ಪಿಎಂ ನರೇಂದ್ರ ಮೋದಿ ಚಿತ್ರ ಬಿಡುಗಡೆ ಕುರಿತು ಆದೇಶ ನೀಡದ ಸುಪ್ರೀಂ ಕೋರ್ಟ್‌

ಹೊಸದಿಲ್ಲಿ: ಕೇಂದ್ರೀಯ ಸೆನ್ಸಾರ್‌ ಮಂಡಳಿ ಇನ್ನೂ ಪ್ರಮಾಣಪತ್ರ ನೀಡದೇ ಇರುವುದರಿಂದ ಈ ಹಂತದಲ್ಲಿ 'ಪಿಎಂ ನರೇಂದ್ರ ಮೋದಿ' ಸಿನಿಮಾ ಬಿಡುಗಡೆ ಕುರಿತು ಯಾವುದೇ ಆದೇಶ ನೀಡಲು ಸಾಧ್ಯವಿಲ್ಲ ಎಂದು ಸುಪ್ರೀಂ ಕೋರ್ಟ್‌ ಸ್ಪಷ್ಟಪಡಿಸಿದೆ. ಒಂದೊಮ್ಮೆ ಅರ್ಜಿದಾರರು ಈ ಚಿತ್ರದಲ್ಲಿ ಆಕ್ಷೇಪಾರ್ಹ ಸಂಗತಿಗಳು ಏನಿವೆ ಎಂಬುದರ ಕುರಿತು ದಾಖಲೆ ಒದಗಿಸಿದರೆ ಮಂಗಳವಾರ ವಿಚಾರಣೆ ನಡೆಸಬಹುದು ಎಂದು ಮುಖ್ಯ ನ್ಯಾಯಮೂರ್ತಿ ರಂಜನ್‌ ಗೊಗೊಯ್‌ ನೇತೃತ್ವದ ತ್ರಿಸದಸ್ಯ ಪೀಠ ಅಭಿಪ್ರಾಯಪಟ್ಟಿತು. ''ಸಿನಿಮಾದ ಒಂದು ಪ್ರತಿಯನ್ನು ನನಗೆ ನೀಡಲು ನಿರ್ದೇಶನ ಕೊಡಬೇಕು,'' ಎಂದು ಅರ್ಜಿದಾರ ಹಾಗೂ ಕಾಂಗ್ರೆಸ್‌ ಕಾರ್ಯಕರ್ತ ಅಮನ್‌ ಪನ್ವಾರ್‌ ಮನವಿಯನ್ನು ಪೀಠ ಸ್ಪಷ್ಟವಾಗಿ ತಳ್ಳಿಹಾಕಿತು. ''ಒಬ್ಬ ವ್ಯಕ್ತಿಗೆ ಚಿತ್ರದ ಪ್ರತಿ ನೀಡುವಂತೆ ಏಕೆ ಆದೇಶಿಸಬೇಕು? ಈ ಮನವಿಯ ಉದ್ದೇಶವೇನು ಎನ್ನುವುದೇ ನಮಗೆ ಅರ್ಥವಾಗುತ್ತಿಲ್ಲ,'' ಎಂದು ಪೀಠ ಹೇಳಿತು. ಚಿತ್ರದ ಪ್ರಚಾರಕ್ಕೂ ತಡೆ ನೀಡಬೇಕು ಎಂದೂ ಅರ್ಜಿದಾರರು ವಾದಿಸಿದ್ದರು. ಚಿತ್ರ ಬಿಡುಗಡೆ ವಿವಾದ ಸುಪ್ರೀಂ ಕೋರ್ಟ್‌ ಮೆಟ್ಟಿಲು ಏರಿರುವುದರಿಂದ ಬಿಡುಗಡೆಯನ್ನು ಅನಿರ್ದಿಷ್ಟಾವಧಿಗೆ ಮುಂದೂಡಿರುವುದಾಗಿ ಚಿತ್ರತಂಡ ಘೋಷಿಸಿದೆ. ಈ ಹಿಂದೆ ನಿಗದಿಯಾಗಿದ್ದಂತೆ ಏ.5ರಂದೇ ಚಿತ್ರ ತೆರೆ ಕಾಣಬೇಕಿತ್ತು.