ಪ್ರಕಾಶ್ ರಾಜ್ ಆಸ್ತಿ: ಮುಂಬೈ, ಚೆನ್ನೈ, ಹೈದರಾಬಾದ್‌ಗಳಲ್ಲಿ ಮನೆ, ದುಬಾರಿ ಕಾರುಗಳು

ಬೆಂಗಳೂರು: ಬೆಂಗಳೂರು ಸೆಂಟ್ರಲ್‌ ಲೋಕಸಭೆ ಕ್ಷೇತ್ರದಿಂದ ಪಕ್ಷೇತರ ಅಭ್ಯರ್ಥಿಯಾಗಿ ಉಮೇದುವಾರಿಕೆ ಸಲ್ಲಿಸಿರುವ ನಟ ಪ್ರಕಾಶ್‌ರಾಜ್‌ ಒಟ್ಟು 31.74 ಕೋಟಿ ರೂ. ಆಸ್ತಿ ಘೋಷಿಸಿಕೊಂಡಿದ್ದಾರೆ.

ಪ್ರಕಾಶ್‌ ರಾಜ್‌ ಅವರು ತೆಲಂಗಾಣ, ಆಂಧ್ರ, ತಮಿಳುನಾಡು ಹಾಗೂ ಮಹಾರಾಷ್ಟ್ರದಲ್ಲಿ ಆಸ್ತಿ ಹೊಂದಿದ್ದಾರೆ. ಪತ್ನಿ, ತಾಯಿ ಹಾಗೂ ಮೂವರು ಮಕ್ಕಳಿದ್ದರೂ, ಬಹುತೇಕ ಆಸ್ತಿಯು ಅವರ ಹೆಸರಿನಲ್ಲೇ ಇದೆ. ಪ್ರಕಾಶ್‌ ರಾಜ್‌ ಸದ್ಯ 71 ಸಾವಿರ ರೂ.ನಗದು ಹೊಂದಿದ್ದಾರೆ. ಒಟ್ಟು 6 ಬ್ಯಾಂಕ್‌ ಖಾತೆಗಳನ್ನು ಹೊಂದಿದ್ದು, ಚೆನ್ನೈ-3, ಹೈದರಾಬಾದ್‌-2 ಹಾಗೂ ಬೆಂಗಳೂರಿನಲ್ಲಿ ಒಂದು ಖಾತೆ ತೆಗೆದಿದ್ದಾರೆ. 'ತಡಕ ಲವ್‌ ಇನ್‌ ಕುಕ್ಕಿಂಗ್‌' ಚಿತ್ರ ನಿರ್ಮಾಣದಲ್ಲಿ 1.68 ಕೋಟಿ ರೂ. ಹೂಡಿಕೆ ಮಾಡಿದ್ದಾರೆ. ಚಿಕ್ಕಮಗಳೂರಿನ ಪೊಲೀಸ್‌ ಠಾಣೆಯಲ್ಲಿ ಪ್ರಕರಣ ದಾಖಲಾಗಿದ್ದು, ಐಪಿಸಿ ಸೆಕ್ಷನ್‌ ಹಾಗೂ ಪೊಲೀಸ್‌ ಕಾಯಿದೆ ಅಡಿ ಸಿಜೆಎಂ ಕೋರ್ಟ್‌ ವಿಚಾರಣೆ ಬಾಕಿ ಇದೆ.

- ದುಬಾರಿ ಕಾರುಗಳ ಒಡೆಯ -

ಪ್ರಕಾಶ್‌ರಾಜ್‌ ಒಟ್ಟು 5.15 ಕೋಟಿ ರೂ. ಚರಾಸ್ತಿ ಹೊಂದಿದ್ದಾರೆ. ಈ ಪೈಕಿ ಆರು ವಾಹನಗಳನ್ನು ಹೊಂದಿರುವ ಅವರು ಮರ್ಸಿಡೆಸ್‌ ಬೆನ್ಜ್‌, ಆಡಿ, ಬಿಎಂಡಬ್ಲ್ಯು ದುಬಾರಿ ಕಾರುಗಳ ಜತೆಗೆ ಇನೋವಾ, ಇಸುಜು ವಿ ಕ್ರಾಸ್‌ ಕಾರು ಹಾಗೂ ವೆಸ್ಪಾ ಸ್ಕೂಟರ್‌ ಹೊಂದಿದ್ದಾರೆ. ಪತ್ನಿ, ತಾಯಿ ಸೇರಿ ಒಟ್ಟು 475 ಗ್ರಾಂ ಚಿನ್ನಾಭರಣ ಹೊಂದಿದ್ದಾರೆ.

ಸ್ಥಿರಾಸ್ತಿಯು 26.59 ಕೋಟಿ ರೂ.(ಮಾರುಕಟ್ಟೆ ಮೌಲ್ಯ) ಹೊಂದಿರುವುದಾಗಿ ನಮೂದಿಸಿದ್ದಾರೆ. ತೆಲಂಗಾಣ ಹಾಗೂ ತಮಿಳುನಾಡಿನಲ್ಲಿ ಒಟ್ಟು 31 ಎಕರೆ ಜಮೀನು ಹೊಂದಿದ್ದು, ತೋಟದ ಮನೆ, ಗೆಸ್ಟ್‌ ಹೌಸ್‌ ಇದೆ. ಹೈದರಾಬಾದ್‌ನಲ್ಲಿ ಎರಡು ಹಾಗೂ ಮುಂಬೈನಲ್ಲಿ ಒಂದು ವಾಸದ ಮನೆಯ ಜತೆಗೆ ಪತ್ನಿ ಮುಂಬಯಿನಲ್ಲಿ ವಾಣಿಜ್ಯ ಕಟ್ಟಡದ ಮಾಲೀಕರಾಗಿದ್ದಾರೆ. 3.83 ಕೋಟಿ ರೂ. ಸಾಲ ತೋರಿಸಿರುವ ಅವರು ಪ್ರತ್ಯೇಕ 4.25 ಕೋಟಿ ರೂ. ಸಾಲದ ಬಾಬ್ತು ವ್ಯಾಜ್ಯವಿದೆ ಎಂದು ಪ್ರಮಾಣಪತ್ರದಲ್ಲಿ ನಮೂದಿಸಿದ್ದಾರೆ.