ತಮಿಳ್ನಾಡಲ್ಲಿ ಪಕ್ಷದ ಕಾರ್ಯಕರ್ತರಿಗೆ ಕೋಟಿ ರೂ. ಬಹುಮಾನ, ವಿದೇಶ ಪ್ರವಾಸದ ಆಫರ್

ಚೆನ್ನೈ: ರಾಷ್ಟ್ರರಾಜಕಾರಣದಲ್ಲಿ ತಮಿಳುನಾಡಿನ ರಾಜಕೀಯ ಜಿದ್ದಾಜಿದ್ದಿ ಹಲವು ವಿಶೇಷತೆಗಳಿಗೆ ಕಾರಣವಾಗುತ್ತದೆ. ತಮ್ಮನ್ನು ಗೆಲ್ಲಿಸುವ ಕಾರ್ಯಕರ್ತರಿಗೆ ವಿಶೇಷ ಬಹುಮಾನಗಳನ್ನು ಘೋಷಿಸುವ ಮೂಲಕ ಸದ್ದು ಮಾಡುತ್ತಿದ್ದಾರೆ.

ಪಕ್ಷದ ನಿಷ್ಠಾವಂತ ಕಾರ್ಯಕರ್ತರಿಗೆ ಚಿನ್ನದ ಚೈನುಗಳು, ಉಂಗುರಗಳು ಮತ್ತು ಮೋಟಾರ್‌ ಬೈಕ್‌, ವಿದೇಶಿ ಪ್ರವಾಸ ಹೀಗೆ ಅನೇಕ ಆಫರ್‌ಗಳನ್ನು ರಾಜಕೀಯ ಮುಖಂಡರು ಹರಿಯಬಿಟ್ಟಿದ್ದಾರೆ. ತಮ್ಮನ್ನು ಗೆಲ್ಲಿಸಲು ಕಠಿಣ ಶ್ರಮ ವಹಿಸುವ ಕಾರ್ಯಕರ್ತರಿಗೆ ಭಾರಿ ಮೊತ್ತದ ಬಹುಮಾನಗಳನ್ನು ಘೋಷಿಸುವ ಮೂಲಕ ತಮ್ಮ ಪರ ಮತ್ತಷ್ಟು ಹುರುಪಿನಿಂದ ಕೆಲಸ ಮಾಡಿಸಲು ದಾರಿ ಕಂಡುಕೊಂಡಿದ್ದಾರೆ.

ಮಾಜಿ ಕೇಂದ್ರ ಸಚಿವ ಮತ್ತು ಡಿಎಂಕೆ ಅಭ್ಯರ್ಥಿ ಜಗತ್‌ರಕ್ಷಕನ್‌ 1 ಕೋಟಿ ರೂ. ಬಹುಮಾನ ಘೋಷಿಸುವ ಮೂಲಕ ಹುಬ್ಬೇರುವಂತೆ ಮಾಡಿದ್ದಾರೆ. ತಾವು ಪ್ರತಿನಿಧಿಸುತ್ತಿರುವ ಅರಕ್ಕೊಣಂ ಕ್ಷೇತ್ರದಲ್ಲಿ ಭಾರಿ ಬಹುಮತದಿಂದ ಗೆಲ್ಲಿಸುವಲ್ಲಿ ಕಠಿಣ ಶ್ರಮ ವಹಿಸುವ ಕಾರ್ಯಕರ್ತನಿಗೆ 1 ಕೋಟಿ ರೂ. ಬಹುಮಾನ ನೀಡುವುದಾಗಿ ಘೋಷಿಸಿದ್ದಾರೆ.

ವೆಲ್ಲೂರಿನ ಎಐಎಡಿಎಂಕೆ ಅಭ್ಯರ್ಥಿ ಎಸಿ ಶಣ್ಮಗಮ್‌ ಪಕ್ಷದ ಕಾರ್ಯಕರ್ತರಿಗೆ 6 ಬುಲೆಟ್‌ಗಳು ಮತ್ತು ದೇಶ-ವಿದೇಶ ಪ್ರವಾಸದ ಆಫರ್‌ ನೀಡಿದ್ದಾರೆ. ವೆಲ್ಲೂರಿನ ಡಿಎಂಕೆ ಅಭ್ಯರ್ಥಿ ಕದಿರ್‌ ಆನಂದ್‌ ತಮ್ಮನ್ನು ಗೆಲ್ಲಿಸಲು ಕಠಿಣ ಶ್ರಮ ವಹಿಸುವ ಕಾರ್ಯಕರ್ತರಿಗೆ 50 ಲಕ್ಷ ರೂ. ನೀಡುವುದಾಗಿ ಘೋಷಿಸಿದ್ದಾರೆ.