ಹೊಸದಿಲ್ಲಿ: ದಿಲ್ಲಿ ವಿಧಾನಸಭೆ ಚುನಾವಣೆಯಲ್ಲಿ ಆಮ್‌ ಆದ್ಮಿ ಪಕ್ಷ (ಎಎಪಿ) ಗೆಲುವು ಸಾಧಿಸಲಿದೆ ಎಂದು ಎಲ್ಲಾ ಮತಗಟ್ಟೆ ಸಮೀಕ್ಷೆಗಳು ಹೇಳಿದ್ದವು. ಆದರೆ ಗೆಲುವನ್ನು ನಿಖರವಾಗಿ ಅಂದಾಜಿಸಿದ್ದು ಹನ್ನೊಂದರಲ್ಲಿ ಮೂರು ಸಮೀಕ್ಷೆಗಳು ಮಾತ್ರ.

ಟಿವಿ9 ಭಾರತ್‌ವರ್ಷ-ಸಿಸೆರೋ, ಎಬಿಪಿ ನ್ಯೂಸ್‌ - ಸಿ ವೋಟರ್‌ ಮತ್ತು ಇಂಡಿಯಾ ಟುಡೇ-ಮೈ ಆಕ್ಸಿಸ್‌ ನೀಡಿದ್ದ ಸಮೀಕ್ಷೆಗಳು ನಿಜವಾಗಿವೆ.


ಮೈ ಆಕ್ಸಿಸ್‌ ಸಂಸ್ಥೆ ಸತತ ಐದು ಚುನಾವಣೆಗಳ ಫಲಿತಾಂಶವನ್ನು ನಿಖರವಾಗಿ ಊಹಿಸಿ ಎಲ್ಲರ ಹುಬ್ಬೇರಿಸಿದೆ. ಸಂಸ್ಥೆ 2019ರ ಲೋಕಸಭೆ ಚುನಾವಣೆ, ನಂತರ ನಡೆದ ಮಹಾರಾಷ್ಟ್ರ, ಹರ್ಯಾಣ ಮತ್ತು ಜಾರ್ಖಂಡ್‌ ಚುನಾವಣೆಗಳ ಫಲಿತಾಂಶವನ್ನು ನಿಖರವಾಗಿ ಊಹಿಸಿತ್ತು. ಇದೀಗ ದಿಲ್ಲಿ ಫಲಿತಾಂಶವೂ ಸರಿಯಾಗಿ ಊಹಿಸಿ ಸತತ ಐದು ಸಮೀಕ್ಷೆಗಳು ಸರಿಯಾಗಿ ಅಂದಾಜಿಸಿದೆ.

ದಿಲ್ಲಿ ವಿಧಾನಸಭಾ ಚುನಾವಣೆ ಫಲಿತಾಂಶ: ಗೆದ್ದ ಪ್ರಮುಖರು; ಸೋತ ನಾಯಕರು

ಚುನಾವಣಾ ಆಯೋಗದ ಅಧಿಕೃತ ಮಾಹಿತಿಗಳ ಪ್ರಕಾರ ಸದ್ಯ 58 ಕ್ಷೇತ್ರಗಳ ಫಲಿತಾಂಶ ಪ್ರಕಟಗೊಂಡಿದೆ. ಇದರಲ್ಲಿ ಎಎಪಿ 52, ಬಿಜೆಪಿ 6 ಸ್ಥಾನಗಳನ್ನು ಗೆದ್ದಿದೆ. ಎಎಪಿ 10, ಬಿಜೆಪಿ 2 ಕ್ಷೇತ್ರಗಳಲ್ಲಿ ಮುಂದಿದ್ದು, ಒಟ್ಟಾರೆ ಎಎಪಿ 62 ಮತ್ತು ಬಿಜೆಪಿ 8 ಕ್ಷೇತ್ರಗಳನ್ನು ಬುಟ್ಟಿಗೆ ಹಾಕಿಕೊಳ್ಳುವ ಸಾಧ್ಯತೆ ಇದೆ.