ಮೋದಿಯಿಂದ ದೇಶದ ಮಾನ ಹರಾಜು: ಎಚ್‌.ಕೆ.ಪಾಟೀಲ

ಮುಧೋಳ: ಬಿಜೆಪಿ ದೇಶದ ಸೈನಿಕರನ್ನು ತೋರಿಸಿ ಮತ ಭಿಕ್ಷೆ ಕೇಳುತ್ತಿದೆ. 2014 ರಲ್ಲಿ ನೀಡಿದ ಪ್ರಣಾಳಿಕೆ ಮರೆತು ಆಡಳಿತ ನಡೆಸಿದೆ ಎಂದು ರಾಜ್ಯ ಕಾಂಗ್ರೆಸ್‌ ಪ್ರಚಾರ ಸಮಿತಿಯ ಅಧ್ಯಕ್ಷ ಎಚ್‌.ಕೆ.ಪಾಟೀಲ ದೂರಿದ್ದಾರೆ.

ನಗರದ ಹೇಮರಡ್ಡಿ ಕಲ್ಯಾಣ ಮಂಟಪದ ಆವರಣದಲ್ಲಿ ನಡೆದ ಸಭೆಯಲ್ಲಿ ಲೋಕಸಭೆ ಚುನಾವಣೆ ಕಾಂಗ್ರೆಸ್‌ ಕಾರ್ಯಕರ್ತರನ್ನು ಉದ್ದೇಶಿಸಿ ಮಾತನಾಡಿದರು.

ದೇಶದ ಮಾನ ಹರಾಜು ಹಾಕುವ ಕೆಲಸವನ್ನು ಮೋದಿಯವರು ಮಾಡುತ್ತಿದ್ದಾರೆ. ದೇಶದಲ್ಲಿ ಐದು ಯುದ್ಧಗಳು ನಡೆದಿವೆ. ಉಕ್ಕಿನ ಮಹಿಳೆ ಇಂದಿರಾಗಾಂಧಿ 12 ಸರ್ಜಿಕಲ್‌ ಸ್ಟ್ರೈಕ್‌ ಮಾಡಿದ್ದಾರೆ. ಆದರೆ ಯಾರೂ ಅದನ್ನು ಚುನಾವಣೆಗೆ ಬಳಸಿಕೊಳ್ಳಲಿಲ್ಲ. ಫುಲ್ವಾಮ ದಾಳಿ ನಡೆದಾಗ ಸೈನಿಕರ ಸಮವಸ್ತ್ರ ಧರಿಸಿ ಪೋಟೊ ತೆಗೆಸಿಕೊಂಡರು. ಇದು ಸೇನೆಗೆ ಅವಮಾನ ಎಂದು ಟೀಕಿಸಿದ್ದಾರೆ.

ಸಕ್ಕರೆ ಸಚಿವ ಆರ್‌.ಬಿ.ತಿಮ್ಮಾಪೂರ ಮಾತನಾಡಿ, ದೇಶದಲ್ಲಿ ಸಾಮಾಜಿಕ ನ್ಯಾಯವನ್ನು ಸಂಪೂರ್ಣ ಕಡೆಗಣಿಸಿರುವ ಬಿಜೆಪಿ ಆಡಳಿತದಿಂದ ಜನರಿಗೆ ಅನ್ಯಾಯವಾಗಿದೆ. ಮೋದಿ ಆಡಳಿತದಿಂದ ಜನ ಭ್ರಮನಿರಸನಗೊಂಡಿದ್ದಾರೆ. ವೀಣಾ ಕಾಶಪ್ಪನವರ ಪರ ಎಲ್ಲೆಡೆ ಉತ್ತಮ ಅಲೆಯಿದೆ ಎಂದರು.

ಲೋಕಸಭೆ ಅಭ್ಯರ್ಥಿ ವೀಣಾ ಕಾಶಪ್ಪನವರ ಮಾತನಾಡಿ, 15 ವರ್ಷ ಜಿಲ್ಲೆಯ ಆಡಳಿತದಲ್ಲಿ ಬಿಜೆಪಿ ಅಭ್ಯರ್ಥಿಯಿಂದ ಯಾವುದೇ ಅಭಿವೃದ್ಧಿಗೆ ಪೂರಕವಾಗಿರುವ ಕೆಲಸಗಳಾಗಿಲ್ಲ. ಜಿಲ್ಲೆಯಿಂದ ನನಗೆ ಲೋಕಸಭೆ ಪ್ರವೇಶ ಪಡೆಯಲು ಅವಕಾಶ ಮಾಡಿಕೊಡಿ ನಿಮ್ಮ ಬೇಕು ಬೇಡಿಕೆಗಳಿಗೆ ಸ್ಪಂದಿಸುವೆ ಎಂದರು. ಮಾಜಿ ಸಚಿವ ಎಸ್‌.ಆರ್‌.ಪಾಟೀಲ ಮಾತನಾಡಿದರು. ಮಾಜಿ ಶಾಸಕ ಎಸ್‌.ಜಿ.ನಂಜಯ್ಯನವರಮಠ, ವಿಜಯಾನಂದ ಕಾಶಪ್ಪನವರ, ಜಿಲ್ಲಾ ಕಾಂಗ್ರೆಸ್‌ ಅಧ್ಯಕ್ಷ ಎಂ.ಬಿ.ಸೌದಾಗರ, ಕೆಪಿಸಿಸಿ ಕಾರ್ಯದರ್ಶಿ ದಯಾನಂದ ಪಾಟೀಲ, ರಕ್ಷಿತಾ ಈಟಿ, ಯುವ ಘಟಕದ ಜಿಲ್ಲಾಧ್ಯಕ್ಷ ವಿನಯ ತಿಮ್ಮಾಪೂರ, ಜಿಪಂ ಅಧ್ಯಕ್ಷೆ ಬಾಯಕ್ಕ ಮೇಟಿ, ಸತೀಶ ಬಂಡಿವಡ್ಡರ್‌, ಶಿವಾನಂದ ಉದಪುಡಿ, ಸಂಜಯ ನಾಯಕ, ಲೋಕಣ್ಣ ಕೊಪ್ಪದ, ನಂದುಗೌಡ ಪಾಟೀಲ, ಪ್ರಭಾವತಿ ಚವಡಿ, ಜೆಡಿಎಸ್‌ ಅಧ್ಯಕ್ಷ ಶಂಕರ ನಾಯಕ, ಸಹಕಾರಿ ಯುನಿಯನ್‌ ಜಿಲ್ಲಾಧ್ಯಕ್ಷ ಕಾಶೀನಾಥ ಹುಡೇದ, ಎನ್‌.ಪಿ.ಗಸ್ತಿ ಇತರರು ಇದ್ದರು.