ಜನರ ಸಂಕಷ್ಟಗಳಿಗೆ ಸ್ಪಂದಿಸದ ದೋಸ್ತಿ ಸರಕಾರದ ಬ್ರೈನ್ ಡೆಡ್ ಆಗಿದೆ: ಬಿಎಸ್‌ವೈ

ಹುಬ್ಬಳ್ಳಿ: ಜನರ ಸಂಕಷ್ಟಗಳಿಗೆ ಸ್ಪಂದಿಸದ ಸಮ್ಮಿಶ್ರ ಸರಕಾರದ ಮಿದುಳೇ ಸತ್ತು ಹೋಗಿದೆ. (ಬ್ರೈನ್ ಡೆಡ್) ಸರಕಾರ ಬದುಕಿದೆಯೋ ಸತ್ತಿದೆಯೋ ಗೊತ್ತಿಲ್ಲ. ಆದರೆ ತುಘಲಕ್ ದರ್ಬಾರ್ ಅಂತೂ ನಡೆಯುತ್ತಿದೆ ಎಂದು ಬಿಜೆಪಿ ರಾಜ್ಯಾಧ್ಯಕ್ಷ ಬಿ.ಎಸ್ ಯಡಿಯೂರಪ್ಪ ವಾಗ್ದಾಳಿ ನಡೆಸಿದರು.

ಹುಬ್ಬಳ್ಳಿಯಲ್ಲಿ ಸುದ್ದಿಗೋಷ್ಠಿಯಲ್ಲಿ ಮಾತನಾಡಿದ ಬಿಎಸ್‌ವೈ, ರಾಜ್ಯದಲ್ಲಿ ಭೀಕರ ಬರ, ಕುಡಿಯುವ ನೀರಿನ‌ ಸಮಸ್ಯೆ ಉಲ್ಬಣಗೊಂಡಿರುವಾಗ ದೇವೇಗೌಡ, ಕುಮಾರಸ್ವಾಮಿ ರೆಸಾರ್ಟ್‌ಗೆ ಹೋಗುತ್ತಿದ್ದಾರೆ. ಮುಖ್ಯಮಂತ್ರಿ ಕುಮಾರಸ್ವಾಮಿ ಧೋರಣೆಯಿಂದಾಗಿ ಸರಕಾರ ಅಧ:ಪತನಕ್ಕೆ ಹೋಗಿದೆ ಎಂದು ಟೀಕಿಸಿದರು.

ರಾಜ್ಯವನ್ನು ಯಾರಿಗೂ ಗುತ್ತಿಗೆ ಕೊಟ್ಟಿಲ್ಲ, ಹಣಬಲದಿಂದ ಡಿಕೆ ಶಿವಕುಮಾರ್ ಮಾತನಾಡುತ್ತಿದ್ದಾರೆ. ರಾಜ್ಯ ಡಿ.ಕೆ. ಶಿವಕುಮಾರ್ ಅವರ ಸ್ವತ್ತಲ್ಲ; ಹಣ ಹೆಂಡದಿಂದ ರಾಜ್ಯ ಖರೀದಿ ಮಾಡಲು ಸಾದ್ಯವಿಲ್ಲ. ನಮ್ಮ ಕಾರ್ಯಕರ್ತರನ್ನು ಹಣಬಲದಿಂದ ಖರೀದಿಸಲು ಹೊರಟಿದ್ದಾರೆ, ಆದರೆ ಇದು ಸಾಧ್ಯವಿಲ್ಲ ಎಂದು ಯಡಿಯೂರಪ್ಪ ಹೇಳಿದರು.

ಕುಂದಗೋಳ ಮತ್ತು ಚಿಂಚೋಳಿ ಎರಡೂ ಕ್ಷೇತ್ರಗಳಲ್ಲಿ ನಾವು ಗೆಲ್ಲುತ್ತೇವೆ. ಮೇ 23ರ ಫಲಿತಾಂಶದ ಬಳಿಕ ರಾಜ್ಯ ರಾಜಕೀಯದಲ್ಲಿ ಬದಲಾವಣೆಯಾಗಲಿದೆ ಎನ್ನುವುದು ಚರ್ಚೆಯಾಗುತ್ತಿದೆ ಎಂದು ಬಿಜೆಪಿ ಉಪಾಧ್ಯಕ್ಷ ಶ್ರೀರಾಮಲು ಹೇಳಿಕೆಯನ್ನು ಪ್ರಸ್ತಾಪಿಸಿದ ಅವರು,
ರಾಮುಲು ಹೇಳಿಕೆ ತಪ್ಪೇನಿಲ್ಲ; ಅದನ್ನು ಅಪಾರ್ಥ ಮಾಡಿಕೊಳ್ಳುವ ಅಗತ್ಯವಿಲ್ಲ. ಅದು ಎಲ್ಲರಿಗೂ ಗೊತ್ತಿರುವ ಸಂಗತಿ ಎಂದು ಸಮರ್ಥಿಸಿಕೊಂಡರು.

ಇವರ ಕಚ್ಚಾಟ, ಬಡಿದಾಟದಿಂದ ಸರಕಾರ ತುಂಬಾ ದಿನ ಉಳಿಯಲ್ಲ ಎಂದು ಜೆಡಿಎಸ್‌ನವರೇ ಹೇಳುತ್ತಿದ್ದಾರೆ. ದೋಸ್ತಿ ಸರಕಾರ ಅಭಿವೃದ್ಧಿಗೆ ಮಾರಕವಾಗಿದೆ, ವರ್ಗಾವಣೆ ದಂಧೆ ನಡೆದಿದೆ. ಲೂಟಿ, ಹಗಲು ದರೋಡೆ ನಡೆದಿದೆ. ಇದು ಜನ ವಿರೋಧಿ, ರೈತ ವಿರೋಧಿ ಸರಕಾರ ಎಂದು ಬಿಎಸ್‌ವೈ ಆರೋಪಿಸಿದರು.

ರಾಜಕೀಯ ಡೊಂಬರಾಟದಿಂದ ಅನುಕಂಪ ಗಿಟ್ಡಿಸಿಕೊಳ್ಳುವುದು ಸುಲಭವಲ್ಲ, ಡಿಕೆಶಿ ಕಣ್ಣೀರು ರಾಜಕೀಯ ಡೊಂಬರಾಟ ಎಂದು ಬಿಎಸ್‌ವೈ ಟೀಕಿಸಿದರು.