ಸ್ವಾಭಿಮಾನಕ್ಕೆ ಗೆಲುವು ನೀಡಿ ಇತಿಹಾಸ ನಿರ್ಮಿಸಿದ್ದೀರಿ: ಸುಮಲತಾ ಅಂಬರೀಷ್‌

ಮಂಡ್ಯ: ಸಕ್ಕರೆ ನಾಡಿನ ಮಂಡ್ಯದ ಜನರು ಈಗ ಇತಿಹಾಸ ನಿರ್ಮಿಸಿದ್ದಾರೆ. ಕರ್ನಾಟಕದ ಐದು ದಶಕಗಳ ರಾಜಕೀಯ ಇತಿಹಾಸದಲ್ಲಿ ಪಕ್ಷೇತರ ಅಭ್ಯರ್ಥಿಯನ್ನು ಗೆಲ್ಲಿಸಿ ಸಂಸತ್‌ಗೆ ಕಳುಹಿಸಿದ್ದೀರಿ. ಇದಕ್ಕೆ ಎಷ್ಟು ಕೋಟಿ ಧನ್ಯವಾದ ಹೇಳಿದರೂ ಸಾಲದು ಎಂದು ಮಂಡ್ಯ ಲೋಕಸಭಾ ಕ್ಷೇತ್ರದ ಸಂಸದರಾದ ಸುಮಲತಾ ಅಂಬರೀಷ್‌ ಹೇಳಿದರು.

ಲೋಕಸಭೆ ಚುನಾವಣೆಯಲ್ಲಿ ಭರ್ಜರಿ ಜಯ ದಾಖಲಿಸಿದಕ್ಕಾಗಿ ಜನರಿಗೆ ಧನ್ಯವಾದ ಹೇಳಲು ಹಾಗೂ 'ರೆಬಲ್‌ಸ್ಟಾರ್‌' ಅಂಬರೀಷ್‌ ಅವರ ಹುಟ್ಟುಹಬ್ಬದ ದಿನವಾದ ಬುಧವಾರ (ಮೇ 29) ಮಂಡ್ಯದಲ್ಲಿ ಆಯೋಜಿಸಲಾಗಿದ್ದ ಕೃತಜ್ಞತಾ ಸಮಾವೇಶದಲ್ಲಿ ಚಿತ್ರನಟಿ ಸುಮಲತಾ ಅಂಬರೀಷ್‌ ಭಾಷಣ ಮಾಡಿದರು.
ಮೂವತ್ತು ವರ್ಷದ ನಂತರ ಅವರಿಲ್ಲದೆ ಹುಟ್ಟುಹಬ್ಬ ಆಚರಣೆ ಮಾಡುತ್ತಿದ್ದೇವೆ. ಈ ಕಳೆದ ಆರು ತಿಂಗಳಲ್ಲಿ ಏನೆಲ್ಲಾ ನಡೆದಿದೆ ಅಂತಾ ನಿಮಗೆ ಗೊತ್ತು.

ನಾಮಪತ್ರ ಸಲ್ಲಿಸಿದ ನಂತರ ಇತಿಹಾಸ ಸೃಷ್ಟಿಸಿದ್ದು, ಮಂಡ್ಯ ಜನ. ನಾನು ಯಾರೂ ಅಂತಾ ಎಲ್ಲರಿಗೂ ಗೊತ್ತಾಗುವಂತೆ ಮಾಡಿದ್ದು ನೀವೂ. ಲೋಕಾಸಭಾ ಸಂಸದೆಯಾಗಿ ಆಯ್ಜೆ ಮಾಡಿದ್ದು ಮಂಡ್ಯ ಜನ. ಇದು ಅಂಬರೀಶ್ ಅಣ್ಣನ ಗೆಲುವು, ನನ್ನ ಪರವಾಗಿ ಕೆಲಸ ಮಾಡಿದ ಪ್ರತಿಯೊಬ್ಬ ಕಾರ್ಯಕರ್ತನ ಗೆಲುವು. ಆರತಿ ಮಾಡಿದ ಮಹಿಳೆಯರ ಮಂಡ್ಯದ ಸ್ವಾಭಿಮಾನದ ಗೆಲುವು ಇದು. ಇದು ರಾಜ್ಯದ ರೈತಸಂಘ, 27 ಕ್ಷೇತ್ರದಲ್ಲಿ ಅಭ್ಯರ್ಥಿ ಕಣಕ್ಕಿಳಿಸಿದರೂ ಮಂಡ್ಯದಲ್ಲಿ ಕಣಕ್ಕಿಳಿಸದೇ ನನಗೆ ಬೆಂಬಲ ನೀಡಿದ ಬಿಜೆಪಿ ಗೆಲುವು. ನನ್ನ ಗೆಲುವು ಸರ್ವಪಕ್ಷ ಹಾಗೂ ಮಂಡ್ಯ ಜನತೆಗೆ ಸೇರುತ್ತೆ. ಸ್ವಾಭಿಮಾನ ಮುಖ್ಯ ಅನ್ನೋದು ಇಡೀ ಇಂಡಿಯಾಕ್ಕೆ ತೋರಿಸಿದ್ದಾರೆ ಎಂದರು.

200ಕ್ಕೂ ಹೆಚ್ಚು ಪಕ್ಷೇತರ ಅಭ್ಯರ್ಥಿಗಳ ಪೈಕಿ ಇಡೀ ಇಂಡಿಯಾದಲ್ಲಿ ಗೆದ್ದಿರೋದು ಒಬ್ಬರೇ. ಈ ಇತಿಹಾಸ ಕೂಡ ಮಂಡ್ಯದ ಜನರಿಗೆ ಸೇರುತ್ತೆ. ಇಡೀ ದೇಶದ ಗಮನಸೆಳೆದ ಚುನಾವಣೆ ಎಂದರು.

ಪಕ್ಷೇತರ ಅಭ್ಯರ್ಥಿಗೆ ಕಾಂಗ್ರೆಸ್, ಬಿಜೆಪಿ, ರೈತಸಂಘ ಹಾಗೂ ಜೆಡಿಎಸ್ ಬಾವುಟ ಹಾರಾಟವಾಗಿದೆ. ನಮ್ಮ ಪರವಾಗಿ ಪ್ರಚಾರ ಮಾಡಿದವರು ಯಾರೂ ಕೂಡ ಒಂದೇ ಒಂದು ಅಪ ಪ್ರಚಾರದ ಮಾತುಗಳನ್ನು ಆಡಿಲ್ಲ. ಜೆಡಿಎಸ್ ನವರು ಆಡಿರುವ ಮಾತುಗಳಿಗೆ ಜನರು ಉತ್ತರ ಕೊಟ್ಟಿದ್ದಾರೆ ಎಂದು ಸುಮಲತಾ ಅಂಬರೀಷ್‌ ತಿಳಿಸಿದರು.