ಲೋಕಸಭೆ ಚುನಾವಣೆ ಕಾವಿಗೆ ತಂಪೆರೆದ ಮಳೆರಾಯ

ಬೆಂಗಳೂರು: ರಾಜ್ಯದ 28 ಲೋಕಸಭಾ ಕ್ಷೇತ್ರಗಳ ಪೈಕಿ 14 ಕ್ಷೇತ್ರಗಳಿಗೆ ಮಂಗಳವಾರ ಎರಡನೇ ಹಂತದಲ್ಲಿ ಚುನಾವಣೆ ನಡೆಯುತ್ತಿದ್ದು, ಮತದಾನದ ಕಾವು ಏರಿರುವಾಗಲೇ ಮಳೆರಾಯ ರಾಜ್ಯದ ಹಲವೆಡೆ ಮಳೆ ಸುರಿಸಿ ಭೂಮಿಗೆ ತಂಪೆರೆದಿದ್ದಾನೆ.

ಮಂಗಳವಾರ ಮಧ್ಯಾಹ್ನದ ನಂತರ ಉತ್ತರ ಕನ್ನಡದ ಶಿರಸಿ, ಶಿವಮೊಗ್ಗದ ಸಾಗರ ಮುಂತಾದೆಡೆ ಉತ್ತಮ ಮಳೆಯಾಗಿದೆ. ಶಿರಸಿಯ ಮತಗಟ್ಟೆ ಸಂಖ್ಯೆ 92 ಬಳಿ ಉತ್ತಮ ಮಳೆಯಾಗಿದ್ದು, ಮತದಾರರಿಗೆ ತೊಂದರೆಯಾಗಿದೆ. ಗುಡುಗು ಸಿಡಿಲು ಕೂಡ ಇದ್ದು, ಮತದಾರರು ಮನೆಯಿಂದ ಹೊರಗೆ ಬರಲು ಸಮಸ್ಯೆಯಾಗಿದೆ.

ಚಿಕ್ಕಮಗಳೂರಿನಲ್ಲಿ ಅಲಿಕಲ್ಲು ಮಳೆ
ಕಾಫಿನಾಡು ಚಿಕ್ಕಮಗಳೂರಿನಲ್ಲೂ ಮಳೆ ಸುರಿದಿದೆ. ಈ ಭಾಗದ ಬಾಳೆಹೊನ್ನೂರು ಸಹಿತ ಹಲವು ಪ್ರದೇಶದಲ್ಲಿ ಅಲಿಕಲ್ಲು ಮಳೆಯಾಗಿದ್ದು, ಗಾಳಿಯ ಅಬ್ಬರಕ್ಕೆ ಮರಗಳು ಧರೆಗುರುಳಿವೆ.

ಕಳೆದ ಗುರುವಾರ ಮೊದಲ ಹಂತದ ಮತದಾನ ಸಂದರ್ಭದಲ್ಲೂ ರಾಜ್ಯದ ಹಲವೆಡೆ ಮಳೆ ಸುರಿದಿತ್ತು.