ಹೊಸದಿಲ್ಲಿ: ರಾಷ್ಟ್ರ ರಾಜಧಾನಿಯಲ್ಲಿ 'ಕಮಲ'ವನ್ನು 'ಪೊರಕೆ' ಗುಡಿಸಿ ಹಾಕಿದೆ. ಆದರೆ ಇದಕ್ಕಿಂತ ದೊಡ್ಡ ದೊಡ್ಡ ಸವಾಲುಗಳು ಬಿಜೆಪಿಯನ್ನು ಕಾಯುತ್ತಿವೆ. ಕಮಲ ಪಕ್ಷಕ್ಕೆ ನಿಜವಾದ ಸವಾಲು ಇರುವುದು 2021ರಲ್ಲಿ ಇದೆ.

ಈ ವರ್ಷಾಂತ್ಯದಲ್ಲಿ ಬಿಹಾರ ವಿಧಾನಸಭೆ ಚುನಾವಣೆ ನಡೆಯಲಿದೆ. ಅಲ್ಲಿ ಜೆಡಿಯು ಜತೆ ಮೈತ್ರಿ ಮುಂದುವರಿಸುವುದರ ಜತೆಗೆ ನಿತೀಶ್‌ಕುಮಾರ್‌ ಅವರ ನೇತೃತ್ವದಲ್ಲೇ ಚುನಾವಣೆ ನಡೆಯಲಿದೆ ಎಂದು ಬಿಜೆಪಿ ಘೋಷಿಸಿದೆ. ಇತ್ತೀಚಿನ ಫಲಿತಾಂಶಗಳನ್ನು ನೋಡಿದಾಗ ಸ್ಥಳೀಯ ನಾಯಕತ್ವವನ್ನು ಜನ ಬೆಂಬಲಿಸಿದ್ದಾರೆ. ಹೀಗಾಗಿ ಬಿಹಾರದಲ್ಲಿ ನಿತೀಶ್‌ ಅವರೇ ಮುಂದಿನ ಸಿಎಂ ಎಂದು ಘೋಷಿಸಿರುವುದರಿಂದ ಅಷ್ಟು ಸಮಸ್ಯೆಯಾಗದು.

ಆದರೆ 2021ರ ಏಪ್ರಿಲ್‌ - ಮೇ ತಿಂಗಳಿನಲ್ಲಿ ಅಸ್ಸಾಂ, ಪಶ್ಚಿಮ ಬಂಗಾಳ, ಕೇರಳ, ತಮಿಳುನಾಡು ಮತ್ತು ಪಾಂಡಿಚೇರಿ ವಿಧಾನಸಭೆಗಳಿಗೆ ಚುನಾವಣೆ ನಡೆಯಲಿದೆ. ಅಸ್ಸಾಂಗಿಂತಲೂ ಉಳಿದ ನಾಲ್ಕು ರಾಜ್ಯಗಳಲ್ಲಿ ಬಿಜೆಪಿ ಸಾಮರ್ಥ್ಯಕ್ಕೆ ಸವಾಲು ಎದುರಾಗುವುದು ಖಚಿತ.

ಎಎಪಿಗೆ ಗೆಲುವಿಗೆ ಮೋದಿ ಅಭಿನಂದನೆ, 'ಧನ್ಯವಾದಗಳು ಸರ್‌' ಎಂದ ಕೇಜ್ರಿವಾಲ್‌

ತ್ರಿಕೋನ ಸ್ಪರ್ಧೆಗಿಂತ ನೇರ ಸ್ಪರ್ಧೆಯಲ್ಲಿ ಬಿಜೆಪಿಯನ್ನು ಸೋಲಿಸುವುದು ಸುಲಭ ಎನ್ನುವುದು ಕಾಂಗ್ರೆಸ್‌ ಸೇರಿದಂತೆ ಬಿಜೆಪಿಯನ್ನು ವಿರೋಧಿಸುವ ಬಹುತೇಕ ಪಕ್ಷಗಳಿಗೆ ಮನದಟ್ಟಾಗಿದೆ. ಹೀಗಾಗಿ ಈ ರಾಜ್ಯಗಳಲ್ಲಿ ಪ್ರತಿಪಕ್ಷಗಳು ಅದೇ ತಂತ್ರವನ್ನು ಹೆಣೆಯಬಹುದು. ಆಗ ಬಿಜೆಪಿ ಏನು ಮಾಡುತ್ತದೆ ಎಂಬುದು ಕುತೂಹಲ ಮೂಡಿಸಿದೆ.