ಪ್ರಧಾನಿ ಮೋದಿ ವೆಬ್‌ ಸೀರಿಸ್‌ ಬ್ಯಾನ್‌ ಮಾಡಿದ ಚುನಾವಣಾ ಆಯೋಗ

ಹೊಸದಿಲ್ಲಿ: ಪ್ರಧಾನಿ ಮೋದಿಯ ವೆಬ್‌ ಸೀರಿಸ್‌ ಸ್ಟ್ರೀಮಿಂಗ್‌ ಅನ್ನು ಚುನಾವಣಾ ಆಯೋಗ ಶನಿವಾರ ಬ್ಯಾನ್‌ ಮಾಡಿದೆ. ಎರೋಸ್‌ ನೌ ಬ್ಯಾನರ್‌ನಡಿ ಆನ್‌ಲೈನ್‌ ಸ್ಟ್ರೀಮಿಂಗ್‌ ಆಗಬೇಕಿದ್ದ ವೆಬ್‌ ಸೀರಿಸ್‌ ಅನ್ನು ಚುನಾವಣೆ ಹಿನ್ನೆಲೆ ಬ್ಯಾನ್‌ ಮಾಡಲಾಗಿದೆ ಎಂದು ತಿಳಿದುಬಂದಿದೆ.

ಏಪ್ರಿಲ್ 10 ರಂದು ಮೋದಿ ಬಯೋಪಿಕ್‌ ಚಿತ್ರವನ್ನು ಬ್ಯಾನ್‌ ಮಾಡಿದ್ದ ಚುನಾವಣಾ ಆಯೋಗ, ಈಗ ''ಮೋದಿ - ಜರ್ನಿ ಆಫ್‌ಎ ಕಾಮನ್‌ ಮ್ಯಾನ್‌'' ವೆಬ್‌ ಸೀರಿಸ್‌ ಅನ್ನು ಸಹ ಅದೇ ನಿಯಮಾವಳಿಗಳಡಿ ಆನ್‌ಲೈನ್‌ ಸ್ಟ್ರೀಮಿಂಗ್ ನಿಲ್ಲಿಸುವಂತೆ ಚುನಾವಣಾ ಆಯೋಗ ಎರೋಸ್‌ ನೌ ಗೆ ಸೂಚನೆ ನೀಡಿದೆ.

ಈಗಾಗಲೇ ವೆಬ್‌ ಸೀರಿಸ್‌ನ 5 ಎಪಿಸೋಡ್‌ಗಳು ಎರೋಸ್‌ ನೌ ಆನ್‌ಲೈನ್‌ ಪ್ಲಾಟ್‌ಫಾರಂನಲ್ಲಿ ಲಭ್ಯವಿದೆ ಎಂಬುದು ನಮ್ಮ ಗಮನಕ್ಕೆ ಬಂದಿದೆ. ಇವುಗಳ ಆನ್‌ಲೈನ್‌ ಸ್ಟ್ರೀಮಿಂಗ್‌ ಅನ್ನು ನಿಲ್ಲಿಸಬೇಕು ಹಾಗೂ ವೆಬ್‌ಸೀರಿಸ್‌ಗೆ ಸಂಬಂಧಪಟ್ಟ ವಿಚಾರಗಳನ್ನು ತೆಗೆದುಹಾಕಬೇಕೆಂದು ಚುನಾವಣಾ ಆಯೋಗ ಎರೋಸ್‌ ನೌ ಗೆ ಆದೇಶ ನೀಡಿದೆ.


ಲೋಕಸಭೆ ಚುನಾವಣೆ ಹಿನ್ನೆಲೆ ಈ ವೆಬ್‌ ಸೀರಿಸ್‌ ಅನ್ನು ಪ್ರದರ್ಶಿಸುವಂತಿಲ್ಲ. ಈ ವೆಬ್‌ ಸೀರಿಸ್‌ ನರೇಂದ್ರ ಮೋದಿಯವರ ಕುರಿತಾಗಿದೆ. ಅವರು, ಸದ್ಯ ಪ್ರಧಾನಿಯಾಗಿದ್ದು ರಾಜಕೀಯ ನಾಯಕರೂ ಸಹ ಆಗಿದ್ದಾರೆ. ಅಲ್ಲದೆ, ಸದ್ಯ ನಡೆಯುತ್ತಿರುವ ಲೋಕಸಭೆ ಚುನಾವಣೆಯಲ್ಲೂ ಅವರು ಸಂಭಾವ್ಯ ಅಭ್ಯರ್ಥಿಯಾಗಿರುವುದರಿಂದ ಈ ವೆಬ್‌ ಸೀರಿಸ್‌ ಆನ್‌ಲೈನ್‌ ಸ್ಟ್ರೀಮಿಂಗ್ ಮಾಡುವಂತಿಲ್ಲ ಎಂದು ಚುನಾವಣಾ ಆಯೋಗ ಮಾಹಿತಿ ನೀಡಿದೆ.