ಕಾಂಗ್ರೆಸ್‌-ಎನ್‌ಸಿಪಿ ಅಭ್ಯರ್ಥಿ ಪರ ಮಲ್ಯ ಅಳಿಯ ಪ್ರಚಾರ: ಫೋಟೋ ವೈರಲ್

ಮುಂಬಯಿ: ದೇಶಭ್ರಷ್ಟ ವಿತ್ತಾಪರಾಧಿ ವಿಜಯ್‌ ಮಲ್ಯ ಅವರನ್ನು ಬಿಜೆಪಿ ರಕ್ಷಿಸುತ್ತಿದೆ ಎಂದು ಕಾಂಗ್ರೆಸ್ ಮತ್ತು ಎನ್‌ಸಿಪಿ ದೂಷಿಸುತ್ತಿದ್ದರೆ, ಅದೇ ಮಲ್ಯರ ಅಳಿಯ ಎನ್‌ಸಿಪಿ-ಕಾಂಗ್ರೆಸ್‌ ಅಭ್ಯರ್ಥಿ ಪರ ಪ್ರಚಾರ ನಡೆಸುತ್ತಿರುವ ಫೋಟೋ ವೈರಲ್ ಆಗಿದೆ.

ಮಾಜಿ ಉಪ ಮುಖ್ಯಮಂತ್ರಿ ಅಜಿತ್ ಪವಾರ್‌ ಪುತ್ರ, ಎನ್‌ಸಿಪಿ ಅಭ್ಯರ್ಥಿ ಪಾರ್ಥ ಪವಾರ್ ಶಿವಸೇನೆಯ ಶ್ರೀರಂಗ ಬಾರ್ನೆ ವಿರುದ್ಧ ಸ್ಪರ್ಧಿಸುತ್ತಿದ್ದಾರೆ. ಸಂಸದ್ ರತ್ನ ಪ್ರಶಸ್ತಿ ಪುರಸ್ಕೃತರಾದ ಬಾರ್ನೆ ಅವರಿಗೆ ಬಿಜೆಪಿ-ಶಿವಸೇನೆ ಈ ಬಾರಿ ಮತ್ತೆ ಟಿಕೆಟ್ ನೀಡಿ ಕಣಕ್ಕಿಳಿಸಿವೆ.

ವಿಜಯ್ ಮಲ್ಯರ ಸಾಕುಪುತ್ರಿ ಲೈಲಾ ಅವರನ್ನು ಮದುವೆಯಾಗಿರುವ ಸಮರ್ ಸಿಂಗ್‌, ಅಮೆರಿಕದಲ್ಲಿ ನೆಲೆಸಿರುವ ಉದ್ಯಮಿಯಾಗಿದ್ದಾರೆ. ಪಾರ್ಥ ಪವಾರ್‌ ಅವರ ಸಾಮಾಜಿಕ ಜಾಲತಾಣಗಳನ್ನು ಸಮರ್ ಸಿಂಗ್‌ ಅವರೇ ನೋಡಿಕೊಳ್ಳುತ್ತಾರೆ ಎಂದು ಮೂಲಗಳು ಹೇಳಿವೆ.

ಈ ಬಗ್ಗೆ ಪ್ರಶ್ನಿಸಿದಾಗ, 'ಸಮರ್ ಸಿಂಗ್ ಮತ್ತು ನಾನು ಬಹಳ ವರ್ಷಗಳಿಂದಲೂ ಸ್ನೇಹಿತರಾಗಿದ್ದೇವೆ. ನನ್ನ ಇತರ ಸ್ನೇಹಿತರಂತೆಯೇ ಅವರೂ ನನ್ನ ಪರವಾಗಿ ಚುನಾವಣೆ ಪ್ರಚಾರ ನಡೆಸುತ್ತಾರೆ. ವಿಜಯ್ ಮಲ್ಯರ ತಪ್ಪುಗಳಿಗೆ ಅವರನ್ನೇಕೆ ದೂಷಿಸಬೇಕು? ಅವರು ಕೂಡ ಶೀಘ್ರವೇ ಅಮೆರಿಕಕ್ಕೆ ಮರಳಲಿದ್ದಾರೆ' ಎಂದು ಪಾರ್ಥ ಪವಾರ್ ಸಮರ್ಥಿಸಿಕೊಂಡರು.

ಕಾಂಗ್ರೆಸ್‌ ತನ್ನ ಪ್ರಣಾಳಿಕೆಯಲ್ಲಿ 'ನ್ಯಾಯ್‌' ಯೋಜನೆಗಾಗಿ ಮಲ್ಯರಂತಹ ಉದ್ಯಮಿಗಳಿಂದ ಹಣ ಪಡೆಯುವುದಾಗಿ ಹೇಳುತ್ತಿದ್ದರೆ, ಮಲ್ಯರ ಅಳಿಯ ಎನ್‌ಸಿಪಿ-ಕಾಂಗ್ರೆಸ್ ಅಭ್ಯರ್ಥಿ ಪರ ಪ್ರಚಾರ ನಡೆಸುತ್ತಾರೆ ಎಂದು ಸಾಮಾಜಿಕ ಜಾಲತಾಣಗಳಲ್ಲಿ ಜನತೆ ಲೇವಡಿ ಮಾಡುತ್ತಿದ್ದಾರೆ.