ನಿಖಿಲ್‌ ಮೈತ್ರಿ ಅಭ್ಯರ್ಥಿ ಅದಕ್ಕೆ ಬೆಂಬಲ, ಸುಮಲತಾಗೆ ಕೊಡಲ್ಲ ಅಂತ ಹೇಳಿ ಕಳಿಸಿದ್ದೀನಿ: ಮಾದೇಗೌಡ

ಮಂಡ್ಯ: ಮಂಡ್ಯದಲ್ಲಿ ಲೋಕಸಭಾ ಕ್ಷೇತ್ರದಲ್ಲಿ ಅಭ್ಯರ್ಥಿಗಳಿಂದಾಗಿ ಚುನಾವಣೆ ರಂಗು ಪಡೆದುಕೊಂಡಿದೆ.

ಜೆಡಿಎಸ್‌ನ ದೇವೇಗೌಡ ಕುಟುಂಬದ ಮೂರನೇ ಕುಡಿ ನಿಖಿಲ್ ಕುಮಾರಸ್ವಾಮಿ ಹಾಗೂ ರೆಬೆಲ್‌ ಸ್ಟಾರ್‌ ಅಂಬರೀಷ್‌ ಪತ್ನಿ ಸುಮಲತಾ ಇಲ್ಲಿ ಸ್ಪರ್ಧಿಸುವುದು ಬಹುತೇಕ ಖಚಿತವಾಗಿದೆ.

ಹೀಗಾಗಿ ಇಬ್ಬರೂ ಮಂಡ್ಯ ಜಿಲ್ಲಾದ್ಯಂತ ಪ್ರಚಾರದಲ್ಲಿ ತೊಡಗಿದ್ದಾರೆ.

ಮಂಡ್ಯದ ಹಿರಿಯ ನಾಯಕ ಜಿ. ಮಾದೇಗೌಡ ಅವರನ್ನು ನಿಖಿಲ್‌ ಕುಮಾರಸ್ವಾಮಿ ಭೇಟಿ ಮಾಡಿ ಆಶೀರ್ವಾದ ಪಡೆದಿದ್ದಾರೆ.

ನಂತರ ಸುದ್ದಿಗಾರರೊಂದಿಗೆ ಮಾತನಾಡಿದ ಮಾದೇಗೌಡ, ಜೆಡಿಎಸ್‌ನ ನಿಖಿಲ್‌ ಮನೆಗೆ ಬಂದು ಆಶೀರ್ವಾದ ಪಡೆದಿದ್ದಾನೆ. ಬೆಂಬಲ ಕೊಡುವಂತೆ ಕೇಳಿಕೊಂಡಿದ್ದಾನೆ. ಮೊದಲು ಇಲ್ಲ ಅಂದರೆ. ನಂತರ ಮೈತ್ರಿ ಅಭ್ಯರ್ಥಿ ಎಂದ ಕೊಡುತ್ತೇನೆ ಹೋಗು ಅಂದೆ ಎಂದರು.

ಸುಮಲತಾ ಕೂಡ ಬಂದು ಬೆಂಬಲ ಕೇಳಿದ್ದರು. ಆದರೆ ಆಗಲ್ಲ ಎಂದು ಹೇಳಿಕಳಿಸಿದ್ದೇನೆ ಎಂದು ಮಾದೇಗೌಡ ಸ್ಪಷ್ಟಪಡಿಸಿದರು.

ಮಾದೇಗೌಡ ಅವರ ಕಾಲಿಗೆ ಬಿದ್ದ ನಿಖಿಲ್‌ ಕುಮಾರಸ್ವಾಮಿ ಆಶೀರ್ವದಿಸಿ ಎಂದರು.

ನಿನಗೆ ಗುಡ್‌ಲಕ್‌ ಆಗಬೇಕು ಎಂದರೆ ಎಲ್ಲರನ್ನೂ ವಿಶ್ವಾಸಕ್ಕೆ ತೆಗೆದುಕೊಂಡು ಹೋಗಬೇಕು ಎಂದು ನಿಖಿಲ್‌ಗೆ ಮಾದೇಗೌಡ ಸಲಹೆ ನೀಡಿದರು.

ನಿಖಿಲ್‌ ಕಾಲಿಗೆ ಬಿದ್ದಾಗ ತಮಾಷೆ ಮಾಡುತ್ತಲೇ ಬುದ್ದಿವಾದ ಹೇಳಿದ ಮಾದೇಗೌಡ, ಹಿಂದಿನ ಕಾಲದಲ್ಲಿ ಈಗ ಕಾಲಿಗೆ ಬೀಳ್ತೀರಿ, ಆಮೇಲೆ ಜುಟ್ಟು ಹಿಡಿತೀರಿ ಅಂತಿದ್ರು. ಆ ರೀತಿ ಆಗಬಾರದು ಎಂದು ನಿಖಿಲ್‌ಗೆ ಕಿವಿಮಾತು ಹೇಳಿದರು.