ನನ್ನ ಬಳಿ ಒಂದೇ ವೋಟರ್‌ ಐಡಿ: 'ಗಂಭೀರ' ಆರೋಪಕ್ಕೆ ಗೌತಿ ಪ್ರತಿಕ್ರಿಯೆ

ಹೊಸದಿಲ್ಲಿ: ಬಿಜೆಪಿ ಅಭ್ಯರ್ಥಿಯಾಗಿ ಪೂರ್ವ ದಿಲ್ಲಿ ಕ್ಷೇತ್ರದಿಂದ ಕಣಕ್ಕಿಳಿದಿರುವ ಮಾಜಿ ಕ್ರಿಕೆಟಿಗ ಗೌತಮ್‌ ಗಂಭೀರ್‌ ನನ್ನ ಬಳಿ ಎರಡು ಮತದಾರ ಚೀಟಿಗಳಿಲ್ಲ ಎಂದು ಸ್ಪಷ್ಟನೆ ನೀಡಿದ್ದಾರೆ.

ಈ ಬಗ್ಗೆ ಆಪ್‌ ಮಾಡಿರುವ ಆರೋಪಕ್ಕೆ ಪ್ರತಿಕ್ರಿಯಿಸಿರುವ ಅವರು, ''ಚುನಾವಣಾ ಪ್ರಚಾರದ ಸಂದರ್ಭದಲ್ಲಿ ಮಾತನಾಡಲು ಆಪ್‌ ನಾಯಕರ ಬಳಿ ಯಾವುದೇ ವಿಷಯಗಳಿಲ್ಲ. ಹೀಗಾಗಿ ಅವರು ಆಧಾರರಹಿತ ಆರೋಪಗಳನ್ನು ಮಾಡುತ್ತಿದ್ದಾರೆ. ರಾಜೇಂದರ್‌ ನಗರದಿಂದ ಪಡೆದಿರುವ ಒಂದು ಮತದಾರರ ಗುರುತು ಚೀಟಿ ಮಾತ್ರ ನನ್ನ ಬಳಿಯಿದೆ. ನಾನು ಬಾಲ್ಯದಲ್ಲಿ ಕರೋಲ್‌ಬಾಗ್‌ಲ್ಲಿರುವ ತಾತನ ಮನೆಯಲ್ಲಿದ್ದೆ. ಆದರೆ ಅಲ್ಲೆಂದೂ ಮತ ಚಲಾಯಿಸಿಲ್ಲ. ಮತದಾರರ ಗುರುತಿನ ಚೀಟಿಗಾಗಿ ಅರ್ಜಿಯನ್ನೂ ಸಲ್ಲಿಸಿರಲಿಲ್ಲ'' ಎಂದಿದ್ದಾರೆ.

ಇದೇ ವೇಳೆ ಆಪ್‌ ಆರೋಪಗಳನ್ನು 'ನಕಾರಾತ್ಮಕ ರಾಜಕೀಯ' ಎಂದು ಬಣ್ಣಿಸಿದ್ದಾರೆ.

ಗಂಭೀರ್‌ ಎರಡು ಮತದಾರರ ಗುರುತಿನ ಚೀಟಿಗಳನ್ನು ಹೊಂದಿದ್ದಾರೆ ಎಂದು ಆರೋಪಿಸಿ ಎದುರಾಳಿ, ಆಪ್‌ ನಾಯಕ ಅತಿಶ್‌ ದಿಲ್ಲಿಯ ನ್ಯಾಯಾಲಯದಲ್ಲಿ ಕ್ರಿಮಿನಲ್‌ ದೂರು ದಾಖಲಿಸಿದ್ದು, ಮೇ 1ರಂದು ವಿಚಾರಣೆಗೆ ಬರಲಿದೆ.