1995ರಲ್ಲಿ‌ ಗೌಡ ಪ್ರಧಾನಿ ಎಂದ‌ ಸಿಎಂಗೆ ನೆಟ್ಟಿಗರ ಪಾಠ

ಬೆಂಗಳೂರು: 'ನನ್ನ ತಂದೆ (ಎಚ್‌.ಡಿ. ದೇವೇಗೌಡ) 1995ರಲ್ಲಿ ಪ್ರಧಾನಿಯಾಗಿದ್ದ 10 ತಿಂಗಳ ಅವಧಿಯಲ್ಲಿ ದೇಶದಲ್ಲಿ ಯಾವುದೇ ಭಯೋತ್ಪಾದಕ ಚಟುವಟಿಕೆಗಳೂ ನಡೆದಿದ್ದವೆ? ಭಾರತ-ಪಾಕ್ ಗಡಿಯಲ್ಲಿ ಏನಾದರೂ ಉಗ್ರಗಾಮಿ ಚಟುವಟಿಕೆಗಳು ನಡೆದಿದ್ದವೆ? ನನ್ನ ತಂದೆ ಪ್ರಧಾನಿಯಾಗಿದ್ದಾಗ ಇಡೀ ದೇಶದಲ್ಲಿ ಶಾಂತಿ ನೆಲೆಸಿತ್ತು' ಎಂದು ಮುಖ್ಯಮಂತ್ರಿ ಎಚ್.ಡಿ ಕುಮಾರಸ್ವಾಮಿ ಟ್ವೀಟ್‌ ಮಾಡಿರುವುದು ವ್ಯಾಪಕ ಟ್ರೋಲ್‌ಗೆ ಗುರಿಯಾಗಿದೆ.


ಟ್ಟಿಟರ್ ಬಳಕೆದಾರರು ಕುಮಾರಸ್ವಾಮಿ ಹೇಳಿಕೆಯನ್ನು ಪ್ರಶ್ನಿಸಿದ್ದು, 1995ರಲ್ಲಿ ನಿಮ್ಮ ತಂದೆ ಪ್ರಧಾನಿಯೇ ಆಗಿರಲಿಲ್ಲ. ಗೌಡರು ಪ್ರಧಾನಿಯಾಗಿದ್ದು 1996 ಜೂನ್‌ನಿಂದ 1997 ಏಪ್ರಿಲ್ ವರೆಗೆ. ಇದೂ ಸಹ ನಿಮಗೆ ತಿಳಿದಿಲ್ಲವೆ? ಎಂದು ಕಾಲೆಳೆದಿದ್ದಾರೆ.


ಅಲ್ಲದೆ, 1996ರ ಡಿಸೆಂಬರ್ 30ರಂದು ಬ್ರಹ್ಮಪುತ್ರಾ ರೈಲು ಬಾಂಬ್ ಸ್ಫೋಟದಲ್ಲಿ 30ಕ್ಕೂ ಅಧಿಕ ಮದಿ ಮೃತಪಟ್ಟಿದ್ದರು. 1997ರ ಮಾರ್ಚ್‌ನಲ್ಲೂ ಬಡ್ಗಾಂವ್‌ನಲ್ಲಿ ಉಗ್ರರ ದಾಳಿಗೆ 7 ಮಂದಿ ಬಲಿಯಾಗಿದ್ದರು ಎಂದು ಉಲ್ಲೇಖಿಸಿ ಗಮನ ಸೆಳೆದಿದ್ದಾರೆ.

ಮತ್ತೊಬ್ಬರು ಟ್ವಿಟರ್‌ ಬಳಕೆದಾರರು ವಿಕಿಪೀಡಿಯಾ ಪುಟದಿಂದ ಎಚ್‌.ಡಿ ದೇವೇಗೌಡರ ಮಾಹಿತಿಯನ್ನು ಉಲ್ಲೇಖಿಸಿ, ದೇವೇಗೌಡರು ದೇಶದ 11ನೇ ಪ್ರಧಾನಿಯಾಗಿ 1996ರ ಜೂನ್ 1ರಿಂದ 1997ರ ಏಪ್ರಿಲ್ 21ರ ವರೆಗೆ ಅಧಿಕಾರದಲ್ಲಿದ್ದರು ಎಂಬ ಅಂಶವನ್ನು ಹೈಲೈಟ್ ಮಾಡಿದ್ದಾರೆ.

ತಾವು ಎಂದಾದರೂ ಪ್ರಧಾನಿಯಾಗಿದ್ದೆ ಎಂಬಂತೆ ಅವರ ತಂದೆ (ಗೌಡರು) ನಡೆದುಕೊಂಡಿದ್ದಾರೆಯೆ? ಎಂದು ಅನುಜ್ ಶರ್ಮಾ ಮತ್ತೊಬ್ಬ ಟ್ವೀಟಿಗ ಪ್ರಶ್ನಿಸಿದ್ದಾರೆ.


ಅವರ ತಂದೆ ಈಗಲೂ ಆ ವಿಷಯ ತಿಳಿದಿಲ್ಲ; ಸ್ವತಃ ಕುಮಾರಸ್ವಾಮಿಗೂ ತಾವು ಮುಖ್ಯಮಂತ್ರಿ ಎಂಬುದು ತಿಳಿದಂತಿಲ್ಲ ಎಂದು ಅಲೋಕ್ ತ್ರಿಪಾಠಿ ಎಂಬವರು ಕಾಲೆಳೆದಿದ್ದಾರೆ.