ಬಿಜೆಪಿಗೆ ಮತ ಹಾಕದಿದ್ದರೆ ಶೂಟ್‌, ಕೇಂದ್ರ ಪಡೆಯಿಂದ ಬೆದರಿಕೆ: ಟಿಎಂಸಿ ಆರೋಪ

ಕೋಲ್ಕತ: ಕೇಂದ್ರೀಯ ಪಡೆಗಳು, ಬಿಜೆಪಿಗೆ ಮತ ಹಾಕದಿದ್ದರೆ ಶೂಟ್‌ ಮಾಡುತ್ತೇವೆ ಎಂದು ಮತದಾರರಿಗೆ ಬೆದರಿಕೆ ಹಾಕುತ್ತಿವೆ ಎಂದು ಟಿಎಂಸಿ ಗಂಭೀರ ಆರೋಪ ಮಾಡಿದೆ.

ಬಿಜೆಪಿ ನಾಯಕರ ಅಣತಿಯಂತೆ ಕೇಂದ್ರೀಯ ಪಡೆ ಪಶ್ಚಿಮ ಬಂಗಾಳದಲ್ಲಿ ಮತದಾರರನ್ನು ಅತ್ಯಂತ ಕ್ರೂರವಾಗಿ ನಡೆಸಿಕೊಳ್ಳುತ್ತಿದೆ. ಮತದಾರರನ್ನು ಹೆದರಿಸಿ, ಬೆದರಿಕೆ ಒಡ್ಡುತ್ತಿದೆ ಎಂದು ಟಿಎಂಸಿ ಆರೋಪಿಸಿದೆ.

ಬಂಗಾಳ ಶಾಂತಿಯುತ ಮತದಾನವನ್ನು ಬಯಸುತ್ತದೆ, ಆದರೆ ಬಿಜೆಪಿಗೆ ಅದು ಬೇಕಿಲ್ಲ ಎಂದು ತೃಣಮೂಲ ಕಾಂಗ್ರೆಸ್‌ನ ವಕ್ತಾರ ಡರೆಕ್‍‌ ಓಬ್ರಿಯಾನ್‌ ಹೇಳಿಕೆ ನೀಡಿದ್ದಾರೆ.

ಇವತ್ತು, ಬಂಗಾಳದಲ್ಲಿ ಕೇಂದ್ರೀಯ ಪಡೆಗಳು ಮತದಾರರನ್ನು ಅತ್ಯಂತ ಹೇಯವಾಗಿ ನಡೆಸಿಕೊಳ್ಳುತ್ತಿವೆ. ಸಾಮಾನ್ಯ ಜನರನ್ನು ಹೆದರಿಸುತ್ತಿದ್ದಾರೆ. ಬೆದರಿಕೆಗಳನ್ನು ಒಡ್ಡುತ್ತಿದ್ದಾರೆ. ದೈಹಿಕವಾಗಿ ಊನಗೊಂಡಿರುವವರ ಮೇಲೂ ಟಾರ್ಚರ್‌ ನಡೆಸುತ್ತಿದ್ದಾರೆ ಎಂದು ಆರೋಪಿಸಿದ್ದಾರೆ.

ಮಾಧ್ಯಮದ ಬಳಿ ಬೆದರಿಕೆ ಒಡ್ಡುತ್ತಿರುವ ವೀಡಿಯೋಗಳು ಇವೆ. ಕೆಲವೊಂದು ಸಾಮಾಜಿಕ ತಾಣಗಳಲ್ಲಿ ಬಹಿರಂಗಗೊಂಡಿವೆ ಎಂದು ಡರೆಕ್‌ ಹೇಳಿದ್ದಾರೆ.