ಮಂಡ್ಯ ಮಂದಿ ಸ್ವಾಭಿಮಾನಕ್ಕೆ ಬೆಲೆ ಕೊಟ್ಟಿದ್ದಾರೆ: ದೊಡ್ಡಣ್ಣ

ಮಂಡ್ಯ: ಲೋಕಸಭಾ ಚುನಾವಣೆಯಲ್ಲಿ ಸುಮಲತಾ ಅಂಬರೀಷ್‌ ಅವರನ್ನು ಗೆಲ್ಲಿಸಿದ ಮಂಡ್ಯ ಜನರಿಗೆ ಎಷ್ಟು ಕೋಟಿ ಕೋಟಿ ಅಭಿನಂದನೆ ಸಲ್ಲಿಸಿದರೂ ಸಾಲದು. ಇದು ರೆಬೆಲ್‌ ಸ್ಟಾರ್‌ ಅಂಬರೀಷ್‌ ಹೃದಯವಂತಕ್ಕೆ ಸಿಕ್ಕ ಪ್ರತಿಫಲ ಎಂದು ಚಿತ್ರನಟ, ಅಂಬಿ ಆಪ್ತ ದೊಡ್ಡಣ್ಣ ಹೇಳಿದರು.

ಲೋಕಸಭೆ ಚುನಾವಣೆಯಲ್ಲಿ ಭರ್ಜರಿ ಜಯ ದಾಖಲಿಸಿದ ಚಿತ್ರನಟಿ ಸುಮಲತಾ ಅಂಬರೀಷ್‌ ಜನರಿಗೆ ಧನ್ಯವಾದ ಹೇಳಲು ಹಾಗೂ 'ರೆಬಲ್‌ಸ್ಟಾರ್‌' ಅಂಬರೀಷ್‌ ಅವರ ಹುಟ್ಟುಹಬ್ಬದ ದಿನವಾದ ಬುಧವಾರ (ಮೇ 29) ಮಂಡ್ಯದಲ್ಲಿ ಕೃತಜ್ಞತಾ ಸಮಾವೇಶ ಆಯೋಜಿಸಲಾಗಿತ್ತು. ಈ ಸಮಾರಂಭದಲ್ಲಿ ದೊಡ್ಡಣ್ಣ ಮಾತನಾಡಿದರು.

ಮಂಡ್ಯ ಜನ ಅಧಿಕಾರ ದರ್ಪಕ್ಕೆ ಬಗ್ಗುವ ಜನ ಅಲ್ಲ. ದುಡ್ಡಿಗೋಸ್ಕರ ಬದುಕುವ ಜನ ಅಲ್ಲ.. ಸ್ವಾಭಿಮಾನಕೋಸ್ಕರ ಅನ್ನುವುದನ್ನು ನಿರೂಪಿಸಿದ್ದಿರಾ. ನಿಮ್ಮ ಪಾದಕ್ಕೆ ಧನ್ಯವಾದ ಎಂದರು.

ಅಂಬಿ ಹೃದಯವಂತ ಗೆಳೆತನಕ್ಕೆ ಮತ್ತೊಂದು ಹೆಸರು. ಎಲ್ಲರ ಹೃದಯದಲ್ಲಿ ಅಂಬರೀಶ್ ಮನೆ ಮಾಡಿದ್ದ. ಅದೇ ರೀತಿಯ ಅಂಬರೀಷ್‌ ಅವರನ್ನು ಮಂಡ್ಯದ ಜನ ಮಾತ್ರವಲ್ಲ ಇಡೀ ಕರ್ನಾಟಕದ ಜನ ಹೃದಯ ಸಿಂಹಾಸನದಲ್ಲಿ ಇರಿಸಿಕೊಂಡಿದ್ದೀರಾ ಎಂದು ಹೇಳಿದರು.

ಸುಮಲತಾರನ್ನು ಎಷ್ಟು ಜನ ಯಾವ ಯಾವ ರೀತಿ ಅಂತಾ ನಿಂದಿಸಿದ್ರು ಅಂತಾ ಎಲ್ಲರಿಗೂ ಗೊತ್ತು. ಮಂಡ್ಯ ಗೌಡ್ತಿ, ಮಂಡ್ಯ ಸೊಸೆ ಅಲ್ಲ ಎಂದರೂ ನೀವೂ ಗೆಲ್ಲಿಸಿ, ಅವರೆಲ್ಲರಿಗೂ ತಕ್ಕ ಉತ್ತರ ಕೊಟ್ಟಿದ್ದೀರಾ ಎಂದು ತಿಳಿಸಿದರು.

ಮುಂದೆ ಸುಮಲತಾ ಒಳ್ಳೆ ಕೆಲಸ ಮಾಡ್ತಾರೆ, ಅಪ ಪ್ರಚಾರಗಳಿಗೆ ಕಿವಿಗೊಡಬೇಡಿ. ಕಷ್ಟದಲ್ಲಿರೋರಿಗೆ ಸಾಕಷ್ಟು ಕೆಲಸ ಮಾಡಿದ್ದಾರೆ. ಅಂಬರೀಶ್ ಅಂದರೆ ಬೇರೆ ಯಾರೂ ಅಲ್ಲ, ವನು ಒಬ್ಬ ಗಂಧರ್ವ. ಅಂಥ ಹೃದಯವಂತನ ಪತ್ನಿಯಾಗಿರುವ ಸುಮಲತಾ ಮಂಡ್ಯ ಜಿಲ್ಲೆಗೊಸ್ಕರ ಒಳ್ಳೆಯ ಕೆಲಸ ಮಾಡುತ್ತಾರೆ ಎಂಬ ನಂಬಿಕೆ ಇದೆ ಎಂದರು.

ಇನ್ನು ಜೋಡೆತ್ತುಗಳು. ಅಬ್ಬಾ ಒಳ್ಳೆ ಹೆಸರು ಕೊಟ್ಟವರೇ ಯಾರೋ. ಇವರಿಬ್ಬರೂ ಪಟ್ಟ ಪರಿಶ್ರಮ ನಿಜಕ್ಕೂ ಅದ್ಭುತ. ಇವರಿಬ್ಬರೂ ಮಂಡ್ಯದ ರತ್ನಗಳು. ಸುಮಕ್ಕನ ಗೆಲುವಿಗೆ ಪರಿಶ್ರಮ ಪಟ್ಟ ಎಲ್ಲರೂ ಕೃತಜ್ಞತೆಗೆ ಅರ್ಹರು ಎಂದು ದೊಡ್ಡಣ್ಣ ತಮ್ಮ ಭಾಷಣ ಮುಗಿಸಿದರು.