Karnataka Election: ವೋಟರ್ ಐಡಿ ಇಲ್ಲವೇ? ಚಿಂತೆ ಬೇಡ.. ಮತದಾನದ ದಿನ ಹೀಗೆ ಮಾಡಿ

ಮತದಾನದ ದಿನಾಂಕ: ಮೇ 12, 2018 ಶನಿವಾರ

ಅವಧಿ: ಮುಂಜಾನೆ 7 ಗಂಟೆಯಿಂದ ಸಾಯಂಕಾಲ 6 ಗಂಟೆ

ಮತದಾರರ ಪಟ್ಟಿಯಲ್ಲಿ ನಿಮ್ಮ ಹೆಸರನ್ನು ಪರಿಶೀಲಿಸಲು ಇಲ್ಲಿ ಕ್ಲಿಕ್ ಮಾಡಿ -
ಅಥವಾ ಚುನಾವಣಾ ನೋಂದಣಿ ಕಚೇರಿಗೆ ಭೇಟಿ ಕೊಡಿ.

ಮತದಾನ ಮಾಡಲು ಹೋಗುವಾಗ ಮತದಾರ ಗುರುತಿನ ಚೀಟಿಯನ್ನು ತೆಗೆದುಕೊಂಡು ಹೋಗಿ. ನಿಮ್ಮ ಬಳಿ ಮತದಾರ ಗುರುತಿನ ಚೀಟಿ ಇಲ್ಲದಿದ್ದರೆ ಅಧಿಕೃತವಾಗಿರುವ ಇತರ ಯಾವುದೇ ಗುರುತಿನ ಚೀಟಿಯಾದರೂ ಸರಿ. ಅದರ ಜತೆ ಮತಗಟ್ಟೆ ವಿವರ ಇರುವ ವೋಟರ್ ಸ್ಲಿಪ್ ಸಹ ಇರಲಿ. ಮತಗಟ್ಟೆ ಅಧಿಕಾರಿಗಳು ಅಥವಾ ರಾಜಕೀಯ ಪಕ್ಷದ ಕಾರ್ಯಕರ್ತರು ನಿಮ್ಮ ಮನೆ ಬಾಗಿಲಿಗೆ ಬಂದು ಈ ಸ್ಲಿಪ್‌ನ್ನು ನೀಡಿರುತ್ತಾರೆ.

ನಿಮ್ಮ ಬಳಿ ವೋಟರ್ ಸ್ಲಿಪ್ ಇಲ್ಲದಿದ್ದರೂ ತಲೆ ಕಡೆಸಿಕೊಳ್ಳಬೇಡಿ. ಮತಗಟ್ಟೆ ಸಮೀಪ ರಾಜಕೀಯ ಪಕ್ಷಗಳು ಕೌಂಟರ್‌ಗಳನ್ನು ಹಾಕಿಕೊಂಡಿರುತ್ತವೆ. ಅಲ್ಲಿಂದ ಸಹ ನಿಮ್ಮ ವೋಟರ್ ಸ್ಲಿಪ್ ಪಡೆಯಬಹುದು.

ನಿಮ್ಮ ಮತಗಟ್ಟೆ ವಿವರ ಅಥವಾ ಇತರ ಯಾವುದೇ ವಿವರಗಳು ಬೇಕಾದಲ್ಲಿ ನಿಮ್ಮ ಮತದಾರ ಗುರುತಿನ ಚೀಟಿಯ ಸಂಖ್ಯೆಯನ್ನು 9731979899 ಮೊಬೈಲ್ ಸಂಖ್ಯೆಗೆ ಸಂದೇಶ ಕಳುಹಿಸಿ: KAEPIC ID card no

ಚುನಾವಣಾ ಆ್ಯಪ್‌: ಆಂಡ್ರಾಯ್ಡ್ ಅಥವಾ ಐಓಎಸ್ ಮೊಬೈಲ್‌ನಲ್ಲಿ ಚುನಾವಣಾ ಆ್ಯಪ್ ಡೌನ್‌ಲೋಡ್ ಮಾಡಿಕೊಂಡರೂ ಮತದಾನಕ್ಕೆ ಸಂಬಂಧಿಸಿದ ಮಾಹಿತಿಗಳು ಸಿಗುತ್ತವೆ. ಇದು ಮತಗಟ್ಟೆಯನ್ನು ಪತ್ತೆ ಹಚ್ಚಲು, ಅಭ್ಯರ್ಥಿಗಳ ಬಗ್ಗೆ ತಿಳಿದುಕೊಳ್ಳಲು ಸಹಕಾರಿ. ದೂರು ಪಡೆದುಕೊಳ್ಳುವ ಅಧಿಕಾರಿ ಸಂಖ್ಯೆಯೂ ಇಲ್ಲಿ ಲಭ್ಯ.ವಿಶೇಷ ಚೇತನರಿಗೆ ಮತ್ತು ಹಿರಿಯ ನಾಗರಿಕರಿಗೆ ವ್ಹೀಲ್ ಚೇರ್ ಬುಕ್ ಮಾಡಲು ಸಹ ಈ ಆ್ಯಪ್‌ನ್ನು ಬಳಸಬಹುದು.

ನಿಮ್ಮ ಹೆಸರು ಯಾವ ಮತಗಟ್ಟೆಯಲ್ಲಿದೆ ಎಂದು ತಿಳಿದುಕೊಳ್ಳಲು ಇರುವ ಇನ್ನೊಂದು ವೆಬ್ ತಾಣವೆಂದರೆ- kgis.ksrsac.in/election

ಪಾರ್ಕಿಂಗ್‌: ಮತಗಟ್ಟೆಯಿಂದ 200ಮೀ ಸುತ್ತಮುತ್ತ ಖಾಸಗಿ ವಾಹನಗಳಿಗೆ ಪ್ರವೇಶವಿರುವುದಿಲ್ಲ.

ಮತದಾನದ ಗುರುತಿನ ಚೀಟಿ ಇಲ್ಲವೇ? ಚಿಂತೆ ಬೇಡ

ಮತದಾರರ ಪಟ್ಟಿಯಲ್ಲಿ ನಿಮ್ಮ ಹೆಸರಿದ್ದರಾಯ್ತು ನೀವು ಮತ ಚಲಾಯಿಸಬಹುದು. ಪರ್ಯಾಯ ಗುರುತಿನ ಚೀಟಿಯನ್ನು ತೆಗೆದುಕೊಂಡು ಹೋದರೆ ಚುನಾವಣಾ ಅಧಿಕಾರಿಗಳು ಮತ ಹಾಕಲು ಅವಕಾಶ ನೀಡುತ್ತಾರೆ.

• ಪಾಸ್ಪೋರ್ಟ್
• ಚಾಲನಾ ಪರವಾನಿಗೆ ಪತ್ರ
• ಪಾನ್ ಕಾರ್ಡ್
• ಆಧಾರ್ ಕಾರ್ಡ್
• ಚುನಾವಣಾ ಆಯೋಗ ನೀಡಿರುವ ಅಧಿಕೃತ ಪೋಟೋ ವೋಟರ್ ಸ್ಲಿಪ್
• ಸಂಸದ/ಶಾಸಕ/ವಿಧಾನ್ ಪರಿಷತ್ ಸದಸ್ಯರಿಗೆ ನೀಡಲಾಗಿರುವ ಅಧಿಕೃತ ಗುರುತಿನ ಚೀಟಿ
• ತಮ್ಮ ಕರ್ತವ್ಯಕ್ಕೆ ಸಂಬಂಧಿಸಿದ ಗುರುತಿನ ಚೀಟಿ- ಕೇಂದ್ರ/ರಾಜ್ಯ ಸರ್ಕಾರಿ ನೌಕರರಿಗೆ ಮಾತ್ರ
• ಬ್ಯಾಂಕ್ ಮತ್ತು ಪೋಸ್ಟ್ ಆಫೀಸ್ ಪಾಸ್ ಬುಕ್ ( ಭಾವಚಿತ್ರ ಸಮೇತ ಇರುವಂಥದ್ದು)
• ಎನ್‌ಪಿಆರ್ ಅಡಿಯಲ್ಲಿ ಆರ್‌ಜಿಐ ನೀಡಿರುವ ಸ್ಮಾರ್ಟ್ ಕಾರ್ಡ್
• MGNREAGA ಜಾಬ್ ಕಾರ್ಡ್
• ಕಾರ್ಮಿಕ ಇಲಾಖೆ ನೀಡಿರುವ ಆರೋಗ್ಯ ವಿಮಾ ಸ್ಮಾರ್ಟ್ ಕಾರ್ಡ್
• ಭಾವಚಿತ್ರ ಸಮೇತವಿರುವ ನಿವೃತ್ತಿ ದಾಖಲೆಗಳು

ಮತಗಟ್ಟೆಯಲ್ಲಿ

ಸರತಿ ಸಾಲಲ್ಲಿ ನಿಂತಿರುವಾಗ ಗುರುತಿನ ಚೀಟಿ ನಿಮ್ಮ ಕೈಯ್ಯಲ್ಲಿರಲಿ. ಚುನಾವಣಾಧಿಕಾರಿಗಳು ಪಟ್ಟಿಯಲ್ಲಿ ನಿಮ್ಮ ಹೆಸರು ಇದೆಯೋ ಎಂಬುದನ್ನು ಮತ್ತು ಗುರುತಿನ ಚೀಟಿಯನ್ನು ಪರಿಶೀಲಿಸುತ್ತಾರೆ. ಇನ್ನೊಬ್ಬ ಚುನಾವಣಾಧಿಕಾರಿ ನಿಮ್ಮ ಕೈ ಬೆರಳಿಗೆ ಶಾಯಿಯನ್ನು ಹಚ್ಚುತ್ತಾರೆ. ನಿಮ್ಮ ಸಹಿ ತೆಗೆದುಕೊಂಡು ಒಂದು ಚೀಟಿಯನ್ನು ನೀಡಲಾಗುತ್ತದೆ.

ಮೂರನೇ ಅಧಿಕಾರಿ ನಿಮ್ಮ ಚೀಟಿಯನ್ನು ಪರೀಕ್ಷಿಸಿ ಮತ ಹಾಕಲು ಅವಕಾಶ ನೀಡುತ್ತಾರೆ.

ಇವಿಎಂ ಯಂತ್ರದಲ್ಲಿ ನಿಮ್ಮ ಆಯ್ಕೆಯ ಅಭ್ಯರ್ಥಿಯ ಗುರುತಿನ ಮುಂದಿರುವ ಗುಂಡಿ ಒತ್ತಿ

ಮೊಬೈಲ್ ಫೋನ್, ಕ್ಯಾಮರಾ ಸೇರಿದಂತೆ ಯಾವುದೇ ತರಹದ ಎಲೆಕ್ಟ್ರಾನಿಕ್ಸ್ ಸಾಮಗ್ರಿಗಳನ್ನು ಮತಗಟ್ಟೆ ಒಳಗೆ ತೆಗೆದು ಹೋಗುವುದಕ್ಕೆ ಅವಕಾಶವಿಲ್ಲ. ಮತ ಚಲಾಯಿಸುವಾಗ ಸೆಲ್ಫಿ ತೆಗೆದುಕೊಳ್ಳುವುದು ಅಥವಾ ಇತರರು ಮತ ಚಲಾಯಿಸುವಾಗ ಫೋಟೋ ಕ್ಲಿಕ್ಕಿಸುವುದನ್ನು ಮಾಡಲೇಬೇಡಿ.

ಸರಕಾರಿ ರಜೆ

ಮೇ 12 ನ್ನು ಸರಕಾರಿ ರಜಾ ದಿನವಾಗಿ ಘೋಷಿಸಲಾಗಿದ್ದು ಮತದಾನಕ್ಕೆ ಸಹಾಯಕವಾಗಲೆಂದು ಎಲ್ಲ ಸರಕಾರಿ ಮತ್ತು ಖಾಸಗಿ ಸಂಸ್ಥೆಗಳು ಮುಚ್ಚಲ್ಪಟ್ಟಿರುತ್ತವೆ.