ಬಿಎಸ್ಪಿ ಬ್ಯಾಂಕ್ ಬ್ಯಾಲೆನ್ಸ್‌ 670 ಕೋಟಿ ರೂ, ಎಲ್ಲಕ್ಕಿಂತ ಮುಂದೆ

ಹೊಸದಿಲ್ಲಿ: ದೇಶದ ರಾಜಕೀಯ ಪಕ್ಷಗಳಲ್ಲೇ ಅತಿ ಹೆಚ್ಚು ಬ್ಯಾಂಕ್ ಬ್ಯಾಲೆನ್ಸ್ ಇಟ್ಟುಕೊಂಡಿರುವ ಪಕ್ಷವೆಂದರೆ ಮಾಯಾವತಿ ಅವರ ಬಹುಜನ ಸಮಾಜ ಪಕ್ಷ. ಅಧಿಕೃತ ದಾಖಲೆಗಳ ಪ್ರಕಾರವೇ ಬಿಎಸ್ಪಿ ಬ್ಯಾಂಕ್ ಖಾತೆಗಳಲ್ಲಿ 650 ಕೋಟಿ ರೂ ಹಣವಿದೆ.

ಫೆಬ್ರವರಿ 25ರಂದು ಚುನಾವಣೆ ಆಯೋಗಕ್ಕೆ ಬಿಎಸ್ಪಿ ಸಲ್ಲಿಸಿದ್ದ ಹಣಕಾಸಿನ ದಾಖಲೆಗಳಲ್ಲಿ ಈ ಮಾಹಿತಿಯಿದೆ. ದಿಲ್ಲಿಯ ರಾಷ್ಟ್ರೀಯ ರಾಜಧಾನಿ ಪ್ರದೇಶದಲ್ಲಿ ಸಾರ್ವಜನಿಕ ವಲಯದ ಬ್ಯಾಂಕುಗಳ ನಾನಾ ಶಾಖೆಗಳಲ್ಲಿ 8 ಖಾತೆಗಳಿದ್ದು, ಅವುಗಳಲ್ಲಿ ಒಟ್ಟಾಗಿ 669 ಕೋಟಿ ರೂ.ಗಳನ್ನು ಬಿಎಸ್ಪಿ ಜಮೆ ಮಾಡಿದೆ.

2014ರ ಲೋಕಸಭಾ ಚುನಾವಣೆಯಲ್ಲಿ ಶೂನ್ಯ ಸಾಧನೆ ಮಾಡಿದ್ದ ಬಿಎಸ್ಪಿ, 95.54 ಲಕ್ಷ ರೂ ನಗದು ಹಣ ಕೈಯ್ಯಲ್ಲಿ ಇಟ್ಟುಕೊಂಡಿರುವುದಾಗಿ ಘೋಷಿಸಿದೆ.

ಪಕ್ಷಗಳ ಕೇಂದ್ರೀಯ ನಿಧಿಗಳ ವೆಚ್ಚದ ವರದಿಯಲ್ಲಿ ಈ ಮಾಹಿತಿ ಲಭ್ಯವಿದೆ. ಸಮಾಜವಾದಿ ಪಕ್ಷ ಎರಡನೇ ಸ್ಥಾನದಲ್ಲಿದ್ದು, ಬ್ಯಾಂಕ್ ಖಾತೆಗಳಲ್ಲಿ 471 ಕೋಟಿ ರೂ.ಗಳ ಠೇವಣಿ ಹೊಂದಿದೆ. ಮಧ್ಯಪ್ರದೇಶ, ಛತ್ತೀಸ್‌ಗಢ, ರಾಜಸ್ಥಾನ ಮತ್ತು ತೆಲಂಗಾಣದ ವಿಧಾನಸಭೆ ಚುನಾವಣೆ ಬಳಿಕ ಪಕ್ಷದ ಖಾತೆಗೆ ಜಮೆಯಾದ ಹಣದಲ್ಲಿ ತುಸು ಇಳಿಕೆಯಾಗಿದೆ. (11 ಕೋಟಿ ರೂ).

ಬ್ಯಾಂಕ್ ಬ್ಯಾಲೆನ್ಸ್ ವಿಚಾರದಲ್ಲಿ ಮೂರನೇ ಅತಿದೊಡ್ಡ ಪಕ್ಷ ಕಾಂಗ್ರೆಸ್. ಅದು 196 ಕೋಟಿ ರೂ.ಗಳ ಬ್ಯಾಲೆನ್ಸ್ ಹೊಂದಿದೆ. ಕಳೆದ ವರ್ಷ ನವೆಂಬರ್ 2ರಂದು, ಕರ್ನಾಟಕ ವಿಧಾನಸಭೆ ಚುನಾವಣೆ ಬಳಿಕ ಕಾಂಗ್ರೆಸ್ ಚುನಾವಣೆ ಆಯೋಗಕ್ಕೆ ಸಲ್ಲಿಸಿದ್ದ ದಾಖಲೆಗಳಲ್ಲಿ ಈ ಮಾಹಿತಿ ಲಭ್ಯವಿದೆ.

ಮಧ್ಯಪ್ರದೇಶ, ರಾಜಸ್ಥಾನ ಮತ್ತು ಛತ್ತೀಸ್‌ಗಢದಲ್ಲಿ ಕಾಂಗ್ರೆಸ್ ಅಧಿಕಾರಕ್ಕೆ ಬಂದ ಬಳಿಕ ಹೊಸ ದಾಖಲೆಗಳನ್ನು ಈ ವರೆಗೆ ಸಲ್ಲಿಸಿಲ್ಲ.

ಇನ್ನೊಂದು ಪ್ರಾದೇಶಿಕ ಪಕ್ಷ ತೆಲುಗುದೇಶಂ (ಟಿಡಿಪಿ) 107 ಕೋಟಿ ರೂ.ಗಳ ಬ್ಯಾಂಕ್ ಬ್ಯಾಲೆನ್ಸ್ ಹೊಂದಿದೆ.

ಕೇಂದ್ರದಲ್ಲಿ ಆಡಳಿತ ನಡೆಸುತ್ತಿರುವ ಬಿಜೆಪಿ 82 ಕೋಟಿ ರೂ.ಗಳ ಬ್ಯಾಂಕ್ ಬ್ಯಾಲೆನ್ಸ್ ಹೊಂದಿದ್ದು, ಐದನೇ ಸ್ಥಾನದಲ್ಲಿದೆ.

ಬ್ಯಾಂಕ್ ಬ್ಯಾಲೆನ್ಸ್ ಲೆಕ್ಕಾಚಾರದಲ್ಲಿ ಬಿಜೆಪಿಯ ಮೊತ್ತ ಅತಿ ಕಡಿಮೆಯಿದೆ. ಆದರೆ ಚುನಾವಣೆ ಬಾಂಡ್‌ಗಳ ಮೂಲಕ ದೇಣಿಗೆ ಸಂಗ್ರಹಣೆಯಲ್ಲಿ ಬಿಜೆಪಿ ಎಲ್ಲಕ್ಕಿಂತ ಮುಂದಿದೆ. 2017-18ನೇ ಸಾಲಿನಲ್ಲಿ ಬಿಜೆಪಿ ಒಟ್ಟು 758 ಕೋಟಿ ರೂ ಖರ್ಚು ಮಾಡಿದ್ದು, ಬಾಂಡ್‌ಗಳ ರೂಪದಲ್ಲಿ 1,027 ಕೋಟಿ ರೂ. ದೇಣಿಗೆ ಸಂಗ್ರಹಿಸಿದೆ.

ಪಕ್ಷಗಳಿಗೆ ದೇಣಿಗೆಗಳೇ ಪ್ರಧಾನ ಆದಾಯ ಮೂಲ:
ನಾಲ್ಕು ರಾಜ್ಯಗಳ ಚುನಾವಣೆ ವೇಳೆ ನವೆಂಬರ್- ಡಿಸೆಂಬರ್‌ನಲ್ಲಿ ಸಮಾಜವಾದಿ ಪಕ್ಷದ ಬ್ಯಾಂಕ್ ಬ್ಯಾಲೆನ್ಸ್ 11 ಕೋಟಿ ರೂ.ಗಳಷ್ಟು ಕುಸಿದಿದೆ. ಆದರೆ ತದ್ವಿರುದ್ಧವಾಗಿ ಬಿಎಸ್ಪಿ 24 ಕೋಟಿ ರೂ.ಗಳನ್ನು ಸಂಗ್ರಹಿಸಿದೆ. ಹೀಗಾಗಿ ಬಿಎಸ್ಪಿ ಬ್ಯಾಂಕ್ ಬ್ಯಾಲೆನ್ಸ್ 665 ಕೋಟಿ ರೂ.ಗಳಿಂದ 670 ಕೋಟಿಗಳಿಗೇರಿದೆ.

ಈ ಪಕ್ಷಗಳ ಆದಾಯ ತೆರಿಗೆ ರಿಟರ್ನ್ಸ್‌ ವಿಶ್ಲೇಷಣೆ ಪ್ರಕಾರ, 2016-17ರಲ್ಲಿ 1,034 ಕೋಟಿ ರೂ ಹಾಗೂ 2017-18ರಲ್ಲಿ 1,027 ಕೋಟಿ ರೂ ಆದಾಯ ತೋರಿಸುವ ಮೂಲಕ ಬಿಜೆಪಿ ಅತಿದೊಡ್ಡ ಪಕ್ಷವಾಗಿ ಹೊರಹೊಮ್ಮಿದೆ.

ಅದೇ ಅವಧಿಯಲ್ಲಿ ಬಿಎಸ್ಪಿ ಆದಾಯ 172 ಕೋಟಿ ರೂ.ಗಳಿಂದ 52 ಕೋಟಿ ರೂ.ಗಳಿಗೆ ಕುಸಿದಿದೆ. ಕಾಂಗ್ರೆಸ್ ಆದಾಯ 2016-17ರಲ್ಲಿ 225 ಕೋಟಿ ರೂ ಆಗಿತ್ತು. ನಂತರದ ವಿತ್ತ ವರ್ಷಗಳಲ್ಲಿ ಕಾಂಗ್ರೆಸ್ ತನ್ನ ಆದಾಯವನ್ನು ಆಯೋಗದ ಮುಂದೆ ಘೋಷಿಸಿಲ್ಲ.

ಸಿಪಿಎಂ ಕಳೆದ ಕೆಲವು ವರ್ಷಗಳ ಹಿಂದಿನ ವರೆಗೂ ಪ್ರತಿ ವರ್ಷ ಸರಾಸರಿ 100 ಕೋಟಿ ರೂ ಆದಾಯ ಪಡೆಯುತ್ತಿತ್ತು. ಈ ಪಕ್ಷಗಳ ಆದಾಯದ ಶೇ 87ರಷ್ಟು ಭಾಗವೂ ದೇಣಿಗೆಗಳಿಂದಲೇ ಬರುತ್ತಿದೆ.

ಚುನಾವಣೆ ಬಾಂಡ್‌ಗಳ ಮೂಲಕ 2017-18ರಲ್ಲಿ ಬಿಜೆಪಿ 210 ಕೋಟಿ ರೂ.ಗಳ ದೇಣಿಗೆ ಪಡೆದಿದೆ.