ಮಂಡ್ಯ: ಶಿವಪ್ರಕಾಶ್‌ ಬಾಬು ಮನೆಗೆ ಭೇಟಿ ನೀಡಿ ಚರ್ಚಿಸಿದ ಕುಮಾರಸ್ವಾಮಿ

ಮಂಡ್ಯ: ಮಂಡ್ಯದಲ್ಲಿ ನಿಖಿಲ್‌ ಕುಮಾರಸ್ವಾಮಿ ವಿರುದ್ಧ ಕೆಲಸ ಮಾಡಲು ಕೆಲವು ಕಾಂಗ್ರೆಸ್‌ ನಾಯಕರು ತಂತ್ರ ರೂಪಿಸಿದ್ದಾರೆ ಎಂಬ ವದಂತಿ ಹರಡಿದ ಬೆನ್ನಲ್ಲೇ ಮುಖ್ಯಮಂತ್ರಿ ಕುಮಾರಸ್ವಾಮಿ ಈಗ ತೇಪೆ ಹಚ್ಚುವ ಕಾರ್ಯಕ್ಕೆ ಕೈ ಹಾಕಿದ್ದಾರೆ.

ಮಂಡ್ಯದಲ್ಲಿ ಸುಮಲತಾ ಪರವಾಗಿ ಕೆಲಸ ಮಾಡು ಎಂದು ಕಾಂಗ್ರೆಸ್‌ ಚೆಲುವರಾಯಸ್ವಾಮಿ ಮಂಡ್ಯದ ಮಾಜಿ ನಗರಸಭಾ ಸದಸ್ಯ ಎಸ್‌.ಕೆ. ಶಿವಪ್ರಕಾಶ್‌ ಬಾಬುಗೆ ದೂರವಾಣಿ ಕರೆ ಮಾಡಿ ಒತ್ತಾಯಿಸಿದ್ದು ಬಹಿರಂಗಗೊಂಡಿದೆ.

ಆದರೆ ಇದನ್ನು ಶಿವಪ್ರಕಾಶ್‌ಬಾಬು ತಿರಸ್ಕರಿಸಿ, ಕುಮಾರಸ್ವಾಮಿ ಜತೆಗೆ ತೆರಳುವುದಾಗಿ ತಿಳಿಸಿದ್ದರು.

ಈಗ ಇದೇ ಕಾರಣಕ್ಕಾಗಿ ಕುಮಾರಸ್ವಾಮಿ ಈಗ ಸ್ಥಳೀಯ ಕಾಂಗ್ರೆಸ್‌ ನಾಯಕರ ಮನೆಗೆ ಭೇಟಿ ನೀಡಿ ಮನವಿ ಮಾಡುತ್ತಿದ್ದಾರೆ.

ಭಾನುವಾರ ಮಧ್ಯಾಹ್ನ ಆದಿಚುಂಚನಗಿರಿಗೆ ಭೇಟಿ ನೀಡಿ ಬಂದ ನಂತರ ಮಂಡ್ಯಕ್ಕೆ ಆಗಮಿಸಿ ನಗರಸಭಾ ಮಾಜಿ ಸದಸ್ಯ ಎಸ್.ಕೆ.ಶಿವಪ್ರಕಾಶ್‌ಬಾಬು, ಮಾರ್ವಾಡಿ ಸಮುದಾಯದ ಮುಖಂಡ ಭರತೇಶ್ ಸೇರಿದಂತೆ ಕಾಂಗ್ರೆಸ್ ಹಾಗೂ ಜೆಡಿಎಸ್ ಮುಖಂಡರ ಮನೆಗಳಿಗೆ ಭೇಟಿ ನೀಡಿ ಸಮಾಲೋಚಿಸಿದರು.

ಮಾ.25ರಂದು ಪುತ್ರ ನಿಖಿಲ್ ನಾಮಪತ್ರ ಸಲ್ಲಿಸುವ ಕಾರ್ಯವನ್ನು ಯಶಸ್ವಿಗೊಳಿಗಾಗಿ ದಿನವಿಡೀ ಪರೇಡ್ ನಡೆಸಿದರು.

ಈ ವೇಳೆ ಜಿಲ್ಲಾ ಉಸ್ತುವಾರಿ ಸಚಿವ ಸಿ.ಎಸ್.ಪುಟ್ಟರಾಜು, ಸಾರಿಗೆ ಸಚಿವ ಡಿ.ಸಿ.ತಮ್ಮಣ್ಣ, ಅಭ್ಯರ್ಥಿ ನಿಖಿಲ್, ಜಿಲ್ಲಾ ಜೆಡಿಎಸ್‌ನ ಡಿ. ರಮೇಶ್ ಇತರರು ಹಾಜರಿದ್ದರು.