ಎನ್‌ಕೌಂಟರ್‌ನಲ್ಲಿ ದೀದಿ ಬಿಜೆಪಿ ಅಭ್ಯರ್ಥಿಯನ್ನು ಹತ್ಯೆ ಮಾಡಿಸಬಲ್ಲರು: ಕೈಲಾಶ್‌ ವಿಜಯ್‌ವರ್ಗಿಯಾ

ಕೋಲ್ಕೊತಾ : ಬೈರಕಪುರದಲ್ಲಿ ಬಿಜೆಪಿಯಿಂದ ಲೋಕಸಭಾ ಚುನಾವಣೆಗೆ ಸ್ಪರ್ಧಿಸಿರುವ ಅರ್ಜುನ್‌ ಸಿಂಗ್‌ ಅವರನ್ನು ಪಶ್ಚಿಮ ಬಂಗಾಳ ಸಿಎಂ ಮಮತಾ ಬ್ಯಾನರ್ಜಿ ಪೊಲೀಸ್‌ ಎನ್‌ಕೌಂಟರ್‌ನಲ್ಲಿ ಹತ್ಯೆ ಮಾಡಿಸಬಲ್ಲರು ಎಂದು ಬಿಜೆಪಿಯ ಹಿರಿಯ ನಾಯಕ ಕೈಲಾಶ್‌ ವಿಜಯ್‌ವರ್ಗಿಯಾ ಆತಂಕ ವ್ಯಕ್ತಪಡಿಸಿದ್ದಾರೆ.

ಟ್ವಿಟ್ಟರ್‌ನಲ್ಲಿ ಮಮತಾ ವಿರುದ್ಧ ಹರಿಹಾಯ್ದ ಬಂಗಾಳದಲ್ಲಿ ಬಿಜೆಪಿ ಉಸ್ತುವಾರಿ ಹೊತ್ತಿರುವ ಕೈಲಾಶ್‌, ಈಗಾಗಲೇ ಬೈರಕಪುರ ವ್ಯಾಪ್ತಿಯ ಪೊಲೀಸ್‌ ಆಯುಕ್ತರಿಗೆ ಅರ್ಜುನ್‌ ಸಿಂಗ್‌ ಅವರನ್ನು ಬಂಧಿಸುವಂತೆ ಮಮತಾ ಸೂಚನೆ ಕೊಟ್ಟಿದ್ದಾರೆ. ಬಳಿಕ ಎನ್‌ಕೌಂಟರ್‌ ನಡೆದರೂ ಅಚ್ಚರಿಯಿಲ್ಲ ಎಂದಿದ್ದಾರೆ.

ಅರ್ಜುನ್‌ ಸಿಂಗ್‌ ಅವರಿಗೆ ಏನೇ ಆದರೂ ಅದಕ್ಕೆ ಮಮತಾ ನೇರ ಹೊಣೆಯಾಗುತ್ತಾರೆ ಎಂದು ಕೈಲಾಶ್‌ ಆರೋಪಿಸಿದ್ದಾರೆ.

ನಾಲ್ಕು ಬಾರಿ ಟಿಎಂಸಿಯಿಂದ ಶಾಸಕರಾಗಿ ಆಯ್ಕೆಯಾಗಿದ್ದ ಅರ್ಜುನ್‌ ಮಾರ್ಚ್‌ನಲ್ಲಿ ಬಿಜೆಪಿ ಸೇರ್ಪಡೆಯಾದರು. ಟಿಎಂಸಿ ಹಿರಿಯ ನಾಯಕ ಹಾಗೂ ಮಾಜಿ ರೈಲ್ವೆ ಸಚಿವ ದಿನೇಶ್‌ ತ್ರಿವೇದಿ ವಿರುದ್ಧ ಲೋಕಸಭಾ ಚುನಾವಣೆಯಲ್ಲಿ ಅರ್ಜುನ್‌ ಸಿಂಗ್‌ ಸ್ಪರ್ಧಿಸಿದ್ದಾರೆ.