ಶಿವಮೊಗ್ಗ: ಮಾಜಿ ಸಿಎಂ ಪುತ್ರರ ಗೆಲುವಿಗೆ ಭದ್ರಾವತಿ ಮತಗಳೇ ಭದ್ರ

ಭದ್ರಾವತಿ: ಶಿವಮೊಗ್ಗ ಲೋಕಸಭಾ ಚುನಾವಣೆ ದೇಶದ ಪ್ರತಿಷ್ಠಿತ ಲೋಕಸಭಾ ಕ್ಷೇತ್ರಗಳಲ್ಲಿ ಒಂದಾಗಿದೆ.

ಏಕೆಂದರೆ ಇಲ್ಲಿ ಕಣಕ್ಕಿಳಿದಿರುವುದು ಮಾಜಿ ಮುಖ್ಯಮಂತ್ರಿಗಳ ಪುತ್ರರು.

ಬಿಜೆಪಿ ರಾಜ್ಯಾಧ್ಯಕ್ಷ, ಮಾಜಿ ಮುಖ್ಯಮಂತ್ರಿ ಬಿ.ಎಸ್‌. ಯಡಿಯೂರಪ್ಪ ಪುತ್ರ ಬಿ.ವೈ. ರಾಘವೇಂದ್ರ, ಮಾಜಿ ಮುಖ್ಯಮಂತ್ರಿ ಎಸ್‌. ಬಂಗಾರಪ್ಪ ಪುತ್ರ ಮಧು ಮುಖಾಮುಖಿಯಾಗಿದ್ದಾರೆ.

ಶಿವಮೊಗ್ಗದಲ್ಲಿ ಈಗಾಗಲೇ ಉತ್ತಮ ಮತದಾನ ಕೂಡ ಆಗಿದೆ. ಆದರೆ ಇಲ್ಲಿ ಗೆಲುವಿಗೆ ಅತ್ಯಂತ ಪ್ರಮುಖ ಪಾತ್ರ ವಹಿಸುವುದು ಭದ್ರಾವತಿಯ ಮತಗಳು.

ಈ ಹಿಂದಿನಿಂದಲೂ ಭದ್ರಾವತಿಯ ಮತದಾರರು ಕೈ ಹಿಡಿಯುವ ಅಭ್ಯರ್ಥಿಗೆ ವಿಜಯಮಾಲೆ ದಕ್ಕಿದೆ.

ಭದ್ರಾವತಿಯಲ್ಲಿ ಅಂದಾಜು ಎರಡು ಲಕ್ಷಕ್ಕಿಂತಲೂ ಹೆಚ್ಚು ಮತದಾರರಿದ್ದಾರೆ.

ಭದ್ರಾವತಿಯಲ್ಲಿ ಬಿಜೆಪಿ ಅಸ್ತಿತ್ವ ಅಷ್ಟೇನೂ ಇಲ್ಲ. ಇದಕ್ಕಾಗಿಯೇ ಕಾಂಗ್ರೆಸ್‌-ಜೆಡಿಎಸ್‌ ಮೈತ್ರಿ ಭದ್ರಾವತಿಯ ಹೆಚ್ಚು ಮುಖ ಮಾಡಿದೆ. ಕಾಂಗ್ರೆಸ್‌ನ ಟ್ರಬಲ್‌ಶೂಟರ್ ಡಿಕೆ ಶಿವಕುಮಾರ್‌ ಭದ್ರಾವತಿಯಲ್ಲಿ ಪ್ರಮುಖ ಎದುರಾಳಿಗಳಾಗಿದ್ದ ಬಿ.ಕೆ. ಸಂಗಮೇಶ್ವರ ಮತ್ತು ಮಾಜಿ ಶಾಸಕ ಅಪ್ಪಾಜಿಗೌಡ ಅವರ ಜತೆ ಯಶಸ್ವಿಯಾಗಿ ಸಂಧಾನ ನಡೆಸಿದ್ದರು.

ಒಂದು ಹಂತದಲ್ಲಿ ಲಿಂಗಾಯತ ಸಮುದಾಯದ ಬಿ.ಕೆ. ಸಂಗಮೇಶ್ವರ್‌ ಬಿಜೆಪಿ ಸೇರುತ್ತಾರಾ ಎಂಬ ಊಹಾಪೋಹ ಇತ್ತು. ಅದು ಈಗ ತಣ್ಣಗಾಗಿದೆ.

ಇದರು ಬಿಜೆಪಿಯ ಪಾಲಿಗೆ ನುಂಗಲಾರದ ಬಿಸ ತುಪ್ಪವಾಗಿದೆ. ಕಳೆದ ಲೋಕಸಭಾ ಚುನಾವಣೆಯಲ್ಲಿ ಬಿವೈ ರಾಘವೇಂದ್ರಗೆ ಭದ್ರಾವತಿಯಲ್ಲಿ 52 ಸಾವಿರ ಮತ ದಕ್ಕಿತು.

ಈ ಬಾರಿಯೂ ಬಿಜೆಪಿ ಈ ಮತಗಳತ್ತ ಕಣ್ಣು ಹಾಕಿದೆ. ಬಿಜೆಪಿ ರಾಷ್ಟ್ರಾಧ್ಯಕ್ಷ ಅಮಿತ್‌ ಶಾ ಕೂಡ ಭದ್ರಾವತಿಗೆ ಆಗಮಿಸಿ ಮತ ಯಾಚಿಸಿದ್ದರು.

ಭದ್ರಾವತಿಯ ಮತದಾರ ಯಾರಿಗೆ ಜಯ ಭದ್ರ ಮಾಡುತ್ತಾನೆ ಎಂಬುದು ಕಾಲವೇ ನಿರ್ಣಯಸಲಿದೆ.

ಮತದಾರರು: 14.49 ಲಕ್ಷ
ಪುರುಷರು: 7.20 ಲಕ್ಷ
ಮಹಿಳೆಯರು: 7.28 ಲಕ್ಷ
ಇತರೆ: 42

ವಿಧಾನಸಭಾ ಕ್ಷೇತ್ರ
ಶಿವಮೊಗ್ಗ ಗ್ರಾಮೀಣ: ಬಿಜೆಪಿ
ಭದ್ರಾವತಿ: ಕಾಂಗ್ರೆಸ್‌
ಶಿವಮೊಗ್ಗ: ಬಿಜೆಪಿ
ತೀರ್ಥಹಳ್ಳಿ: ಬಿಜೆಪಿ
ಶಿಕಾರಿಪುರ: ಬಿಜೆಪಿ
ಸೊರಬ: ಬಿಜೆಪಿ (ಕುಮಾರ್‌ ಬಂಗಾರಪ್ಪ)
ಸಾಗರ: ಬಿಜೆಪಿ
ಬೈಂದೂರು: ಬಿಜೆಪಿ