ತುಮಕೂರಿನಿಂದ ’ಕೊನೇ ಆಟ’ಕ್ಕೆ ದೇವೇಗೌಡ ಅಣಿ

ಬೆಂಗಳೂರು : ತುಮಕೂರು ಕ್ಷೇತ್ರದಿಂದ 'ಕೊನೇ ಆಟ'ಕ್ಕೆ ಜೆಡಿಎಸ್‌ ವರಿಷ್ಠ ಎಚ್‌.ಡಿ.ದೇವೇಗೌಡರು ಅಣಿಯಾಗಿರುವುದು ಸ್ಪಷ್ಟವಾಗಿದ್ದರೂ, ತಮ್ಮ ಅಭ್ಯರ್ಥಿತನದ ಕುರಿತ ಗುಟ್ಟನ್ನು ಅಧಿಕೃತವಾಗಿ ಬಿಟ್ಟುಕೊಡಲು ಒಪ್ಪಿಲ್ಲ.

ಮಿತ್ರಪಕ್ಷ ಕಾಂಗ್ರೆಸ್‌ನೊಂದಿಗೆ ಜಂಟಿ ಪ್ರಚಾರ ಕುರಿತಂತೆ ಸಭೆ ಬಳಿಕ ಪತ್ರಿಕಾಗೋಷ್ಠಿಯಲ್ಲಿ ಮಾತನಾಡಿದ ದೇವೇಗೌಡರು, ತಾವು ಎಲ್ಲಿಂದ ಸ್ಪರ್ಧೆ ಮಾಡುತ್ತೇನೆ ಎಂಬ ಗುಟ್ಟು ಬಿಟ್ಟುಕೊಡಲು ನಿರಾಕರಿಸಿದರು. ಇನ್ನೂ 2/3 ದಿನ ಕಾಯುವಂತೆ ಸಲಹೆ ಮಾಡಿದರು.

ಮಿತ್ರಪಕ್ಷಗಳ ನಡುವಿನ ಸೀಟು ಹಂಚಿಕೆ ತೀರ್ಮಾನದಲ್ಲಿ ಯಾವುದೇ ಬದಲಾವಣೆ ಇಲ್ಲ ಎಂದು ಅವರು ಸ್ಪಷ್ಟಪಡಿಸಿದರು. 'ದೇವೇಗೌಡರು ತುಮಕೂರಿನಿಂದ ಸ್ಪರ್ಧೆ ಮಾಡುವುದಾದರೆ ಅಭ್ಯಂತರವೇ ಇಲ್ಲ' ಎಂಬ ಡಿಸಿಎಂ ಡಾ.ಜಿ.ಪರಮೇಶ್ವರ್‌ ಮಾತನ್ನೂ ಅವರು ಪ್ರಸ್ತಾಪಿಸಿದರು. ಈ ಮೂಲಕ ತಾವು ತುಮಕೂರಿನಿಂದ ಸ್ಪರ್ಧೆ ಮಾಡುವ ಸುಳಿವನ್ನು ಮಾತ್ರ ಬಿಟ್ಟುಕೊಟ್ಟರು.

ತುಮಕೂರು, ಬೆಂಗಳೂರು ಉತ್ತರ ಅಥವಾ ಹಾಸನ ಈ ಮೂರು ಕ್ಷೇತ್ರಗಳಲ್ಲಿ ತಾವು ಎಲ್ಲಿಂದ ಸ್ಪರ್ಧೆ ಮಾಡುತ್ತೀರಿ? ಎಂದು ಪತ್ರಕರ್ತರಿಂದ ಪದೆ ಪದೇ ತೂರಿಬಂದ ಪ್ರಶ್ನೆಗೆ ''ನಾನು ಎಲ್ಲಿಂದ ಸ್ಪರ್ಧೆ ಮಾಡಬೇಕು ಎಂಬುದನ್ನು ನಿರ್ಧರಿಸುವ ಕನಿಷ್ಠ ಸ್ವಾತಂತ್ರ್ಯ ಬೇಡವೇ?'' ಎಂದು ಮರುಪ್ರಶ್ನೆ ಹಾಕಿದರು. ''ಸಿದ್ದರಾಮಯ್ಯ, ಮಲ್ಲಿಕಾರ್ಜುನ ಖರ್ಗೆ, ದಿನೇಶ್‌ ಗುಂಡೂರಾವ್‌, ಸಿಎಂ ಎಲ್ಲರ ಜತೆಗೂ ಚರ್ಚೆ ಮಾಡಿ ಎಲ್ಲಿ ಸ್ಪರ್ಧೆ ಮಾಡಬೇಕು ಎಂದು ಕೇಳಿ ತೀರ್ಮಾನ ಮಾಡುತ್ತೇನೆ'' ಎಂದರು.

''ದಿಲ್ಲಿ ರಾಜಕಾರಣದಲ್ಲಿ ನನ್ನ ಉಪಸ್ಥಿತಿಗೆ ಮಹತ್ವ ಇದೆಯಾ ಎಂಬ ಯೋಚನೆ ಮಾಡುತ್ತಿದ್ದೇನೆ. ಲೋಕಸಭೆಯ ಕೊನೆಯ ಅಧಿವೇಶನದಲ್ಲಿ ಮಾತನಾಡುವಾಗ ಇದೇ ಕೊನೇ ಅವಕಾಶ ಎಂಬಂತೆ ಮಾತನಾಡಿದೆ. 86 ತುಂಬಿ 87ನೇ ವರ್ಷಕ್ಕೆ ಕಾಲಿಡುತ್ತಿರುವ ಹಿನ್ನೆಲೆಯಲ್ಲಿ ತವರು ಹಾಸನದಲ್ಲಿ ಪ್ರಜ್ವಲ್‌ ರೇವಣ್ಣ ಸ್ಪರ್ಧೆಗೆ ಈ ಮೊದಲೇ ಹಸಿರು ನಿಶಾನೆ ತೋರಿದ್ದೇನೆ. 1996ರ ಅವಧಿಯ ಶಕ್ತಿ, ಉತ್ಸಾಹ ಇಲ್ಲವಾದರೂ, ಹಲವು ಮಿತ್ರರ ಸಲಹೆಯಂತೆ ದಿಲ್ಲಿ ರಾಜಕಾರಣದಲ್ಲಿ ನನ್ನಿಂದ ಕಿಂಚಿತ್‌ ಮಾಡಲು ಸಾಧ್ಯವಿದೆಯಾ? ಎಂಬ ಚಿಂತನೆಯಲ್ಲಿ ತೊಡಗಿದ್ದೇನೆ. ರಾಹುಲ್‌ ಗಾಂಧಿ ಬೆನ್ನಿಗೆ ನಿಲ್ಲಬಹುದು ಎಂಬ ಕಾರಣಕ್ಕೆ ಲೋಕಸಭಾ ಚುನಾವಣೆಗೆ ಸ್ಪರ್ಧೆ ಬಯಸಿದ್ದೇನೆ'' ಎಂದರು.