ಎರಡು ರೂಪಾಯಿಗೆ ಕೆ.ಜಿ. ಹಿಟ್ಟು: ದಿಲ್ಲಿ ಜನತೆಗೆ ಬಿಜೆಪಿ ಭರವಸೆ

ಹೊಸದಿಲ್ಲಿ: ವಿಧಾನಸಭೆ ಚುನಾವಣೆಗೆ ಎಂಟು ದಿನ ಇರುವಾಗ ಬಿಜೆಪಿಯು ತನ್ನ ಪ್ರಣಾಳಿಕೆಯನ್ನು ಬಿಡುಗಡೆ ಮಾಡಿದೆ. ಬಡವರಿಗೆ ಕೆ.ಜಿ.ಗೆ ಎರಡು ರೂಪಾಯಿ ದರದಲ್ಲಿ ಹಿಟ್ಟು ಪೂರೈಸುವುದು ಪ್ರಮುಖ ಆಶ್ವಾಸನೆಯಾಗಿದೆ. ನಗರದ ವಾಯು ಮಾಲಿನ್ಯವನ್ನು ನಿಯಂತ್ರಿಸುವುದರ ಜತೆಗೆ ದಿಲ್ಲಿ ಜನರಿಗೆ ಪರಿಶುದ್ಧ ನೀರು ಪೂರೈಸುವುದಾಗಿಯೂ ಪಕ್ಷ ಭರವಸೆ ನೀಡಿದೆ.

'ಸಂಕಲ್ಪ ಪತ್ರ'ವನ್ನು ದಿಲ್ಲಿ ಬಿಜೆಪಿ ಅಧ್ಯಕ್ಷ ಮನೋಜ್‌ ತಿವಾರಿ, ಕೇಂದ್ರ ಸಚಿವರಾದ ನಿತಿನ್‌ ಗಡ್ಕರಿ, ಪ್ರಕಾಶ್‌ ಜಾವಡೇಕರ್‌, ಡಾ. ಹರ್ಷವರ್ಧನ್‌ ಶುಕ್ರವಾರ ಬಿಡುಗಡೆ ಮಾಡಿದರು. "ಗೋಧಿ ಅಥವಾ ಧಾನ್ಯವನ್ನು ಈಗಿನ ಸರಕಾರ ಕೆ.ಜಿಗೆ ಎರಡು ರೂಪಾಯಿ ದರದಲ್ಲಿ ವಿತರಿಸುತ್ತಿದೆ. ಆದರೆ ಅದನ್ನು ಹಿಟ್ಟು ಮಾಡಿಸಲು ಕೆ.ಜಿಗೆ ಐದು ರೂಪಾಯಿ ವೆಚ್ಚ ಮಾಡಬೇಕಾಗಿದೆ. ಹೀಗಾಗಿ ನಾವು ಅಧಿಕಾರಕ್ಕೆ ಬಂದರೆ ಎರಡು ರೂಪಾಯಿಗೆ ಒಂದು ಕೆ.ಜಿ ಹಿಟ್ಟು ನೀಡುತ್ತೇವೆ," ಎಂದು ತಿವಾರಿ ವಿವರಿಸಿದರು.

ಪ್ರಣಾಳಿಕೆಯ ಮುಖ್ಯಾಂಶಗಳು

- ದಿಲ್ಲಿಯಲ್ಲಿ ವಾಯುಮಾಲಿನ್ಯ ನಿಯಂತ್ರಣಕ್ಕೆ ಕ್ರಮ, ಪ್ರತಿ ಮನೆಗೂ ಶುದ್ಧ ಕುಡಿಯುವ ನೀರು ಪೂರೈಕೆ

- ಕಲುಷಿತಗೊಂಡಿರುವ ಯಮುನಾ ನದಿ ಶುದ್ಧೀಕರಣಕ್ಕೆ ಯಮುನಾ ಅಭಿವೃದ್ಧಿ ಮಂಡಳಿ ರಚನೆ

- ಆಯುಷ್ಮಾನ್‌ ಭಾರತ್‌, ಕಿಸಾನ್‌ ಸಮ್ಮಾನ್‌ ನಿಧಿಯಂತಹ ಕೇಂದ್ರ ಪ್ರಾಯೋಜಿತ ಯೋಜನೆಗಳ ಜಾರಿ

- ಬೀಗಮುದ್ರೆ ಕಾರ್ಯಾಚರಣೆಗೆ ಶಾಶ್ವತ ಪರಿಹಾರ, ಅನಧಿಕೃತ ಕಾಲೊನಿಗಳ ಸಕ್ರಮ ಮತ್ತು ನಿಯಂತ್ರಣಕ್ಕೆ ಕ್ರಮ

- ಬಡ ಕುಟುಂಬದಿಂದ ಬಂದ ಪ್ರೌಢಶಾಲೆ ಹಾಗೂ ಕಾಲೇಜು ವಿದ್ಯಾರ್ಥಿನಿಯರಿಗೆ ಉಚಿತ ಎಲೆಕ್ಟ್ರಿಕ್‌ ಸ್ಕೂಟರ್‌ ವಿತರಣೆ


ಇದಕ್ಕೆ ಎಎಪಿ ಆಕ್ರೋಶ ವ್ಯಕ್ತಪಡಿಸಿದೆ. "ಬಿಜೆಪಿ ಪ್ರಕಟಿಸಿರುವ ಪ್ರಣಾಳಿಕೆಯು ಸಂಕಲ್ಪ ಪತ್ರವಲ್ಲ. ಎಲ್ಲ ಜನಪರ ಯೋಜನೆಗಳನ್ನೂ ನಾಶಪಡಿಸುವ 'ಬರ್ಬಾದಿ ಪತ್ರ'," ಎಂದು ಆಪ್‌ ನಾಯಕ ಸಂಜಯ್‌ ಸಿಂಗ್‌ ಕಿಡಿಕಾರಿದ್ದಾರೆ.