ದೇಶದ ಗೆಲುವು; ಮೋದಿ ಆಡಿದ ಮೊದಲ ಮಾತು

ಹೊಸದಿಲ್ಲಿ: ಲೋಕಸಭಾ ಚುನಾವಣೆಯಲ್ಲಿ ಬಿಜೆಪಿ ನೇತೃತ್ವದ ಎನ್‌ಡಿಎ ಭಾರಿ ಗೆಲುವಿನತ್ತ ಮುನ್ನಡೆದಿದೆ. ಇದರೊಂದಿಗೆ ಪ್ರಧಾನಿ ನರೇಂದ್ರ ಮೋದಿ ಎರಡನೇ ಬಾರಿಗೆ ಪ್ರಧಾನ ಮಂತ್ರಿಯಾಗುವುದು ಬಹುತೇಕ ನಿಚ್ಚಳವೆನಿಸಿದೆ.

2014ನೇ ಸಾಲಿಗೆ ಹೋಲಿಸಿದಾಗ ಎನ್‌ಡಿಎ 350ರ ಅಸುಪಾಸಿನಲ್ಲಿ ಸೀಟು ಗೆಲ್ಲುವುದು ಖಚಿತವೆನಿಸಿದೆ. ಈ ಮೂಲಕ ನರೇಂದ್ರ ಮೋದಿ ಸರಕಾರ ಸ್ಪಷ್ಟ ಬಹುಮತ್ತ ಮುನ್ನಡೆದಿದೆ.

ಈ ನಡುವೆ ಐತಿಹಾಸಿಕ ಗೆಲುವಿನ ಬಳಿಕ ಟ್ವಿಟರ್‌ನಲ್ಲಿ ಮೊದಲ ಪ್ರತಿಕ್ರಿಯೆ ನೀಡಿರುವ ಪ್ರಧಾನಿ ಮೋದಿ, ದೇಶ ಮಗದೊಂದು ಬಾರಿ ಗೆಲುವು ದಾಖಲಿಸಿದೆ ಎಂದಿದ್ದಾರೆ.

ತಮ್ಮ ಎಂದಿನ ಶೈಲಿಯಲ್ಲಿ ಟ್ವೀಟ್ ಮಾಡಿರುವ ಮೋದಿ, ನಾವೆಲ್ಲರೂ ಜತೆಯಾಗಿ ಏಳಿಗೆಯನ್ನು ಕಾಣಲಿದ್ದೇವೆ. ಈ ಮೂಲಕ ಸುಭದ್ರ ಭಾರತವನ್ನು ನಿರ್ಮಾಣ ಮಾಡಲಿದ್ದೇವೆ ಎಂಬ ಭರವಸೆಯನ್ನು ನೀಡಿದ್ದಾರೆ.

ಹಿಂದಿ ಹಾಗೂ ಆಂಗ್ಲ ಭಾಷೆಯ ಮಿಶ್ರಣದಲ್ಲಿ ಮೋದಿ ಟ್ವೀಟ್ ಮಾಡಿದ್ದಾರೆ. ಎಲ್ಲರ ಜತೆ, ಎಲ್ಲರ ವಿಕಾಸ, ಎಲ್ಲರ ನಂಬಿಕೆ ಸೇರಿಕೊಂಡು ವಿಜಯಿ ಭಾರತ ಪಥದತ್ತ ಮುನ್ನಡೆಯಲಿದ್ದೇವೆ ಎಂದಿದ್ದಾರೆ.