ಹಾಲಿ ಲೋಕಸಭಾ ಸದಸ್ಯರ ಪೈಕಿ 430 ಮಂದಿ ಕೋಟ್ಯಧೀಶರು!

ಹೊಸದಿಲ್ಲಿ: ಹಾಲಿ ಲೋಕಸಭೆಯ 521 ಸದಸ್ಯರ ಪೈಕಿ ಶೇ.83ರಷ್ಟು ಮಂದಿ ಕೋಟ್ಯಧಿಪತಿಗಳು ಹಾಗೂ ಶೇ.33ರಷ್ಟು ಸಂಸದರ ವಿರುದ್ಧ ಕ್ರಿಮಿನಲ್‌ ಪ್ರಕರಣಗಳು ದಾಖಲಾಗಿವೆ.

2014ರ ಲೋಕಸಭೆ ಚುನಾವಣೆಯಲ್ಲಿ ಆಯ್ಕೆಯಾದ 543 ಸದಸ್ಯರ ಪೈಕಿ 521 ಮಂದಿ ಸಲ್ಲಿಸಿರುವ ಸ್ವಯಂ ಘೋಷಣೆ ಅಫಿಡವಿಟ್‌ಗಳ ಅಧ್ಯಯನ ನಡೆಸಿ, ವಿವರಗಳನ್ನು ವಿಂಗಡಿಸಿದ 'ಅಸೋಸಿಯೇಷನ್‌ ಫಾರ್‌ ಡೆಮಾಕ್ರಟಿಕ್‌ ರಿಫಾರ್ಮ್ಸ್‌' (ಎಡಿಆರ್‌) ಮಾಹಿತಿ ಬಹಿರಂಗ ಪಡಿಸಿದೆ.

ಹಾಲಿ 521 ಸಂಸದರ ಪೈಕಿ 430 ಮಂದಿ ಕೋಟ್ಯಧೀಶರು. ಇವರಲ್ಲಿ ಬಿಜೆಪಿಯ 227, ಕಾಂಗ್ರೆಸ್‌ನ 37, ಎಐಎಡಿಎಂಕೆಯ 29 ಸಂಸದರು ಸೇರಿದ್ದಾರೆ. 32 ಸಂಸದರು ತಲಾ 50 ಕೋಟಿ ರೂಪಾಯಿಗೂ ಹೆಚ್ಚಿನ ಆಸ್ತಿ ಘೋಷಣೆ ಮಾಡಿದ್ದಾರೆ. ಇಬ್ಬರು ಮಾತ್ರ 5 ಕೋಟಿ ರೂಪಾಯಿಗಿಂತಲೂ ಕಡಿಮೆ ಸ್ವತ್ತು ಇರುವುದಾಗಿ ತಿಳಿಸಿದ್ದಾರೆ. ಹಾಲಿ ಸಂಸದರ ಸರಾಸರಿ ಸಂಪತ್ತಿನ ಪ್ರಮಾಣ 14.72 ಕೋಟಿ ರೂ.ಗಳು.

ಶೇ.33 ಸಂಸದರ ವಿರುದ್ಧ ಕ್ರಿಮಿನಲ್‌ ಕೇಸ್‌ಗಳಿವೆ. ಈ ಪೈಕಿ 106 ಮಂದಿ ವಿರುದ್ಧ ಗಂಭೀರ ಅಪರಾಧ ಪ್ರಕರಣಗಳಿವೆ. 10 ಮಂದಿ ವಿರುದ್ಧ ಕೊಲೆ ಕೇಸ್‌ ದಾಖಲಾಗಿದ್ದು, ಅವರಲ್ಲಿ ನಾಲ್ವರು ಬಿಜೆಪಿಗೆ ಸೇರಿದವರು. ಕಾಂಗ್ರೆಸ್‌, ಎನ್‌ಸಿಪಿ, ಎಲ್‌ಜೆಪಿ, ಆರ್‌ಜೆಡಿ, ಶಿವಸೇನೆ, ಸ್ವಾಭಿಮಾನಿ ಪಕ್ಷದ ತಲಾ ಒಬ್ಬರು ಹಾಗೂ ಒಬ್ಬ ಪಕ್ಷೇತರ ಸಂಸದರ ವಿರುದ್ಧ ಕೊಲೆ ಪ್ರಕರಣ ದಾಖಲಾಗಿದೆ ಎಂದೂ ವರದಿ ತಿಳಿಸಿದೆ.