ಮಂಡ್ಯ: ಕಣದಲ್ಲಿ 22 ಅಭ್ಯರ್ಥಿಗಳು, ಪ್ರತಿ ಬೂತ್‌ಗೆ ಎರಡು ಮತಯಂತ್ರ

ಮಂಡ್ಯ: ಮಂಡ್ಯದಲ್ಲಿ ಈ ಬಾರಿ ಎರಡೆರಡು ಮತಯಂತ್ರ ಇರಲಿದೆ.

ಇದು ಯಾತಕ್ಕೆ ಎಂದುಕೊಂಡಿರಾ? ಇದಕ್ಕೆ ಕಾರಣವೂ ಇದೆ.

ಒಂದು ವಿದ್ಯುನ್ಮಾನ ಮತಯಂತ್ರದಲ್ಲಿ (ಇವಿಎಂ) 16 ಅಭ್ಯರ್ಥಿಗಳ ಹೆಸರು ಹಾಕಲು ಮಾತ್ರ ಸ್ಥಳಾವಕಾಶವಿದೆ. ಆದರೆ, ಮಂಡ್ಯ ಲೋಕಸಭಾ ಕ್ಷೇತ್ರದಲ್ಲಿ ಒಟ್ಟು 22 ಅಭ್ಯರ್ಥಿಗಳು ಅಂತಿಮವಾಗಿ ಕಣದಲ್ಲಿ ಉಳಿದಿದ್ದಾರೆ.

ಅಭ್ಯರ್ಥಿಯ ಸಾಲಿನ ಕೊನೆಯಲ್ಲಿ ‘ನೋಟಾ’ ಕೂಡ ಇರಲಿದೆ. ಹೀಗಾಗಿ ‘ನೋಟಾ’ ಸೇರಿದಂತೆ 23 ಅಭ್ಯರ್ಥಿಗಳಿಗೆ ಒಂದೇ ಇವಿಎಂನಲ್ಲಿ ಸ್ಥಳಾವಕಾಶ ಕಲ್ಪಿಸಲಾಗದು.
ಇದರಿಂದ ಪ್ರತಿ ಮತಗಟ್ಟೆಯಲ್ಲಿ 2 ವಿದ್ಯುನ್ಮಾನ ಮತಯಂತ್ರಗಳನ್ನು ಇರಲಿವೆ.

ಮಂಡ್ಯ ಲೋಕಸಭಾ ಕ್ಷೇತ್ರ ವ್ಯಾಪ್ತಿಯ 8 ವಿಧಾನಸಭಾ ಕ್ಷೇತ್ರಗಳಲ್ಲಿ 2046 ಮತಗಟ್ಟೆಗಳನ್ನು ಗುರುತಿಸಲಾಗಿದ್ದು, ಒಟ್ಟು 4092 ಮತಯಂತ್ರಗಳನ್ನು ಇಡಬೇಕಿದೆ. ಜತೆಗೆ, ತುರ್ತು ಸಂದರ್ಭ ಬಳಕೆಗಾಗಿ ಹೆಚ್ಚುವರಿ ಮತಯಂತ್ರಗಳನ್ನು ಇಟ್ಟುಕೊಳ್ಳಬೇಕಿದೆ.

ಸದ್ಯಕ್ಕೆ 2539 ಬ್ಯಾಲೆಟ್ ಯೂನಿಟ್, 2275 ಕಂಟ್ರೋಲ್ ಯೂನಿಟ್ ಹಾಗೂ 2581 ವಿವಿ ಪ್ಯಾಟ್‌ಗಳು ದಾಸ್ತಾನಿವೆ.