67 ವರ್ಷಗಳಿಂದ ತಪ್ಪದೇ ಮತದಾನ ಮಾಡುತ್ತಿದ್ದಾರೆ 99 ರ ಈ ಅಜ್ಜಿ

ಕುಂಬ್ರ(ದ.ಕ.): 1920ರ ಆಸುಪಾಸಿನಲ್ಲಿ ಹುಟ್ಟಿದವರು ಶೇಕಮಲೆ ನಿವಾಸಿ ದಿ. ಪೋಕರಜ್ಜ ಅವರ ಪತ್ನಿ ಐಸುಮ್ಮ. ಇವರಿಗೆ ಈಗ 99 ವರ್ಷ.

1952ರಲ್ಲಿ ದೇಶದಲ್ಲಿ ಪ್ರಥಮ ಬಾರಿಗೆ ಮತದಾನವಾಗಿದೆ. ಪ್ರಥಮ ಮತದಾನದ ವೇಳೆ ಐಶುಮ್ಮರಿಗೆ 32 ವರ್ಷ. ಆದರೆ ಅಂದಿನ ರಾಜಕೀಯ ಇತಿಹಾಸಗಳ ಬಗ್ಗೆ ಕೇಳಿದರೆ ಅವರ ನೆನಪುಗಳು ಮಾಸಿ ಹೋಗಿದೆ. ಏನೇ ಕೇಳಿದರೂ ಮಾಜಿ ಪ್ರಧಾನಿ ದಿ. ಇಂದಿರಾ ಗಾಂಧಿಯವರ ಹೆಸರು ಹೇಳುತ್ತಾರೆ. ಇಂದಿರಾ ಗಾಂಧಿ ಅವರ ನೆನಪು ಇನ್ನೂ ಮಾಸಿಲ್ಲ.

ಇವರಲ್ಲಿರುವ ವಿಶೇಷ ಏನೆಂದರೆ, ಅಂದಿನಿಂದ ಇಂದಿನವರೆಗೆ ಗ್ರಾಪಂ, ತಾಪಂ, ಜಿಪಂ, ವಿಧಾನಸಭೆ, ಲೋಕಸಭೆ ಚುನಾವಣೆಗಳಲ್ಲಿ ತಪ್ಪದೇ ಮತ ಚಲಾಯಿಸಿದ್ದಾರೆ. ಇವರಿಗೆ ಇದುವರೆಗೂ ರಾಜಕೀಯ ಅಂದರೆ ಏನೆಂಬುದೇ ಗೊತ್ತಿಲ್ಲ. ಈ ಅಜ್ಜಿಗೆ ಕಿವಿ ಶುದ್ಧವಾಗಿ ಕೇಳುತ್ತದೆ, ಕಣ್ಣು ಮಂಜಾಗಿದೆ, ನಡೆಯಲು ಸಾಧ್ಯವಿಲ್ಲದೇ ಇದ್ದರೂ ಇತರರ ಸಹಾಯದಿಂದ ತನ್ನ ನಿತ್ಯಕರ್ಮವನ್ನು ಮಾಡುತ್ತಾರೆ.

ಈ ಬಾರಿಯ ಲೋಕಸಭೆ ಚುನಾವಣೆಯಲ್ಲೂ ಮತದಾನ ಮಾಡುವುದಾಗಿ ಹೇಳುತ್ತಾರೆ. ಈಗ ಯಾವುದೆಲ್ಲ ಪಕ್ಷ ಗಳ ಅಭ್ಯರ್ಥಿಗಳಿದ್ದಾರೆ ಎಂದು ಕೇಳಿದರೆ ರಾಜಕೀಯ ಗಂಧ ಗಾಳಿಯೇ ಇವರಿಗೆ ಗೊತ್ತಿಲ್ಲ. ಆದರೆ ಇಂದಿರಾ ಗಾಂಧಿಯ ನೆನಪು ಮಾತ್ರ ಅಚ್ಚಳಿಯದೆ ಉಳಿದಿರುವುದು ಇವರ ವಿಶೇಷತೆ.

ಆರೋಗ್ಯವಿದ್ದಾಗ ನಾನೇ ಮತಗಟ್ಟೆಗೆ ಹೋಗಿ ಮತದಾನ ಮಾಡಿಬರುತ್ತಿದ್ದೆ. ಕಳೆದ 20 ವರ್ಷಗಳಿಂದ ನಡೆಯಲು ಆಗುತ್ತಿಲ್ಲ, ಕಣ್ಣು ಕಾಣುವುದಿಲ್ಲ . ಮತ ಹಾಕಲು ಮನಸ್ಸಿಲ್ಲ. ಆದರೂ ನನ್ನ ಮೊಮ್ಮಗ ನನ್ನನ್ನು ಕರೆದುಕೊಂಡು ಹೋಗಿ ಮತ ಹಾಕಿಸುತ್ತಾನೆ. ಯಾರಿಗೆ ಮತ ಹಾಕಿದ್ದೇನೆ ಎಂಬುದು ನನಗೆ ಗೊತ್ತಿಲ್ಲ. ಜಗತ್ತನ್ನೇ ಕಾಣದ ನನ್ನ ಓಟನ್ನು ಯಾರಿಗೆ ಒತ್ತಿದರೇನು -ಐಶುಮ್ಮ, ಮುತ್ತಜ್ಜಿ