ಟೈಮ್ಸ್‌ನೌ-ವಿಎಂಆರ್‌ ಸಮೀಕ್ಷೆ: ಎನ್‌ಡಿಎಗೆ ಬಹುಮತ, ಕರ್ನಾಟಕದಲ್ಲಿ ಮೈತ್ರಿಗೆ ಸವಾಲು

ಹೊಸದಿಲ್ಲಿ: ಲೋಕಸಭೆ ಚುನಾವಣೆಯ ಮೊದಲ ಹಂತದ ಮತದಾನಕ್ಕೆ ಎರಡು ದಿನವಷ್ಟೇ ಬಾಕಿ ಉಳಿದಿರುವಂತೆಯೇ, 'ಟೈಮ್ಸ್‌ನೌ-ವಿಎಂಆರ್‌' ಸಮೀಕ್ಷೆಯು ಮತದಾರರ ಮತದಾಳವನ್ನು ಬಹಿರಂಗಪಡಿಸಿದೆ.

ಅಬ್ಬರದ ಪ್ರಚಾರ, ಲಾಭ-ನಷ್ಟದ ಲೆಕ್ಕಾಚಾರದ ನಡುವೆ ಬಿಜೆಪಿ ನೇತೃತ್ವದ ಎನ್‌ಡಿಎ ಸರಳ ಬಹುಮತಕ್ಕೆ ಅಗತ್ಯವಿರುವ 272 ಸ್ಥಾನಗಳ ಮ್ಯಾಜಿಕ್‌ ನಂಬರ್‌ ದಾಟಿ ಮತ್ತೊಮ್ಮೆ ಸರಕಾರ ರಚಿಸಲಿದೆ ಎಂದು ಸಮೀಕ್ಷೆ ಭವಿಷ್ಯ ನುಡಿದಿದೆ.

ಕರ್ನಾಟಕದಲ್ಲಿ ಮೈತ್ರಿಗೆ ಸವಾಲು

ವಿಧಾನಸಭೆ ಚುನಾವಣೆ ಗೆಲುವಿನ ಬಳಿಕ ಕಾಂಗ್ರೆಸ್‌ ಮತ್ತು ಜೆಡಿಎಸ್‌ ಮೈತ್ರಿಕೂಟ ಸರಕಾರ ರಚಿಸುವಲ್ಲಿ ಯಶಸ್ವಿಯಾದರೂ, ಲೋಕಸಭೆ ಚುನಾವಣೆಯಲ್ಲಿ ಉಭಯ ಪಕ್ಷಗಳ ಮೈತ್ರಿ ಕಮಾಲ್‌ ಮಾಡುವ ಸಾಧ್ಯತೆ ಕಡಿಮೆ ಎನ್ನುತ್ತದೆ ಸಮೀಕ್ಷೆ. ಮತ ಹಂಚಿಕೆಯಲ್ಲಿ ಬಿಜೆಪಿ ಶೇ. 2ರಷ್ಟು ಹೆಚ್ಚಳ ಕಾಣಲಿದ್ದು, ಕಾಂಗ್ರೆಸ್‌-ಜೆಡಿಎಸ್‌ ಮತಹಂಚಿಕೆ ಶೇ. 8ರಷ್ಟು ಕಡಿಮೆಯಾಗಲಿದೆ ಎಂದು ಅಂದಾಜಿಸಲಾಗಿದೆ.

ಕೇರಳದಲ್ಲಿ ಕಾಂಗ್ರೆಸ್‌ಗೆ ಲಾಭ

ಕೇರಳದಲ್ಲಿ ವಯನಾಡು ಕ್ಷೇತ್ರದಿಂದ ಪಕ್ಷದ ಅಧ್ಯಕ್ಷ ರಾಹುಲ್‌ ಗಾಂಧಿ ಸ್ಪರ್ಧೆಯು ಕಾಂಗ್ರೆಸ್‌ಗೆ ಕೊಂಚ ಮಟ್ಟಿಗೆ ಲಾಭ ತಂದುಕೊಡಲಿದೆ. ಕಾಂಗ್ರೆಸ್‌ ಬೆಂಬಲಿತ ಯುಡಿಎಫ್‌ ಮೈತ್ರಿಕೂಟವು ಮತಹಂಚಿಕೆ ಮತ್ತು ಸ್ಥಾನಗಳಿಕೆ ಎರಡರಲ್ಲೂ ಏರಿಕೆ ಕಾಣಲಿದೆ. ಈ ನಡುವೆ ಬಿಜೆಪಿಯು 1 ಸ್ಥಾನದಲ್ಲಿ ಜಯಗಳಿಸಲಿದೆ ಎಂದು ಸಮೀಕ್ಷೆ ಹೇಳಿದೆ.

ಮಾ.22ರಿಂದ ಏ.4ರವರೆಗೆ ಒಟ್ಟು 960 ಸ್ಥಳಗಳಲ್ಲಿ 14, 301 ಮತದಾರರ ಒಟ್ಟು ಅಭಿಪ್ರಾಯ ಸಂಗ್ರಹಿಸಿ ಈ ಸಮೀಕ್ಷೆ ನಡೆಸಲಾಗಿದೆ.

ಒಟ್ಟು ಲೆಕ್ಕಾಚಾರ

ಎನ್‌ಡಿಎ 279
ಯುಪಿಎ 149
ಇತರೆ 115