'ಮೋದಿ'ಗಳೆಲ್ಲ ಕಳ್ಳರು ಎಂದ ರಾಹುಲ್‌ಗೆ ಮತ್ತೊಂದು ಸಂಕಷ್ಟ, ಕೋರ್ಟ್ ಸಮನ್ಸ್

ಸೂರತ್‌: 'ಎಲ್ಲ ಕಳ್ಳರು ಮೋದಿ ಅಡ್ಡ ಹೆಸರು ಹೊಂದಿರುತ್ತಾರೆ' ಎನ್ನುವ ಕಾಂಗ್ರೆಸ್‌ ಅಧ್ಯಕ್ಷ ರಾಹುಲ್‌ ಗಾಂಧಿ ಆರೋಪಕ್ಕೆ ಸಂಬಂಧಿಸಿದಂತೆ ಸೂರತ್‌ ನ್ಯಾಯಾಲಯ ಗುರುವಾರ ಅವರಿಗೆ ಸಮನ್ಸ್‌ ಜಾರಿ ಮಾಡಿದೆ.

ಚುನಾವಣಾ ರಾಲಿ ವೇಳೆ ರಾಹುಲ್‌ ಗಾಂಧಿ ಅವರು ಪ್ರಧಾನಿ ನರೇಂದ್ರ ಮೋದಿ ಅವರನ್ನು ಟೀಕಿಸುವ ಭರದಲ್ಲಿ ಈ ಆರೋಪ ಮಾಡಿದ್ದರು. ಇದರ ವಿರುದ್ಧ ಬಿಜೆಪಿ ಶಾಸಕ ಪೂರ್ಣೇಶ್‌ ಮೋದಿ ದಾಖಲಿಸಿದ್ದ ಕ್ರಿಮಿನಲ್‌ ಮಾನನಷ್ಟ ಮೊಕದ್ದಮೆ ಪ್ರಕರಣದ ವಿಚಾರಣೆ ನಡೆಸಿದ ಚೀಫ್‌ ಜುಡಿಷಿಯಲ್‌ ಮ್ಯಾಜಿಸ್ಪ್ರೇಟ್‌ ಬಿ.ಕೆ.ಕಪಾಡಿಯಾ, ಜೂನ್‌ 7ರಂದು ಖುದ್ದು ವಿಚಾರಣೆಗೆ ಹಾಜರಾಗಿ ವಿವರ ನೀಡುವಂತೆ ರಾಹುಲ್‌ ಗಾಂಧಿ ಅವರಿಗೆ ಆದೇಶ ನೀಡಿದರು.

ರಾಹುಲ್‌ ಗಾಂಧಿ 'ಮೋದಿಗಳೆಲ್ಲರೂ ಕಳ್ಳರು' ಎಂದು ಜರಿಯುವ ಮೂಲಕ ಇಡೀ ಮೋದಿ ಸಮುದಾಯದ ಘನತೆಗೆ ಧಕ್ಕೆ ತಂದಿದ್ದಾರೆ ಎಂದು ಶಾಸಕ ಪೂರ್ಣೇಶ್‌ ದೂರಿನಲ್ಲಿ ತಿಳಿಸಿದ್ದರು.

ಕಳೆದ ಏಪ್ರಿಲ್‌ 13ರಂದು ಕರ್ನಾಟಕದ ಕೋಲಾರದಲ್ಲಿ ನಡೆದ ರಾರ‍ಯಲಿಯಲ್ಲಿ ರಾಹುಲ್‌ ಈ ಆರೋಪ ಮಾಡಿದ್ದರು. ''ನೀರವ್‌ ಮೋದಿ, ಲಲಿತ್‌ ಮೋದಿ, ನರೇಂದ್ರ ಮೋದಿ.... ಈ ಎಲ್ಲ ಮೋದಿಗಳ ಒಂದೇ ರೀತಿಯ ಅಡ್ಡ ಹೆಸರು ಪಡೆದಿದ್ದಾರೆ. ಎಲ್ಲಾ ಕಳ್ಳರು ಮೋದಿ ಎನ್ನುವ ಸಾಮಾನ್ಯ ಅಡ್ಡ ಹೆಸರನ್ನೇ ಹೊಂದಿರುವುದು ಹೇಗೆ?,'' ಎಂದು ಅಣಕವಾಡಿದ್ದರು.