2014ರಿಂದೀಚೆಗೆ ನಡೆದ ವಿಧಾನಸಭೆ ಚುನಾವಣೆಗಳಲ್ಲಿ ಬಿಜೆಪಿಯದೇ ಪ್ರಾಬಲ್ಯ

ಹೊಸದಿಲ್ಲಿ: ಕಳೆದ ಐದು ವರ್ಷಗಳಲ್ಲಿ ನಡೆದ ಚುನಾವಣೆಗಳಲ್ಲಿ ಬಿಜೆಪಿಯೇ ಮೇಲುಗೈ ಸ್ಥಾಪಿಸಿದ್ದು, ದಿಲ್ಲಿ ಮತ್ತು ಪುದುಚೇರಿ ಸೇರಿದಂತೆ ಎಲ್ಲ ರಾಜ್ಯಗಳಲ್ಲಿ ಒಟ್ಟು 4,230 ಶಾಸಕ ಸ್ಥಾನಗಳ ಪೈಕಿ 1,281 ಎಂಎಲ್‌ಎ ಸೀಟುಗಳನ್ನು ಬಿಜೆಪಿ ಇತರ ಎಲ್ಲ ಪಕ್ಷಗಳಿಗಿಂತ ಸುಲಭವಾಗಿ ಗೆದ್ದಿದೆ. ಕಾಂಗ್ರೆಸ್ ಕೇವಲ 938 ಸ್ಥಾನಗಳನ್ನು ಗೆದ್ದಿದೆ.

ಎರಡು ರಾಷ್ಟ್ರೀಯ ಪಕ್ಷಗಳನ್ನು ಹೊರತುಪಡಿಸಿ, 12 ರಾಜ್ಯಗಳಲ್ಲಿ ಸ್ಥಾನಗಳನ್ನು ಗೆದ್ದ ಮತ್ತೊಂದು ಪಕ್ಷವೆಂದರೆ ಎಡಪಕ್ಷ. ಕೇರಳ, ಪಶ್ಚಿಮ ಬಂಗಾಳ ಮತ್ತು ತ್ರಿಪುರಾದಲ್ಲಿ ಮಾತ್ರ ಎಡಪಕ್ಷ ಒಟ್ಟಾರೆ 138 ಸ್ಥಾನಗಳನ್ನು ಗೆದ್ದಿದೆ.


ರಾಜ್ಯಮಟ್ಟದ ಪಕ್ಷಗಳನ್ನು ಗಮನಿಸಿದರೆ, ಅವೆಲ್ಲವೂ ಸೇರಿ ಒಟ್ಟಾರೆ 1,873 ವಿಧಾನಸಭೆ ಸ್ಥಾನಗಳನ್ನು ಗೆದ್ದಿವೆ. ಅವುಗಳ ಪೈಕಿ ಕೆಲವು ಬಿಜೆಪಿಯ ಮಿತ್ರಪಕ್ಷಗಳೇ ಆಗಿವೆ. ಆಂಧ್ರಪ್ರದೇಶದ ಟಿಡಿಪಿ, ಉಪೇಂದ್ರ ಕುಶ್ವಾಹರ ಆರ್‌ಎಲ್‌ಎಸ್‌ಪಿ ಜಿತನ್ ರಾಮ್ ಮಂಝಿ ಅವರ ಎಚ್‌ಎಎಂ, ರಾಮ್ ವಿಲಾಸ್ ಪಾಸ್ವಾನ್ ಅವರ ಲೋಕಜನಶಕ್ತಿ ಪಕ್ಷ 2014ರಲ್ಲಿ ಬಿಜೆಪಿಯ ಮಿತ್ರಪಕ್ಷಗಳಾಗಿದ್ದವು. ಆರ್‌ಎಲ್‌ಡಿ ಮತ್ತು ಜೆಡಿ(ಯು), ಕೇರಳದ ಮುಸ್ಲಿಂ ಲೀಗ್‌, ತಮಿಳುನಾಡಿನ ಡಿಎಂಕೆ ಚುನಾವಣೆ ವೇಳೆ ಕಾಂಗ್ರೆಸ್‌ ಮಿತ್ರಪಕ್ಷಗಳಾಗಿದ್ದವು. ಹಾಗಿದ್ದರೂ ನಂತರದ ಬೆಳವಣಿಗೆಗಳಲ್ಲಿ ಟಿಡಿಪಿ, ಆರ್‌ಎಲ್‌ಎಸ್‌ಪಿ, ಎಚ್‌ಎಎಂ ಅಥವಾ ಜೆಡಿಯು ಮಿತ್ರರನ್ನು ಬದಲಾಯಿಸಿಕೊಂಡವು.

ಇವುಗಳ ಹೊರತಾಗಿ ಹೆಚ್ಚು ಸ್ಥಾನ ಗೆದ್ದ ಪಕ್ಷಗಳೆಂದರೆ, ತಮಿಳುನಾಡಿನ ಎಐಎಡಿಎಂಕೆ, ಒಡಿಶಾದ ಬಿಜೆಡಿ, ಮಹಾರಾಷ್ಟ್ರದ ಶಿವಸೇನೆ, ಆಂಧ್ರಪ್ರದೇಶದ ವೈಎಸ್ಸಾರ್ ಕಾಂಗ್ರೆಸ್ ಆಯಾ ರಾಜ್ಯಗಳ ಚುನಾವಣೆ ವೇಳೆಗೆ ಎರಡೂ ರಾಷ್ಟ್ರೀಯ ಪಕ್ಷಗಳಿಂದ ದೂರವೇ ಉಳಿದಿದ್ದವು.


ಭಾರತದ ರಾಜಕಾರಣದಲ್ಲಿ ಬಿಜೆಪಿ ಮತ್ತು ಕಾಂಗ್ರೆಸ್ ಎರಡೇ ಪಕ್ಷಗಳ ನಡುವೆ ನೇರ ಹಣಾಹಣಿ ನಡೆಯುತ್ತದೆ ಎಂಬ ಗ್ರಹಿಕೆಗೆ ವಿರುದ್ಧವಾಗಿ ಪ್ರಾದೇಶಿಕ ಪಕ್ಷಗಳು ಅಲ್ಲಲ್ಲಿ ತಲೆಯೆತ್ತಿವೆ. ಆದರೆ ಚುನಾವಣೆ ಬಳಿಕ ಈ ಪಕ್ಷಗಳು ಯಾವುದಾದರೂ ಒಂದು ರಾಷ್ಟ್ರೀಯ ಪಕ್ಷದ ಜತೆ ಕೈಜೋಡಿಸಿ ಅಧಿಕಾರ ಹಂಚಿಕೊಂಡ ನಿದರ್ಶನಗಳೇ ಹೆಚ್ಚು.

ನರೇಂದ್ರ ಮೋದಿ ಸರಕಾರದ ಆರಂಭಿಕ ವರ್ಷಗಳಲ್ಲಿ ಬಿಜೆಪಿ ಕಾಂಗ್ರೆಸ್‌ಗಿಂತ ಹೆಚ್ಚಿನ ಸ್ಥಾನಗಳನ್ನು ಗಳಿಸಿ ಭಾರೀ ಮುನ್ನಡೆಯಲ್ಲಿತ್ತು. ಹಾಗಿದ್ದರೂ 2018ರಲ್ಲಿ ನಡೆದ ವಿಧಾನಸಭೆ ಚುನಾವಣೆಗಳಲ್ಲಿ ಕಾಂಗ್ರೆಸ್ ಬಿಜೆಪಿಗಿಂತ ಹೆಚ್ಚು ಸ್ಥಾನಗಳನ್ನು ಗೆದ್ದುಕೊಂಡಿತು. 2017ರಲ್ಲಿ ಉತ್ತರ ಪ್ರದೇಶದಲ್ಲಿ ಬಿಜೆಪಿ ಭಾರೀ ಗೆಲುವು ಸಾಧಿಸಿತು.