ನಕಲಿ ಮತದಾನ: ಕಾಸರಗೋಡು, ಕಣ್ಣೂರು ಸೇರಿ ಒಟ್ಟು 7 ಮತಗಟ್ಟೆಗಳಲ್ಲಿ ಮರುಮತದಾನ

ಕಾಸರಗೋಡು: ನಕಲಿ ಮತದಾನ ನಡೆದ ಹಿನ್ನೆಲೆಯಲ್ಲಿ ಕಾಸರಗೋಡು ಹಾಗೂ ಕಣ್ಣೂರು ಲೋಕಸಭಾ ಕ್ಷೇತ್ರಗಳಲ್ಲಿ ಮತ್ತೆ ಮೂರು ಬೂತ್‌ಗಳಲ್ಲಿ ಮರು ಮತದಾನ ನಡೆಸಲು ಚುನಾವಣಾ ಆಯೋಗ ಶುಕ್ರವಾರ ಅಧಿಸೂಚನೆ ಹೊರಡಿಸಿದೆ. ಇದರೊಂದಿಗೆ ಒಟ್ಟು 7 ಬೂತ್‌ಗಳಲ್ಲಿ ಭಾನುವಾರ ಮರು ಮತದಾನ ನಡೆಯಲಿದೆ.

ನಕಲಿ ಮತದಾನ ನಡೆದ ಕಾಸರಗೋಡು ಲೋಕಸಭಾ ಕ್ಷೇತ್ರದ ತೃಕ್ಕರೀಪುರದ 48ನೇ ಮತಗಟ್ಟೆ, ಕಣ್ಣೂರು ಲೋಕಸಭಾ ಕ್ಷೇತ್ರದ ಧರ್ಮಡದ 52 ಮತ್ತು 53ನೇ ಮತಗಟ್ಟೆಗಳಲ್ಲಿ ಮರು ಮತದಾನ ನಡೆಯಲಿದೆ.

ಕಾಸರಗೋಡು, ಕಣ್ಣೂರು ಲೋಕಸಭಾ ಕ್ಷೇತ್ರಗಳಲ್ಲಿ 4 ಮತಗಟ್ಟೆಗಳಲ್ಲಿ ಮರು ಮತದಾನಕ್ಕೆ ಗುರುವಾರ ಚುನಾವಣಾ ಆಯೋಗ ಅಧಿಸೂಚನೆ ಹೊರಡಿಸಿತ್ತು. ಶುಕ್ರವಾರ ಮತ್ತೆ ಮೂರು ಮತಗಟ್ಟೆಗಳಲ್ಲಿ ಮರುಮತದಾನ ಘೋಷಿಸುವುದರೊಂದಿಗೆ ಭಾನುವಾರ ಒಟ್ಟು 7 ಮತಗಟ್ಟೆಗಳಲ್ಲಿ ಮರು ಮತದಾನ ನಡೆಯುತ್ತದೆ.

ನಕಲಿ ಮತದಾನ ನಡೆದ ಕಲ್ಯಾಶ್ಯೇರಿಯ ಪಿಲಾತ್ತರ ಎಯುಪಿ ಶಾಲೆಯ 19ನೇ ಬೂತ್, ಪುದಿಯಂಗಡಿ ಜುಮಾಅತ್ ಹೈಯರ್‌ ಸೆಕೆಂಡರಿ ಶಾಲೆಯ 65, 79, ತಳಿಪರಂಬ ಎಯುಪಿ ಶಾಲೆಯ 166 ನೇ ಮತಗಟ್ಟೆಗಳಲ್ಲಿ ಮರು ಮತದಾನಕ್ಕೆ ಗುರುವಾರ ನಿರ್ಧರಿಸಲಾಗಿತ್ತು.

ಭಾನುವಾರ ಮತದಾನ ನಡೆಯುವುದರಿಂದ ಶುಕ್ರವಾರ ಸಂಜೆ ಆರು ಗಂಟೆಗೆ ಬಹಿರಂಗ ಪ್ರಚಾರ ಅಂತಿಮಗೊಂಡಿದೆ. ಲೋಕಸಭೆ ಚುನಾವಣೆಯ ಕೊನೆಯ ಹಂತವಾದ ಭಾನುವಾರ ದೇಶದ 59 ಕ್ಷೇತ್ರಗಳಲ್ಲಿ ಚುನಾವಣೆ ನಡೆಯಲಿದೆ.