ಕೇಸರಿಗಾಗಿ ಮಿಡಿದ ಹಿಂದಿ ಹೃದಯ

ಬೆಂಗಳೂರು: ಹಿಂದಿ ಭಾಷಿಕ ರಾಜ್ಯಗಳಲ್ಲಿ ಬಿಜೆಪಿ ಅತ್ಯಧಿಕ ಸ್ಥಾನ ಗಳಿಸಿಕೊಳ್ಳುವಲ್ಲಿ ಸಫಲವಾಗಿದೆ. ಉತ್ತರದ ಬಹುತೇಕ ಹಿಂದಿ ಭಾಷಿಕ ರಾಜ್ಯಗಳಲ್ಲಿ ಬಿಜೆಪಿ ಜಯಭೇರಿ ಈ ಅಂಶವನ್ನು ಮತ್ತೊಮ್ಮೆ ಸಾಬೀತುಪಡಿಸಿದೆ.

ಮಧ್ಯಪ್ರದೇಶ, ರಾಜಸ್ಥಾನ ಮತ್ತು ಛತ್ತೀಸ್‌ಗಢ- ದೇಶದ ಹೃದಯ ಭಾಗದ ಹಿಂದಿ ರಾಜ್ಯಗಳು. ಇಲ್ಲಿ 2014ರ ಫಲಿತಾಂಶವೇ ಪುನರಾವರ್ತನೆ ಆಗಿರುವುದು ವಿಶೇಷ. ಈ ಮೂರು ರಾಜ್ಯಗಳು ಕಳೆದ ವರ್ಷದ ಅಂತ್ಯದಲ್ಲಿ ವಿಧಾನಸಭೆ ಚುನಾವಣೆ ಎದುರಿಸಿದ್ದವು. ಆಗ ಮೂರೂ ಕಡೆ ಕಾಂಗ್ರೆಸ್‌ ಜಯಭೇರಿ ಬಾರಿಸಿತ್ತು. ಹೀಗಾಗಿ ಲೋಕಸಭೆ ಚುನಾವಣೆಯಲ್ಲಿಯೂ ಇಲ್ಲಿ ಬಿಜೆಪಿ ಸಂಕಷ್ಟ ಎದುರಿಸಲಿದೆ ಎಂದೇ ಭಾವಿಸಲಾಗಿತ್ತು. ಹಿಂದಿ ಹೃದಯ ಭಾಗ ಮತ್ತೊಮ್ಮೆ ಮೋದಿಗಾಗಿ ಮಿಡಿದಿದೆ. ಮಧ್ಯಪ್ರದೇಶದ 29 ಸ್ಥಾನಗಳ ಪೈಕಿ 28ರಲ್ಲಿ ಬಿಜೆಪಿ ಗೆದ್ದಿದೆ.

ಕೇವಲ 1 ಸ್ಥಾನ ಗೆಲ್ಲುವಷ್ಟರಲ್ಲಿ ಕಾಂಗ್ರೆಸ್‌ ಬಸವಳಿದಿದೆ. ರಾಜಸ್ಥಾನದಲ್ಲಿ 25ಕ್ಕೆ 25 ಸ್ಥಾನಗಳು ಬಿಜೆಪಿಗೆ ದಕ್ಕಿವೆ. ಛತ್ತೀಸ್‌ಗಢದಲ್ಲಿ ಕಾಂಗ್ರೆಸ್‌ ವರ್ಚಸ್ಸನ್ನು ಹತ್ತಿಕ್ಕಿದ ಮೋದಿ ಅಲೆ 11 ಸ್ಥಾನಗಳ ಪೈಕಿ 10ರಲ್ಲಿ ಗೆದ್ದಿದೆ. ಏನೆಲ್ಲ ಕಸರತ್ತಿನ ಹೊರತಾಗಿಯೂ ಕಾಂಗ್ರೆಸ್‌ ಕೇವಲ 1 ಸ್ಥಾನ ಗೆದ್ದು ನಿಟ್ಟುಸಿರು ಬಿಟ್ಟಿದೆ. ಹಿಂದಿ ರಾಜ್ಯಗಳ ಒಟ್ಟು 65 ಸ್ಥಾನಗಳ ಪೈಕಿ ಬಿಜೆಪಿ 63 ಸ್ಥಾನ ಬಾಚಿ, ಹಿಂದಿನ ದಾಖಲೆಯನ್ನು ಇನ್ನಷ್ಟು ಉತ್ತಮ ಪಡಿಸಿಕೊಂಡಿದೆ.

ಬದಲಾವಣೆಗೆ ಕಾರಣ: ವಿಧಾನಸಭೆ ಚುನಾವಣೆಯೇ ಬೇರೆ, ಲೋಕಸಭೆ ಚುನಾವಣೆಯೇ ಬೇರೆ ಎನ್ನುವುದನ್ನು ಈ ರಾಜ್ಯಗಳು ನಿರೂಪಿಸಿವೆ. ಮೋದಿ ಅಲೆಯೇ ಗೆಲುವಿಗೆ ಮುಖ್ಯ ಕಾರಣ. ಜತೆಗೆ ವರ್ಷದ ಹಿಂದೆ ಅಸ್ತಿತ್ವಕ್ಕೆ ಬಂದ ಕಾಂಗ್ರೆಸ್‌ ಸರಕಾರಗಳ ಬಗ್ಗೆ ಜನ ಭ್ರಮನಿರಸನಗೊಂಡಿದ್ದಾರೆ.

65 ಮೂರು ರಾಜ್ಯಗಳ ಒಟ್ಟು ಸ್ಥಾನ
63 ಬಿಜೆಪಿ
2 ಕಾಂಗ್ರೆಸ್‌.