ಜೆಡಿಎಸ್‌ನವರಿಗೆ 'ನಾಳೆ ಬಾ' ಎನ್ನಿ: ಯಶ್‌

ಕೆ.ಆರ್‌.ಪೇಟೆ: ಮತ ಕೇಳಲು ನಿಮ್ಮೆದುರು ಬರುವ ಜೆಡಿಎಸ್‌ನವರಿಗೆ 'ನಾಳೆ ಬಾ' ಎಂದು ಬೋರ್ಡ್‌ ಹಾಕಿ ಎಂದು ಚಿತ್ರನಟ ಯಶ್‌ ಅವರು ಅಭಿಮಾನಿಗಳಿಗೆ ಸಲಹೆ ನೀಡಿದರು.

ಕೆ.ಆರ್‌.ಪೇಟೆ ಟೌನ್‌ನ ಹಾಸ್ಟೆಲ್‌ ಬಿಲ್ಡಿಂಗ್‌ ವೃತ್ತದಲ್ಲಿ ಭಾನುವಾರ ರಾತ್ರಿ ರೋಡ್‌ ಶೋ ನಡೆಸಿ ಪಕ್ಷೇತರ ಅಭ್ಯರ್ಥಿ ಸುಮಲತಾ ಅಂಬರೀಷ್‌ ಪರ ಪ್ರಚಾರ ನಡೆಸಿದ ಅವರು ಮಾತನಾಡಿ, ''ಲೋಕಸಭಾ ವ್ಯಾಪ್ತಿಯ 8 ಕ್ಷೇತ್ರಗಳಲ್ಲಿ ಈಗಾಗಲೇ ಜೆಡಿಎಸ್‌ ಅನ್ನು ಗೆಲ್ಲಿಸಿ ಆಗಿದೆ. ಮೊದಲು ಅದಕ್ಕೆ ಕೂಲಿ ಕೇಳಿ. ಕೂಲಿ ಸಂದಾಯವಾದ ಬಳಿಕ ಅವರು ಬರಲಿ. ಅದಕ್ಕಾಗಿ 'ನಾಳೆ ಬಾ' ಎಂದು ಬೋರ್ಡ್‌ ಹಾಕಿಕೊಳ್ಳಿ,''ಎಂದು ಹೇಳಿದರು.

''ಏ.18ರ ನಂತರ ಸುಮಲತಾ ಅವರು ಮಂಡ್ಯ ಬಿಟ್ಟು ಓಡಿ ಹೋಗಲಿದ್ದಾರೆ ಎಂದು ಅಪಪ್ರಚಾರ ಮಾಡಲಾಗುತ್ತಿದೆ. ಅವರು ಓಡಿ ಹೋಗಲು ಬಂದಿಲ್ಲ. ದುರಹಂಕಾರ, ದರ್ಪದಿಂದ ಮೆರೆಯುವವರನ್ನು ಓಡಿಸಲು ಬಂದಿದ್ದಾರೆ. ಚುನಾವಣೆ ವೇಳೆ ಜೆಡಿಎಸ್‌ನವರು ಬೇಕೆಂದೇ ನಮ್ಮ ಅಭಿಮಾನಿಗಳು ಉದ್ವೇಗಕ್ಕೊಳಗಾಗುವಂಥ ಮಾತುಗಳನ್ನು ಮಾಡುತ್ತಿದ್ದಾರೆ. ಅವರ ಮಾತುಗಳಿಗೆ ಉದ್ವೇಕಕ್ಕೊಳಗಾಗಬೇಡಿ. ನೀವು ಪ್ರೀತಿಯಿಂದ ಸುಮಲತಾ ಪರವಾಗಿ ಮತ ಕೇಳಿ. ನಾವು ಇಲ್ಲೇ ಇರ್ತೀವಿ ಅಣ್ತಮ್ಮ''ಎಂದರು.