ಕುಟುಂಬ ರಾಜಕಾರಣ ವಿರೋಧಿಸಿ; ಬೂತ್‌ಗಳಲ್ಲಿ ಸರ್ಜಿಕಲ್‌ ಸ್ಟ್ರೈಕ್ ಮಾಡಿ: ಸಿಟಿ ರವಿ

ದಾವಣಗೆರೆ: ಕಾಂಗ್ರೆಸ್‌ನ ಕುಟುಂಬ ರಾಜಕಾರಣ ವಿರುದ್ಧ ಬಿಜೆಪಿ ಕಾರ್ಯಕರ್ತರು ಸರ್ಜಿಕಲ್‌ ಸ್ಟ್ರೈಕ್‌ ಕೈಗೊಳ್ಳಬೇಕೆಂದು ಶಾಸಕ ಸಿಟಿ ರವಿ ಹೇಳಿದರು.

ಜಿಲ್ಲಾ ಬಿಜೆಪಿಯಿಂದ ದಾವಣಗೆರೆ ದಕ್ಷಿಣ ವಿಧಾನಸಭಾ ಕ್ಷೇತ್ರದ ಬೇತೂರು ರಸ್ತೆಯಲ್ಲಿ ಬುಧವಾರ ಅಭ್ಯರ್ಥಿ ಜಿ.ಎಂ. ಸಿದ್ದೇಶ್ವರ್‌ ಪರ ರೋಡ್‌ ಶೋ ಮೂಲಕ ಪ್ರಚಾರ ನಡೆಸಿ ಮಾತನಾಡಿದರು.

ಕಾಂಗ್ರೆಸ್‌ನ ಕುಟುಂಬ ರಾಜಕಾರಣ ವಿರುದ್ಧ ಹರಿಹಾಯ್ದರು. ಕಾಂಗ್ರೆಸ್‌ ಪಕ್ಷದ ಮನೆ, ಬೂತ್‌ಗಳಲ್ಲಿ ಬಿಜೆಪಿ ಕಾರ್ಯಕರ್ತರು ಸರ್ಜಿಕಲ್‌ ಸ್ಟ್ರೈಕ್‌ ಕೈಗೊಳ್ಳಬೇಕು. ದೇಶದಲ್ಲಿ 70 ವರ್ಷಗಳ ಕಾಲ ಆಡಳಿತ ನಡೆಸಿದ ಕಾಂಗ್ರೆಸ್‌ ನೆಹರು ಕಾಲದಿಂದ ಕುಟುಂಬ ರಾಜಕಾರಣ ನಡೆಸುತ್ತಿದೆ. ಆದರೆ, ಬಿಜೆಪಿಯಲ್ಲಿ ಹಾಗೆ ಇಲ್ಲ. ಸಾಮಾನ್ಯ ಟೀ ಮಾರುತ್ತಿದ್ದ ಹುಡುಗ ದೇಶದ ಪ್ರಧಾನಿಯಾಗಿದ್ದಾರೆ. ಮೋದಿ ದೇಶವೇ ಒಂದು ಕುಟುಂಬ ಎಂದು ಹೇಳಿದ್ದು, ಎಲ್ಲರ ಶ್ರೇಯೋಭಿವೃದ್ಧಿಗಾಗಿ ದುಡಿಯುತ್ತಿದ್ದಾರೆ ಎಂದರು.

ಕಾಂಗ್ರೆಸ್‌, ಜೆಡಿಎಸ್‌ನಲ್ಲಿ ಮಾತ್ರ ಕುಟುಂಬ ರಾಜಕಾರಣ ಇದೆ. ಬಿಜೆಪಿಯಲ್ಲಿ ಅದು ಇಲ್ಲ. ಒಂದು ಕುಟುಂಬದವರು ಒಬ್ಬರಿಗಿಂತ ಹೆಚ್ಚು ಮಂದಿ ಜನಪ್ರತಿನಿಧಿಗಳಾಗಬಹುದು. ಆದರೆ, ಅವರಿಗೆ ಪಕ್ಷ ದ ಅಧಿಕಾರ ಹಸ್ತಾಂತರ ಆಗೋದಿಲ್ಲ. ಅಮಿತ್‌ ಶಾ ಕೂಡ ಕೊನೆ ತನಕ ಬಿಜೆಪಿ ರಾಷ್ಟ್ರೀಯ ಅಧ್ಯಕ್ಷರಾಗಿ ಇರೋದಿಲ್ಲ. ಹಾಗೆಯೇ ಬಿ.ಎಸ್‌. ಯಡಿಯೂರಪ್ಪರಿಂದ ಅವರ ಮಕ್ಕಳಿಗೆ ಅಧಿಕಾರ ಹಸ್ತಾಂತರ ಆಗುವುದಿಲ್ಲ. ಸದ್ಯ ಯಡಿಯೂರಪ್ಪಗೆ ಹೈಕಮಾಂಡ್‌ ಸಿಎಂ ಎಂದು ಘೋಷಣೆ ಮಾಡಿದೆ. ಮೈತ್ರಿ ಸರಕಾರ ಉರುಳಿದರೆ ಯಡಿಯೂರಪ್ಪರೇ ಸಿಎಂ ಆಗುತ್ತಾರೆ ಎಂದು ಭವಿಷ್ಯ ನುಡಿದರು.

ರಾಸಲೀಲೆ ಆಡಿಯೋ ಕಾಮನ್‌

ಸಾಮಾಜಿಕ ಜಾಲ ತಾಣದಲ್ಲಿ ಸಂಸದರೊಬ್ಬರ ರಾಸಲೀಲೆ ಆಡಿಯೋ ಹರಿದಾಡುತ್ತಿದ್ದು, ಚುನಾವಣೆ ವೇಳೆ ಇದು ಕಾಮನ್‌ ಆಗಿದೆ. ನೇರವಾಗಿ ಎದುರಿಸಲಾರದವರು ಇಂತಹ ವಾಮಮಾರ್ಗ ಹಿಡಿಯುತ್ತಾರೆ. ಒಂದು ಟಿವಿ ಇದನ್ನೇ ದಿನ ಪೂರ್ತಿ ತೋರಿಸುತ್ತಿದೆ. ಅವರಿಗೆ ಇದರ ಟಿಆರ್‌ಪಿ ಮೈಸೂರಿಗಷ್ಟೇ ಸೀಮಿತ. ಅದಕ್ಕಿಂತ ಅವರ ನಾಯಕರದ್ದೇ ತೋರಿಸಿದ್ದರೆ ರಾಜ್ಯ, ರಾಷ್ಟ್ರಮಟ್ಟದಲ್ಲಿ ಟಿಆರ್‌ಪಿ ಸಿಗುತ್ತಿತ್ತು ಎಂದು ಶಾಸಕ ಸಿ.ಟಿ. ರವಿ ತಿಳಿಸಿದರು.