ನಾಳೆ ಅಮಿತ್‌ ಶಾ ರೋಡ್‌ ಶೋ

ಬೆಂಗಳೂರು : ಬಿಜೆಪಿ ರಾಷ್ಟ್ರೀಯ ಅಧ್ಯಕ್ಷ ಅಮಿತ್‌ ಶಾ ಏಪ್ರಿಲ್‌ 2ರಂದು ರಾಜ್ಯದಲ್ಲಿ ಚುನಾವಣಾ ಪ್ರಚಾರ ಕೈಗೊಳ್ಳಲಿದ್ದಾರೆ.

ಮಾಜಿ ಡಿಸಿಎಂ ಆರ್‌.ಅಶೋಕ್‌ ಈ ವಿಚಾರ ತಿಳಿಸಿದ್ದು, ''ಅಂದು ಸಂಜೆ 6 ಗಂಟೆಗೆ ಬೆಂಗಳೂರಿನ ಬನಶಂಕರಿ ದೇಗುಲದ ಬಳಿ ರೋಡ್‌ ಶೋ ನಡೆಯಲಿದೆ. 10 ಸಾವಿರಕ್ಕೂ ಹೆಚ್ಚು ಜನರು ಭಾಗಿಯಾಗಲಿದ್ದಾರೆ,'' ಎಂದು ಹೇಳಿದರು.

ರಾಹುಲ್‌ ಗಾಂಧಿ ಪುನಃ ಸುಳ್ಳಿನ ಸರದಾರರೆಂದು ಸಾಬೀತು ಮಾಡಿದ್ದಾರೆ. ಅವರ ಬಳಿ ಹೊಸ ವಿಚಾರವಿಲ್ಲ. ನೀರವ್‌ ಮೋದಿ ಮತ್ತು ಇತರರಿಗೆ ಸಾಲ ಕೊಟ್ಟಿದ್ದು ಯುಪಿಎ ಕಾಲದಲ್ಲಿ. ಅಂಥವರ ವಿರುದ್ಧ ಕ್ರಮ ಕೈಗೊಳ್ಳುವ ಕೆಲಸವನ್ನು ಮೋದಿ ಸರಕಾರ ಮಾಡುತ್ತಿದೆ. ರಾಫೇಲ್‌ ಡೀಲ್‌ನಲ್ಲಿ ತಪ್ಪಾಗಿಲ್ಲವೆಂದು ಸಿಎಜಿ ವರದಿಯಲ್ಲಿ ಬಂದಿದೆ. ಕಾಂಗ್ರೆಸ್‌ಗೆ ಸಂವಿಧಾನಬದ್ಧ ಸಂಸ್ಥೆಗಳ ಮೇಲೆ ಗೌರವವಿಲ್ಲ. ರೈತರ ಸಾಲ ಮನ್ನಾ ವಿಚಾರದಲ್ಲಿ ರಾಹುಲ್‌ ಅವರಿಗೆ ಮಾಹಿತಿ ಇದ್ದಂತಿಲ್ಲ. ಯಾರೋ ಬರೆದುಕೊಟ್ಟ ಭಾಷಣ ಓದಿದಂತಿದೆ. ಯಡಿಯೂರಪ್ಪ ಡೈರಿ ಬಗ್ಗೆ ಸುಮ್ಮನೇ ಆರೋಪ ಮಾಡಿದ್ದಾರೆ. ಇದು ನಕಲಿಯೆಂದು ಐಟಿ ಇಲಾಖೆ ಹೇಳಿದೆ. ಕಾಂಗ್ರೆಸ್‌ಗೆ ಗಾಂಭೀರ್ಯವಿದ್ದರೆ ಕಾನೂನು ಹೋರಾಟ ಮಾಡಬೇಕಿತ್ತು ಎಂದು ಮಾಜಿ ಡಿಸಿಎಂ ಆರ್‌.ಅಶೋಕ್‌ ಸವಾಲು ಹಾಕಿದ್ದಾರೆ.