ಬಿಹಾರದ 'ಒಸಾಮ ಬಿನ್‌ ಲಾಡೆನ್‌' ನಾಪತ್ತೆ!

ಪಟನಾ: ಅಲ್‌ ಖೈದಾ ಉಗ್ರ ಸಂಘಟನೆಯ ಮುಖಂಡ ಒಸಾಮ ಬಿನ್‌ ಲಾಡೆನ್‌ನಂತೆ ಕಾಣಿಸುವುದರಿಂದ ಬಿಹಾರದ 'ಒಸಾಮ ಬಿನ್‌ ಲಾಡೆನ್‌' ಎಂದೇ ಅಡ್ಡ ಹೆಸರಿನಿಂದ ಕರೆಸಿಕೊಳ್ಳುತ್ತಿರುವ ಮಿರಾಜ್‌ ಖಾಲಿದ್‌ ನೂರ್‌ ಈ ಬಾರಿಯ ಲೋಕಸಭೆ ಚುನಾವಣೆಯ ಆಸುಪಾಸಲ್ಲೂ ಕಾಣಿಸಿಕೊಂಡಿಲ್ಲ.

ಬಿಹಾರದಲ್ಲಿ ಲೋಕಸಭೆ ಚುನಾವಣೆ ಭರಾಟೆ ಬಲು ಜೋರಿದ್ದರೂ ಬಿಹಾರ 'ಒಸಾಮ ಬಿನ್‌ ಲಾಡೆನ್‌' ಅಡ್ರೆಸ್‌ ಇಲ್ಲವಾಗಿದೆ. ಈ ಬಾರಿ ಖಾಲಿದ್‌ ನೂರ್‌ಗೆ ಡಿಮ್ಯಾಂಡ್‌ ಇಲ್ಲವಾಗಿದೆ. ಯಾವ ಪಕ್ಷಗಳೂ ನೂರ್‌ ಅವರನ್ನು ಪ್ರಚಾರಕ್ಕೆ ಆಹ್ವಾನಿಸುತ್ತಿಲ್ಲ ಎಂದು ಮೂಲಗಳಿಂದ ತಿಳಿದು ಬಂದಿದೆ.

ತನ್ನನ್ನು ಹೆಚ್ಚಿನ ಮಂದಿ ಒಸಾಮ ಬಿನ್‌ ಲಾಡೆನ್‌ ಎಂದು ಗುರುತಿಸುತ್ತಿರುವುದರಿಂದ ಬೇಸರಿಸಿಕೊಂಡಿರುವ ನೂರ್‌, ಕೆಲವರಿಗಷ್ಟೇ ತನ್ನ ನಿಜವಾದ ಹೆಸರು ಗೊತ್ತಿದೆ ಎಂದು ದೂರಿದ್ದಾರೆ. ತನ್ನ ವ್ಯವಹಾರದಲ್ಲಿ ಬ್ಯುಸಿ ಇರುವುದಾಗಿ ತಿಳಿಸಿದ್ದಾರೆ.

ಪ್ರಧಾನಿ ನರೇಂದ್ರ ಮೋದಿ ಅವರು ನಿರಂತರವಾಗಿ ಪಾಕಿಸ್ತಾನ ಮತ್ತು ಭಯೋತ್ಪಾದನೆ ಬಗ್ಗೆ ಭಾಷಣದಲ್ಲಿ ತರುತ್ತಿರುವುದರಿಂದ ನೂರ್‌ ಅವರಿಗೆ ಯಾವ ಪಕ್ಷದಲ್ಲೂ ಬೇಡಿಕೆ ಇಲ್ಲವಾಗಿದೆ. ನೂರ್‌ ಅವಾಮಿ ಇನ್ಸಾಫ್‌(ಎಐಎಂ) ಮೋರ್ಚಾದ ಮುಖ್ಯಸ್ಥರಾಗಿರುವ ನೂರ್‌ 2014ರಲ್ಲಿ ವಾರಾಣಸಿ ಕ್ಷೇತ್ರದಿಂದ ಪ್ರಧಾನಿ ನರೇಂದ್ರ ಮೋದಿ ವಿರುದ್ಧ ಸ್ಪರ್ಧಿಸಲು ಮುಂದಾಗಿದ್ದರು. ಆದರೆ ನೂರ್‌ ನಾಮಪತ್ರ ತಿರಸ್ಕೃತಗೊಂಡಿತ್ತು.

2005ರ ವಿಧಾನಸಭೆ ಚುನಾವಣೆಯಲ್ಲಿ ಆರ್‌ಜೆಡಿ ಮುಖ್ಯಸ್ಥ ಲಾಲು ಪ್ರಸಾದ್‌ ಯಾದವ್‌ ಮತ್ತು ಲೋಕ ಜನಶಕ್ತಿ ಪಕ್ಷದ ನಾಯಕ ರಾಮ್‌ ವಿಲಾಸ್ ಪಾಸ್ವಾನ್‌ ಪರವಾಗಿ ನೂರ್‌ ಪ್ರಚಾರ ನಡೆಸಿದ್ದರು. ನೂರ್‌ ಅವರನ್ನು ರಾಜಕಾರಣಿಗಳು ಮುಸ್ಲಿಮರ ಮತ ಸೆಳೆಯಲು ಬಳಸಿಕೊಂಡು ಮತ್ತು ಅವರನ್ನು ಹೊರ ದಬ್ಬಿದರು ಎಂದು ಹಲವರು ದೂರಿದ್ದಾರೆ.