ಹ್ಯಾರಿಸ್‌ ಕ್ಷೇತ್ರದಲ್ಲಿ ಗೆಲ್ಲೋದ್‌ ಜೆಡಿಎಸ್‌: ವಿಕ ಓದುಗರ ಅಭಿಮತ

ಬೆಂಗಳೂರು: ನಗರದ 'ಶಾಂತಿನಗರ ಕ್ಷೇತ್ರದಲ್ಲಿ ಗೆಲ್ಲೋದ್‌ ಯಾರು? ಎಂಬ ಪ್ರಶ್ನೆಯೊಂದಿಗೆ ಶುಕ್ರವಾರ ನಡೆಸಿದ ಎಫ್‌ಬಿ ಲೈವ್‌ಗೆ ಭಾರಿ ಪ್ರತಿಕ್ರಿಯೆ ವ್ಯಕ್ತವಾಗಿದ್ದು, ಹ್ಯಾಟ್ರಿಕ್‌ ಗೆಲುವಿನ ನಿರೀಕ್ಷೆಯಲ್ಲಿದ್ದ ಕಾಂಗ್ರೆಸ್‌ ಅಭ್ಯರ್ಥಿ ಹ್ಯಾರಿಸ್‌ ಪರ ನೀರಸ ಅಭಿಮತ ವ್ಯಕ್ತವಾಗಿದೆ. ಜೆಡಿಎಸ್‌ ಮತ್ತು ಬಿಜೆಪಿ ನಡುವೆ ಭಾರಿ ಪೈಪೋಟಿ ಏರ್ಪಟ್ಟಿದೆ.

ಸಂಜೆ 5 ಗಂಟೆಯಿಂದ 6 ಗಂಟೆಯ ವರೆಗೆ ನಡೆಸಲಾದ ಎಫ್‌ಬಿ ಲೈವ್‌ನಲ್ಲಿ ಜೆಡಿಎಸ್‌ ಅಭ್ಯರ್ಥಿ ಪರ 474 ವಾವ್‌ ಇಮೋಜಿಗಳು ವ್ಯಕ್ತವಾಗಿವೆ. ಬಿಜೆಪಿ ಅಭ್ಯರ್ಥಿ ವಾಸುದೇವಮೂರ್ತಿ ಪರ 459 ಲವ್‌ ಇಮೋಜಿಗಳು ವ್ಯಕ್ತವಾಗಿವೆ. ಪುತ್ರ ಮಹಮ್ಮದ್‌ ನಲಪಾಡ್‌ ದುಂಡಾವರ್ತನೆಯಿಂದ ಜೈಲು ಪಾಲಾದ ಹಿನ್ನೆಲೆ ಭಾರಿ ಮುಜುಗರಕ್ಕೆ ಒಳಗಾಗಿರುವ ಹಾಲಿ ಶಾಸಕ ಹ್ಯಾರಿಸ್‌ ಪರ ಕೇವಲ 128 ಹ್ಹ ಹ್ಹ ಹ್ಹ ಇಮೋಜಿಗಳು ವ್ಯಕ್ತವಾಗಿವೆ.


ಕಳೆದ ಬಾರಿ ಜೆಡಿಎಸ್‌ನಿಂದ ಸ್ಪರ್ಧಿಸಿದ್ದ ವಾಸುದೇವಮೂರ್ತಿ ಈ ಬಾರಿ ಬಿಜೆಪಿ ಹುರಿಯಾಳು. ಅದರಂತೆ ಬಿಜೆಪಿಯಿಂದ ಟಿಕೆಟ್‌ ಆಕಾಂಕ್ಷಿಯಾಗಿದ್ದ ಶ್ರೀಧರ್‌ ರೆಡ್ಡಿ ಜೆಡಿಎಸ್‌ ಅಭ್ಯರ್ಥಿ. ಪುತ್ರ ಮಹಮ್ಮದ್‌ ನಲಪಾಡ್‌ ದುಂಡಾವರ್ತನೆ ಎಂಬ ಕಪ್ಪು ಚುಕ್ಕೆಯೊಂದಿಗೆ ಕಾಂಗ್ರೆಸ್‌ನಿಂದ ಹ್ಯಾರಿಸ್‌ ಕಣದಲ್ಲಿದ್ದಾರೆ.

ಬಿಜೆಪಿ-ಜೆಡಿಎಸ್‌ ಪಕ್ಷಗಳ ಅಭ್ಯರ್ಥಿಗಳ ಅದಲು-ಬದಲು ಮತದಾರರಲ್ಲಿ ಭಾರಿ ಗೊಂದಲ ಮೂಡಿಸುತ್ತದೆಯೇ? 3ನೇ ಬಾರಿಗೆ ಹ್ಯಾರಿಸ್‌ ಅವರನ್ನು ಮತದಾರರು ಆಯ್ಕೆ ಮಾಡುತ್ತಾರೆಯೇ? ಎಂಬುದು ಮೇ 15ಕ್ಕೆ ಬಹಿರಂಗಗೊಳ್ಳಲಿದೆ.

ಮೋಜು-ಮಸ್ತಿಗೆ ಕೇರ್‌ ಆಫ್‌ ಅಡ್ರೆಸ್‌ ಎಂದೆನಿಸಿರುವ ಎಂ.ಜಿ.ರಸ್ತೆ, ಬ್ರಿಗೇಡ್‌ ರಸ್ತೆ, ಯುಬಿ ಸಿಟಿ ಹಾಗೂ ಚರ್ಚ್‌ಸ್ಟ್ರೀಟ್‌ ಮುಂತಾದ ಹೈಟೆಕ್‌ ಪ್ರದೇಶಗಳ ಆಗರ ಶಾಂತಿನಗರ. 200ಕ್ಕೂ ಹೆಚ್ಚು ಪಬ್‌ಗಳನ್ನು ಹೊಂದುವ ಮೂಲಕ ಶಾಂತಿನಗರ ಪಬ್‌ ನಗರ ಎಂದೂ ಗುರುತಿಸಲ್ಪಟ್ಟಿದೆ.