ಪೆಸಿಫಿಕ್‌ ಸಾಗರ ದಾಟಿದ ಅಂಧ ನಾವಿಕ ಮಿಟುಶಿರೊ ಇವಾಮೊಟು

ಜಪಾನ್‌ನ ಅಂಧ ನಾವಿಕ ಮಿಟುಶಿರೊ ಇವಾಮೊಟು ಅವರು ಪೆಸಿಫಿಕ್‌ ಸಾಗರವನ್ನು ಯಶಸ್ವಿಯಾಗಿ ದಾಟಿ ದಾಖಲೆ ನಿರ್ಮಿಸುವ ಮೂಲಕ ಸುದ್ದಿಯಾಗಿದ್ದಾರೆ.

ಜಪಾನ್‌ನ ಸ್ಯಾನ್‌ ಡಿಯಾಗೊ ನಿವಾಸಿಯಾದ 52 ವರ್ಷದ ಮಿಟುಶಿರೊ ಅವರು 40 ಅಡಿ ಉದ್ದದ ಹಾಯಿದೋಣಿ ಮೂಲಕ ಫುಕುಶಿಮಾ ಬಂದರು ತಲುಪಿ ಪ್ರಯಾಣ ಪೂರ್ಣಗೊಳಿಸಿದ್ದಾರೆ. ಅವರು ಇದೇ ವರ್ಷದ ಫೆಬ್ರವರಿ 24ರಿಂದ ಕ್ಯಾಲಿಫೋರ್ನಿಯಾದಿಂದ ಯಾನ ಆರಂಭಿಸಿದ್ದರು.

ಸಮುದ್ರಯಾನದ ವೇಳೆ ಅಮೆರಿಕದ ನಾವಿಕ ಡೌಗ್‌ ಸ್ಮಿತ್‌ ಅವರು ಗಾಳಿಯ ಚಲನವಲನಗಳ ಕುರಿತು ಇವಾಮೊಟು ಅವರಿಗೆ ಮೌಖಿಕವಾಗಿ ಮಾಹಿತಿ ನೀಡಿದ್ದರು. ಸಮುದ್ರದಲ್ಲಿ 14,000 ಕಿ.ಮೀ ಸಂಚರಿಸಿ ಅವರು ಮನೆಗೆ ಹಿಂತಿರುಗಿದ್ದಾರೆ.

2013ರಲ್ಲಿ ಅಂದರೆ ಆರು ವರ್ಷದ ಹಿಂದೆಯೇ ಇವಾಮೊಟು ಈ ಸಾಹಸಕ್ಕೆ ಮುಂದಾಗಿದ್ದರು. ಆದರೆ ಆಗ ಅವರ ದೋಣಿ ತಿಮಿಂಗಲದ ಹೊಡೆತಕ್ಕೆ ಸಿಲುಕಿತ್ತು. ನಾನೀಗ ಮನೆಗೆ ಬಂದಿದ್ದೇನೆ. ನನ್ನ ಕನಸು ಈಡೇರಿದೆ ಎಂದು ಅವರು ಸಂತಸ ವ್ಯಕ್ತಪಡಿಸಿದ್ದಾರೆ. ಅನುಭವಿ ನಾವಿಕರಾಗಿರುವ ಇವಾಮೊಟೊ ಅವರು 16ನೇ ವಯಸ್ಸಿನಲ್ಲಿ ದೃಷ್ಟಿ ಕಳೆದುಕೊಂಡಿದ್ದು, ಅಂಧತ್ವ ಉಂಟು ಮಾಡುವ ಕಾಯಿಲೆಗಳ ಬಗ್ಗೆ ಜಾಗೃತಿ ಮೂಡಿಸಲು ನಡೆಸುತ್ತಿರುವ ಚಾರಿಟಿಗೆ ಈ ರೀತಿಯ ಪ್ರಯಾಣದ ಮೂಲಕ ಹಣ ಸಂಗ್ರಹಿಸುತ್ತಿದ್ದಾರೆ.