ಫಿರೋಜಾಬಾದ್‌ನಲ್ಲಿ ತಾತ-ಮೊಮ್ಮಗನ ಸ್ಪರ್ಧೆ

ಹೊಸದಿಲ್ಲಿ:ಮುಲಾಯಂ ಸಿಂಗ್‌ ಯಾದವ್‌ ಕುಟುಂಬದ ಕಲಹ ಚುನಾವಣಾ ಅಖಾಡದಲ್ಲಿಯೂ ಮುಂದುವರಿದಿದೆ. ಯಾದವ ಸಮುದಾಯದವರೇ ಅತ್ಯಂತ ಹೆಚ್ಚಿನ ಸಂಖ್ಯೆಯಲ್ಲಿರುವ ಉತ್ತರ ಪ್ರದೇಶದ ಫಿರೋಜಾಬಾದ್‌ ಕ್ಷೇತ್ರದಲ್ಲಿ ಈ ಬಾರಿ ಅಜ್ಜ-ಮೊಮ್ಮಗನ ನಡುವೆ ಹಣಾಹಣಿ ಏರ್ಪಟ್ಟಿದೆ.

ಸಮಾಜವಾದಿ ಪಾರ್ಟಿಯಲ್ಲಿ ಅಖಿಲೇಶ್‌ ಯಾದವ್‌ ಅವರ ಸರ್ವಾಧಿಧಿಕಾರವನ್ನು ಧಿಕ್ಕರಿಸಿ ಹೊರಬಂದು ಪ್ರಗತಿಶೀಲ ಸಮಾಜವಾದಿ ಪಾರ್ಟಿ(ಲೋಹಿಯಾ) ಪಕ್ಷ ಸ್ಥಾಪಿಸಿದವರು ಶಿವಪಾಲ್‌ ಯಾದವ್‌. ಮುಲಾಯಂ ಸಹೋದರನಾಗಿರುವ ಶಿವಪಾಲ್‌ ವಿರುದ್ಧ ಮುಲಾಯಂ ಅವರ ಮತ್ತೊಬ್ಬ ಸಹೋದರ ರಾಮಗೋಪಾಲ್‌ ಯಾದವ್‌ ಅವರ ಪುತ್ರ ಅಕ್ಷ ಯ್‌ ಯಾದವ್‌ ಸಮಾಜವಾದಿ ಪಕ್ಷ ದ ಅಭ್ಯರ್ಥಿಯಾಗಿದ್ದಾರೆ. ಹೀಗಾಗಿ ಕ್ಷೇತ್ರದಲ್ಲಿ ಯಾದವ್‌ ವರ್ಸಸ್‌ ಯಾದವ್‌ ಫೈಟ್‌ ಶುರುವಾಗಿದೆ.

ಈ ಮೊದಲು ಸಮಾಜವಾದಿ ಪಾರ್ಟಿಗೆ ಸಂಪ್ರದಾಯಿಕವಾಗಿ ಬೆಂಬಲಿಸುತ್ತ ಬಂದಿದ್ದ ಯಾವದವರು ಈ ಬಾರಿ ಗೊಂದಲದಲ್ಲಿದ್ದಾರೆ. ಸಮಾಜವಾದಿ ಪಾರ್ಟಿ ಬೆಂಬಲಿಸಬೇಕಾ ಅಥವಾ ಪ್ರಗತಿಶೀಲ ಸಮಾಜವಾದಿ ಪಾರ್ಟಿ(ಲೋಹಿಯಾ) ಬೆಂಬಲಿಸಬೇಕಾ ಎಂಬ ಜಿಜ್ಞಾಸೆಯಲ್ಲಿದ್ದಾರೆ. ಯಾದವರಂತೆ ಮುಸ್ಲಿಂ ಮತದಾರರನ್ನೂ ಇದೇ ಗೊಂದಲ ಕಾಡುತ್ತಿದೆ. ಹಿಂದುಳಿದ ವರ್ಗದ ಮತಗಳು ಸಮಾಜವಾದಿ ಪಾರ್ಟಿಯತ್ತ ವಾಲುವ ಸಾಧ್ಯತೆ ಇದೆ.

ಶಿವಪಾಲ್‌ ಯಾದವ್‌ ಮತ್ತು ಅಕ್ಷ ಯ ಯಾದವ್‌ ನಡುವೆ ಸಮಾನ ಸ್ಪರ್ಧೆ ಏರ್ಪಟ್ಟಿರುವುದು ಮೇಲ್ನೋಟಕ್ಕೆ ಕಂಡುಬರುತ್ತಿದೆ. ಶಿವಪಾಲ್‌ಗೆ ಸ್ಥಳೀಯ ರಾಜಕಾರಣದ ಇಂಚಿಂಚೂ ಗೊತ್ತಿದೆ. ಮುಲಾಯಂಸಿಂಗ್‌ ಯಾದವ್‌ ಕಾಲದಿಂದಲೂ ಮುಂದಾಳತ್ವ ವಹಿಸಿ ಸಮಾಜವಾದಿ ಪಕ್ಷ ವನ್ನು ಮುನ್ನಡೆಸುತ್ತ ಬಂದಿದ್ದ ಶಿವಪಾಲ್‌ ಯಾದವ್‌ಗೆ ಸ್ಥಳೀಯ ಯಾದವ್‌, ಮುಸ್ಲಿಂ ಮತ್ತು ದಲಿತ ಮುಖಂಡರ ನೇರ ಸಂಪರ್ಕ ಇದೆ. ಈ ಹಿಂದೆ ಇದೇ ಕ್ಷೇತ್ರದಿಂದ ಸಮಾಜವಾದಿ ಪಾರ್ಟಿಯ ಸಂಸದರಾಗಿಯೂ ಕೆಲಸ ಮಾಡಿದ ಅನುಭ ಅವರ ಬೆನ್ನಿಗಿದೆ. ಆದರೆ ಹೊಸ ಪಕ್ಷ ವನ್ನು ಯಾದವರು ಯಾವ ರೀತಿ ಸ್ವೀಕರಿಸುತ್ತಾರೆ ಎಂಬ ಪ್ರಶ್ನೆ ಅವರನ್ನು ಕಾಡುತ್ತಿದೆ. ಹಾಲಿ ಸಂಸದರಾಗಿರುವ ಅಕ್ಷ ಯ ಯಾದವ್‌ ಗೆ ಮುಲಾಯಂ ಮತ್ತು ಅಖಿಲೇಶ್‌ ಯಾದವ್‌ರ ಬೆಂಬಲ, ಸಮಾಜವಾದಿ ಪಾರ್ಟಿ ಎಂಬ ಭದ್ರ ಬುನಾದಿ ಇದೆ.
ತಾತ-ಮೊಮ್ಮಗನ ಈ ಸ್ಪರ್ಧೆಯಲ್ಲಿ ಮತದಾರ ಯಾರ ಪರ ನಿಲ್ಲುತ್ತಾನೆ ಎಂಬ ಕುತೂಹಲ ದಿನದಿಂದ ದಿನಕ್ಕೆ ಹೆಚ್ಚಾಗುತ್ತಲೇ ಇದೆ.

........

ಒಟ್ಟು ಮತದಾರರು: 17.6 ಲಕ್ಷ

ಯಾದವರು: ಶೇ.38

ಮುಸ್ಲಿಮರು: ಶೇ. 30

ಒಬಿಸಿ: ಶೇ.17

ಇತರೆ: ಶೇ.15