ಮೋದಿ ವಿರುದ್ಧ ವಾರಾಣಸಿಯಿಂದ ನಾಮಪತ್ರ ಸಲ್ಲಿಸಲು ಹೊರಟ ತೆಲಂಗಾಣದ ರೈತರು

ಹೈದರಾಬಾದ್‌: ಈಗಾಗಲೇ ಪ್ರಧಾನಿ ನರೇಂದ್ರ ಮೋದಿ ವಾರಾಣಸಿ ಲೋಕಸಭೆ ಕ್ಷೇತ್ರದಿಂದ 2ನೇ ಬಾರಿಗೆ ಆಯ್ಕೆ ಬಯಸಿ ನಾಮಪತ್ರ ಸಲ್ಲಿಕೆ ಮಾಡಿದ್ದಾರೆ. ಇದೇ ಕ್ಷೇತ್ರದಿಂದ ಮೋದಿ ವಿರುದ್ಧ ತೆಲಂಗಾಣದ ನಿಜಾಮಬಾದ್‌ನ 50 ಮಂದಿ ರೈತರು ನಾಮಪತ್ರ ಸಲ್ಲಿಸುತ್ತಿದ್ದಾರೆ.

ರೈತರು ತಮ್ಮ ಸಮಸ್ಯೆಗಳನ್ನು ಮುನ್ನೆಲೆಗೆ ತರುವ ಉದ್ದೇಶದಿಂದ ಪ್ರಧಾನಿ ನರೋಂದ್ರ ಮೋದಿ ಅವರ ವಿರುದ್ಧ ವಾರಾಣಸಿ ಕ್ಷೇತ್ರದಿಂದ ಸ್ವತಂತ್ರ ಅಭ್ಯರ್ಥಿಗಳಾಗಿ ಸ್ಪರ್ಧಿಸುತ್ತಿದ್ದಾರೆ.

ಅರಿಶಿಣ ಬೆಳೆಗೆ ಲಾಭದಾಯಕ ಬೆಲೆ ಮತ್ತು ಅರಿಶಿಣ ಮಂಡಳಿ ರಚನೆಗೆ ಆಗ್ರಹಿಸಿ ಸ್ಪರ್ಧೆಗೆ ಮುಂದಾಗಿರುವ ರೈತರ ತಂಡದ ಮುಖಂಡ ಗಂಗಾ ರೆಡ್ಡಿ, ತಮ್ಮ ತಂಡಲ್ಲಿ 52 ಮಂದಿಯಿದ್ದು, ಮುಂದಿನ ದಿನಗಳಲ್ಲಿ ಮತ್ತಷ್ಟು ರೈತರು ಜತೆಯಾಗಲಿದ್ದಾರೆ ಎಂದಿದ್ದಾರೆ.

ತಮಿಳುನಾಡಿನ ಅರಿಶಿಣ ಬೆಳೆಗಾರರು ವಾರಾಣಸಿ ತಲುಪಲಿದ್ದಾರೆ. ಬಿಜೆಪಿ ನೇತೃತ್ವದ ಸರಕಾರ ಅರಿಶಿಣ ಮಂಡಳಿ ರಚಿಸವಲ್ಲಿ ವಿಫಲವಾಗಿದೆ ಎಂದು ಗಂಗಾ ರೆಡ್ಡಿ ಆರೋಪಿಸಿದ್ದಾರೆ. ಏಪ್ರಿಲ್‌ 11ರಂದು ನಡೆದ ಮೊದಲ ಹಂತದ ಮತದಾನದಲ್ಲಿ ನಿಜಾಮಬಾದ್‌ ಲೋಕಸಭೆ ಕ್ಷೇತ್ರದಿಂದ ಕೆಲವು ಅರಿಶಿಣ ಬೆಳೆಗಾರರು ಸ್ಪರ್ಧಿಸಿದ್ದರು ಎಂಬ ಮಾಹಿತಿಯನ್ನು ಗಂಗಾ ರೆಡ್ಡಿ ನೀಡಿದ್ದಾರೆ.

ಮೇ 19ರಂದು ವಾರಾಣಸಿಯಲ್ಲಿ ಮತದಾನ ನಡೆಯಲಿದೆ.