ಕನ್ನಡಕ್ಕೆ ಅಂಬರೀಷ್‌ ಮಾಡಿರುವ ಕೆಲಸ ಗೊತ್ತಲ್ಲಾ: ಸುಮಲತಾ ಅಂಬರೀಷ್‌ ಪರವಾಗಿ ಮತ ಯಾಚಿಸಿದ ಮೋದಿ

ಮೈಸೂರು: ಬಿಜೆಪಿ ಅಭ್ಯರ್ಥಿಗಳ ಪರವಾಗಿ ಮತ ಯಾಚಿಸಿದ ಪ್ರಧಾನಮಂತ್ರಿ ನರೇಂದ್ರ ಮೋದಿ ಈಗ ಬಿಜೆಪಿ ಬೆಂಬಲಿತ ಪಕ್ಷೇತರ ಅಭ್ಯರ್ಥಿ ಪರವಾಗಿಯೂ ಮತ ಕೋರಿದ್ದಾರೆ.

ಮೈಸೂರಿನಲ್ಲಿ ಪಕ್ಷದ ಅಭ್ಯರ್ಥಿಗಳ ಪರವಾಗಿ ಪ್ರಚಾರ ಮಾಡಿದ ಪ್ರಧಾನಿ ನರೇಂದ್ರ ಮೋದಿ, ರೆಬೆಲ್‌ ಸ್ಟಾರ್‌ ಅಂಬರೀಷ್‌, ಸುಮಲತಾ ಹೆಸರು ಪ್ರಸ್ತಾಪಿಸಿ ಅಚ್ಚರಿ ಮೂಡಿಸಿದರು.

ನಿಮ್ಮ ಒಂದು ಮತ ನಮ್ಮ ಜತೆಯಲ್ಲಿರುವವರಿಗೂ ಬಲ ತುಂಬಬೇಕು ಎನ್ನುವ ಮೂಲಕ ಸುಮಲತಾ ಪರ ಬ್ಯಾಟಿಂಗ್ ಮಾಡಿದರು.

ಅಂಬರೀಷ್‌ ಅವರು ಕನ್ನಡಕ್ಕಾಗಿ ಮಾಡಿರುವ ಕೆಲಸ ನಿಮಗೆ ಗೊತ್ತಿದೆಯಲ್ಲಾ? ಅಂಬರೀಷ್‌, ಸುಮಲತಾ ಅವರು ಜತೆಗೂಡಿ ಕನ್ನಡ ಪರವಾಗಿ ಕೆಲಸ ಮಾಡಿದ್ದಾರೆ. ಇಂಥವರ ಪರವಾಗಿ ನಾವು ನಿಲ್ಲಬೇಕು. ನಿಮ್ಮ ಒಂದು ಮತ ನಮ್ಮ ಪರ ನಿಂತಿರುವವರಿಗೆ ಬಲ ತುಂಬಬೇಕು ಎಂದು ಮೋದಿ ಅವರು ಸುಮಲತಾಗೆ ಮತ ನೀಡುವಂತೆ ಕರೆ ನೀಡಿದರು.

ಮೈಸೂರಿನ ಮಹಾರಾಜ ಕಾಲೇಜು ಮೈದಾನದಲ್ಲಿ ಕಿಕ್ಕಿರಿದು ತುಂಬಿದ್ದ ಜನಸ್ತೋಮದ ನಡುವೆ ಭಾಷಣ ಮಾಡಿದ ಸಂದರ್ಭದಲ್ಲಿ ಮೋದಿ ಮೋದಿ ಮೋದಿ ಘೋಷಣೆ ಮೊಳಗಿದವು.

ಅಂಬರೀಷ್‌, ಸುಮಲತಾ ಹೆಸರು ಹೇಳುತ್ತಿದ್ದಂತೆ ಕರತಾಡನ ಮುಗಿಲು ಮುಟ್ಟಿತು.

ಸುಮಲತಾ ಮತ್ತು ಅಂಬರೀಷ್‌ ಅವರು ಕನ್ನಡ ಭಾಷೆ, ಸಂಸ್ಕೃತಿಗೆ ಅಪಾರ ಸೇವೆ ಸಲ್ಲಿಸಿದ್ದಾರೆ. ಕರ್ನಾಟಕದಲ್ಲಿ ಇಂಥವರ ಪ್ರಯತ್ನವನ್ನು ಬೆಂಬಲಿಸಬೇಕಾಗಿದೆ ಎಂದು ಮೋದಿ ತಿಳಿಸಿದರು.