎಂದು ಬ್ಲೂಮ್ಬರ್ಗ್ ಕಂಪನಿಯ ವರದಿ ತಿಳಿಸಿದೆ. 2019ರ ಜುಲೈನಲ್ಲಿ ಬೈಜೂಸ್ ಭಾರತೀಯ ಕ್ರಿಕೆಟ್ ತಂಡದ ಜರ್ಸಿ ಹಕ್ಕುಗಳನ್ನು ಖರೀದಿಸಿದೆ.
ಭಾರತದ ಹೊಸ ಬಿಲಿಯನೇರ್ ಯಾರು ಗೊತ್ತೆ?
ಬೆಂಗಳೂರು ಮೂಲದ ಮಾಜಿ ಶಿಕ್ಷಕ ಬೈಜು ರವೀಂದ್ರನ್ ಈಗ ಭಾರತದ ಹೊಸ ಬಿಲಿಯನೇರ್ ಆಗಿ ಹೊರಹೊಮ್ಮಿದ್ದಾರೆ!
Vijaya Karnataka 1 Aug 2019, 7:37 pm