ಆ್ಯಪ್ನಗರ

ಚುನಾವಣಾ ತರಬೇತಿಗೆ ಸರಕಾರಿ ವೈದ್ಯರು: ಬಡ ರೋಗಿಗಳ ಪರದಾಟ

ಚುನಾವಣಾ ಕಾರ್ಯಕ್ಕೆ ಇಲ್ಲಿನ ಸರಕಾರಿ ಆಸ್ಪತ್ರೆಯ ವೈದ್ಯರು ಹಾಗೂ ಸಿಬ್ಬಂದಿಯನ್ನು ಬಳಸಿಕೊಳ್ಳುತ್ತಿದ್ದು, ಶನಿವಾರ ಅವರು ತರಬೇತಿಗೆ ತೆರಳಿದ ಹಿನ್ನೆಲೆಯಲ್ಲಿ ರೋಗಿಗಳು ಚಿಕಿತ್ಸೆ ದೊರೆಯದೆ ಪರದಾಡಿದರು.

Vijaya Karnataka Web 29 Apr 2018, 9:59 am
ಯಲಹಂಕ: ಚುನಾವಣಾ ಕಾರ್ಯಕ್ಕೆ ಇಲ್ಲಿನ ಸರಕಾರಿ ಆಸ್ಪತ್ರೆಯ ವೈದ್ಯರು ಹಾಗೂ ಸಿಬ್ಬಂದಿಯನ್ನು ಬಳಸಿಕೊಳ್ಳುತ್ತಿದ್ದು, ಶನಿವಾರ ಅವರು ತರಬೇತಿಗೆ ತೆರಳಿದ ಹಿನ್ನೆಲೆಯಲ್ಲಿ ರೋಗಿಗಳು ಚಿಕಿತ್ಸೆ ದೊರೆಯದೆ ಸಂಕಷ್ಟಕ್ಕೀಡಾದ ಘಟನೆ ಇಲ್ಲಿನ ಸರಕಾರಿ ಆಸ್ಪತ್ರೆಯಲ್ಲಿ ನಡೆಯಿತು.
Vijaya Karnataka Web hospital


ತಾಲೂಕಿನ 100 ಹಾಸಿಗೆಯುಳ್ಳ ಸರಕಾರಿ ಆಸ್ಪತ್ರೆಗೆ ಶನಿವಾರ ಚಿಕಿತ್ಸೆಗೆಂದು ಬಂದ ನೂರಾರು ರೋಗಿಗಳು ಔಷಧೋಪಚಾರ ದೊರೆಯದೆ ಪರದಾಡಬೇಕಾಯಿತು. ಔಷಧ ಮಳಿಗೆ ಸೇರಿದಂತೆ ರಿಯಾಯಿತಿ ದರದ ಜನೌಷಧ ಕೇಂದ್ರವೂ ಮುಚ್ಚಿದ್ದರಿಂದ ರೋಗಿಗಳು ಖಾಸಗಿ ಮೆಡಿಕಲ್‌ ಸ್ಟೋರ್‌ಗೆ ಹೋಗಿ ನೂರಾರು ರೂ. ನೀಡಿ ಔಷಧ ಖರೀದಿಸಿದ ಪ್ರಸಂಗವೂ ನಡೆಯಿತು.

ಆಸ್ಪತ್ರೆಯಲ್ಲಿದ್ದ 30ಕ್ಕೂ ಹೆಚ್ಚು ಸಿಬ್ಬಂದಿಯನ್ನು ಚುನಾವಣಾ ಕಾರ್ಯಕ್ಕೆ ಬಳಸಿಕೊಂಡ ಹಿನ್ನೆಲೆಯಲ್ಲಿ ಶನಿವಾರ ತರಬೇತಿ ಕಾರ್ಯಕ್ಕೆ ತೆರಳಿದ್ದರು. ಇದರಿಂದ ಆಸ್ಪತ್ರೆ ಸಂಪೂರ್ಣ ಸ್ತಬ್ಧವಾಗಿತ್ತು. ಇದರಿಂದ ತುರ್ತು ಚಿಕಿತ್ಸೆಗೆಂದು ಬಂದ ರೋಗಿಗಳು ಮಾತ್ರವಲ್ಲದೆ, ರಕ್ತ ಪರೀಕ್ಷೆ ಮಾಡಿಸಿಕೊಳ್ಳಬೇಕಾದವರು, ಎಕ್ಸರೇ ತೆಗೆಸಿಕೊಳ್ಳಬೇಕಾದವರು ಖಾಸಗಿ ಆಸ್ವತ್ರೆಯ ಕಡೆಗೆ ಮುಖ ಮಾಡಬೇಕಾಯಿತು.

ರಾತ್ರಿ ಮಗುವಿಗೆ ವಿಪರೀತ ಜ್ವರ ಬಂದಿತ್ತು. ಆಸ್ಪತ್ರೆಗೆ ಬಂದರೆ ಇಲ್ಲಿ ಯಾರೂ ಇಲ್ಲ. ಖಾಸಗಿ ನರ್ಸಿಂಗ್‌ಹೋಂಗೆ ಹೋಗಲು ಹಣ ತಂದಿಲ್ಲ.
-ಲಕ್ಷ್ಮೀನಾರಾಯಣ್‌, ಜಕ್ಕೂರು ನಿವಾಸಿ

ಸಕ್ಕರೆ ಕಾಯಿಲೆಗೆ ಮಾತ್ರೆ ತೆಗೆದುಕೊಂಡು ಹೋಗೋಣ ಎಂದು ಇಲ್ಲಿನ ಜನೌಷಧಿ ಕೇಂದ್ರಕ್ಕೆ ಬಂದರೆ ಬಾಗಿಲು ಮುಚ್ಚಿದೆ. ಖಾಸಗಿ ಮೆಡಿಕಲ್‌ ಸ್ಟೋರ್‌ ಹೋದರೆ ದುಬಾರಿ ಹಣ ತೆರಬೇಕಾಗುತ್ತದೆ.
-ಮಂಜುನಾಥ್‌ ಅಟ್ಟೂರು.

ಇಲ್ಲಿನ 30 ಸಿಬ್ಬಂದಿಯನ್ನು ಚುನಾವಣಾ ಕಾರ್ಯಕ್ಕೆಂದು ಪಡೆದುಕೊಂಡಿದ್ದಾರೆ. ರೋಗಿಗಳಿಗೆ ಸ್ವಲ್ಪ ತೊಂದರೆಯಾಗಿದೆ. ಚುನಾವಣೆ ಮುನ್ನಾದಿನ ಮತ್ತು ಚುನಾವಣೆ ದಿನ ಇನ್ನಷ್ಟು ತೊಂದರೆಯಾಗಲಿದೆ. ಈ ಬಗ್ಗೆ ಚುನಾವಣಾಧಿಕಾರಿಗಳಿಗೆ ಮನವಿ ಮಾಡಲಾಗುವುದು.
-ಕುಮಾರ್‌, ವೈದ್ಯ

ಚುನಾವಣೆ ಕಾರ್ಯಕ್ಕೆ ಅಗತ್ಯ ಸಿಬ್ಬಂದಿಯನ್ನು ಕರೆಸಿಕೊಳ್ಳುತ್ತೇವೆ. ಆದರೆ ಆಸ್ಪತ್ರೆಯಲ್ಲಿ ತುರ್ತು ಸೇವೆಗೆ ಅಗತ್ಯ ವೈದ್ಯರು ಬೇಕೆಂದು ಬರೆದುಕೊಟ್ಟರೆ ಅಂತಹವರನ್ನು ಬಳಸಿಕೊಳ್ಳುವುದಿಲ್ಲ. ಈ ಬಗ್ಗೆ ಪತ್ರ ಬರೆದು ತಿಳಿಸಬೇಕು.
- ಜಗದೀಶ್‌, ಚುನಾವಣಾಧಿಕಾರಿ. ಯಲಹಂಕ.

ಮುಂದಿನ ಲೇಖನ

Vijay Karnataka News App: ನಿಮ್ಮ ಸುತ್ತಮುತ್ತಲು ನಡೆಯುವ ವಿದ್ಯಮಾನಗಳನ್ನುಹಂಚಿಕೊಳ್ಳಲು ಬಯಸುತ್ತೀರಾ? ಹಾಗಿದ್ದಲ್ಲಿ ವಿಜಯ ಕರ್ನಾಟಕ ಆ್ಯಪ್‌ಡೌನ್‌ಲೋಡ್‌ ಮಾಡಿಕೊಳ್ಳಿ ಹಾಗೂ ರಿಪೋರ್ಟ್‌ ಕಳಿಸಿ
ಲೇಟೆಸ್ಟ್‌ ನ್ಯೂಸ್‌ ಅಪ್‌ಡೇಟ್‌ಗಳನ್ನು ಪಡೆಯಿರಿ, Vijay Karnataka ಫೇಸ್‌ಬುಕ್‌ಪೇಜ್‌ ಲೈಕ್‌ ಮಾಡಿರಿ
ಟ್ರೆಂಡಿಂಗ್‌