ದಿಲ್ಲಿ ಚುನಾವಣೆ: ಕೇಜ್ರಿವಾಲ್‌ ನಾಮಪತ್ರ ಸಲ್ಲಿಕೆಯೇ ಮಿಸ್‌! , ಅಡ್ಡಿಯಾಗಿದ್ದು ರೋಡ್‌ ಶೋ

ಹೊಸದಿಲ್ಲಿ: ದಿಲ್ಲಿ ಮುಖ್ಯಮಂತ್ರಿ ಹಾಗೂ ಆಪ್‌ ಅಭ್ಯರ್ಥಿ ಅರವಿಂದ್‌ ಕೇಜ್ರಿವಾಲ್‌ ಅವರು ರೋಡ್‌ ಶೋ ಗದ್ದಲದ ಮಧ್ಯೆ ಸಿಕ್ಕಿಬಿದ್ದು ಸೋಮವಾರ ನಿಗದಿಯಾಗಿದ್ದ ನಾಮಪತ್ರ ಸಲ್ಲಿಕೆ ಕಾರ್ಯವನ್ನೇ ದಿನದ ಮಟ್ಟಿಗೆ ಮುಂದೂಡಿದ ಘಟನೆ ನಡೆದಿದೆ.

ಹೊಸದಿಲ್ಲಿ ಕ್ಷೇತ್ರದ ಆಪ್‌ ಅಭ್ಯರ್ಥಿಯಾಗಿ ಅವರು ಸೋಮವಾರ ನಾಮಪತ್ರ ಸಲ್ಲಿಸಬೇಕಿತ್ತು. ಅದರಂತೆ ನಾಮಪತ್ರ ಸಲ್ಲಿಸಲು ಆರ್‌ಕೆ ಆಶ್ರಮ ಮಾರ್ಗ್‌ ಮೆಟ್ರೊ ನಿಲ್ದಾಣ ಸಮೀಪದ ವಾಲ್ಮೀಕಿ ಮಂದಿರದಿಂದ ಕನಾಟ್‌ ಪ್ಲೇಸ್‌ ಸಮೀಪದ ಹನುಮಾನ್‌ ಮಂದಿರ­ವರೆಗೆ ಮೆರವಣಿಗೆ ಹೊರಟರು.

ಬೆಂಬಲಿಗರ ಡೋಲು-ನಗಾರಿ ವಾದ್ಯ, ಹಾಡು ಕೇಕೆಗಳ ನಡುವೆ 'ಅಚ್ಚೇ ಬೀಟೆ ಪಾಂಚ್‌ ಸಾಲ್‌, ಲಗೇ ರಹೊ ಕೇಜ್ರಿ­ವಾಲ್‌' ಹಾಡಿಗೆ ನರ್ತಿಸುತ್ತ ಸಾಗಿದರು. 2.2 ಕಿ.ಮೀ ಸಾಗಿ ಜಾಮ್‌ನಗರ ಹೌಸ್‌ ತಲುಪಿ ನಾಮಪತ್ರ ಸಲ್ಲಿಸಬೇಕಿತ್ತು. ಅಭಿಮಾನಿಗಳ ಅಬ್ಬರದ ನಡುವೆ ಸಮಯಕ್ಕೆ ಸರಿ­ಯಾಗಿ ನಾಡಕಚೇರಿ ತಲು­ಪಲು ಸಾಧ್ಯವಾಗದೇ ಕೈಚೆಲ್ಲಿ­ದರು. ಇವರು ಕಚೇರಿ ತಲುಪುವ ವೇಳೆಗೆ ಕೆಲಸದ ಅವಧಿ ಮುಗಿದು ಬಾಗಿಲು ಹಾಕಿತ್ತು.

ದಿಲ್ಲಿ ಚುನಾವಣೆಗೆ ಆಪ್‌ ಸಜ್ಜು; ಅಭ್ಯರ್ಥಿಗಳ ಪಟ್ಟಿ ಬಿಡುಗಡೆ, 15 ಹಾಲಿ ಶಾಸಕರಿಗೆ ಕೊಕ್‌

''ರೋಡ್‌ ಶೋ ಕಾರಣ ಈ ದಿನ ನಾಮಪತ್ರ ಸಲ್ಲಿಕೆ ಸಾಧ್ಯವಾಗಿಲ್ಲ. ಇದರಿಂದ ನಿರಾಶೆಯೂ ಆಗಿಲ್ಲ. ಮಂಗಳವಾರ ಉಮೇದುವಾರಿಕೆ ಸಲ್ಲಿ­ಸುವೆ,'' ಎಂದು ಕೇಜ್ರಿವಾಲ್‌ ನಂತರ ಸುದ್ದಿಗಾರರಿಗೆ ತಿಳಿಸಿದರು. ಫೆಬ್ರವರಿ 8ರಂದು ನಡೆಯುವ ದಿಲ್ಲಿ ವಿಧಾನಸಭೆ ಚುನಾವಣೆಗೆ ಮಂಗಳವಾರವೇ ನಾಮಪತ್ರ ಸಲ್ಲಿಕೆಗೆ ಕೊನೆ ದಿನ.