150ಕ್ಕೂ ಹೆಚ್ಚು ಮಾನಸಿಕ ಅಸ್ವಸ್ಥರೂ ಓಟು ಮಾಡಿದ್ದಾರೆ!

ಚೆನ್ನೈ: ಮತದಾನ ಪ್ರತಿಯೊಬ್ಬರ ಹಕ್ಕು. ಪ್ರತಿಯೊಬ್ಬರು ಹಕ್ಕು ಚಲಾಯಿಸಲೇಬೇಕೆಂದು ಹಲವು ಬಗೆಯಲ್ಲಿ ಜಾಗೃತಿ ಮೂಡಿಸಿದರೂ, ಸಾಕಷ್ಟು ಪ್ರಜ್ಞಾವಂತ ಜನ ಮತದಾನದಿಂದ ದೂರ ಉಳಿಯುತ್ತಾರೆ. ಆದರೆ, ಚೆನ್ನೈನ ಮಾನಸಿಕ ಆರೋಗ್ಯ ಕೇಂದ್ರದ 56 ಮಹಿಳೆಯರು ಸೇರಿದಂತೆ 150ಕ್ಕೂ ಅಧಿಕ ಮಾನಸಿಕ ಅಸ್ವಸ್ಥರೂ ಮತದಾನ ಮಾಡುವ ಮೂಲಕ ಸೈ ಎನ್ನಿಸಿಕೊಂಡಿದ್ದಾರೆ.

ಕಿಪೌಕ್‌ನ ಇನ್ಸ್ಟಿಟ್ಯೂಟ್ ಆಫ್ ಮೆಂಟಲ್ ಹಾಸ್ಪಿಟಲ್‌ನಲ್ಲಿ ಸಿದ್ದಪಡಿಸಿದ್ದ ವಿಶೇಷ ಮತಗಟ್ಟೆಯಲ್ಲಿ ಇವರೆಲ್ಲ ಹಕ್ಕು ಚಲಾಯಿಸಿದ್ದು, ಪ್ರಜ್ಞಾವಂತರಿಗಿಂತ ನಾವೇನೂ ಕಡಿಮೆ ಎಲ್ಲ ಎನ್ನುವುದನ್ನು ಸಾಬೀತು ಪಡಿಸಿದ್ದಾರೆ.

ಬಹುಶಃ ದೇಶದಲ್ಲಿಯೇ ಇದೆ ಮೊದಲ ಬಾರಿಗೆ ಮಾನಸಿಕ ಅಸ್ವಸ್ಥರು ಮತದಾನ ಮಾಡಿದ್ದಾರೆ ಎಂದು ಹೇಳಲಾಗುತ್ತಿದೆ.

ಕಳೆದ ಆರು ವರ್ಷಗಳಿಂದ ಸ್ಕಿಜೋಫ್ರೇನಿಯಾ ಮಾನಸಿಕ ಕಾಯಿಲೆಯಿಂದ ಬಳಲುತ್ತಿರುವ 37 ವರ್ಷದ ವ್ಯಕ್ತಿಯೊಬ್ಬರು ಮತ ಚಲಾಯಿಸಿದ ಬಳಿಕ ಪ್ರತಿಕ್ರಿಯೆ ನೀಡಿದ್ದು, 'ಈ ದಿನ ವಿಶೇಷವಾಗಿತ್ತು. ಮತ ಚಲಾಯಿಸಿದ್ದು ಸಾಕಷ್ಟು ಖುಷಿ ತಂದು ಕೊಟ್ಟಿದೆ ಎಂದು ಸಂತಸ ಹಚ್ಚಿಕೊಂಡಿದ್ದಾರೆ.

ಬೆಂಗಳೂರಿಗರು ಮತದಾನದಲ್ಲಿ ಸೆಕೆಂಡ್ ಕ್ಲಾಸ್

ರಾಜ್ಯದ 14 ಲೋಕಸಭಾ ಕ್ಷೇತ್ರಗಳಲ್ಲಿ ಗುರುವಾರ ನಡೆದ ಮೊದಲ ಹಂತದ ಚುನಾವಣೆಯಲ್ಲಿ ಸರಾಸರಿ ಶೇ.69.58ರಷ್ಟು ಮತದಾನವಾಗಿದೆ. ಕಳೆದ ಬಾರಿಗೆ ಹೋಲಿಸಿದರೆ (ಶೇ.68.68) ಇದು ಉತ್ತಮ ಮತದಾನವಾಗಿದೆ. ಆದರೆ ಯಥಾಪ್ರಕಾರ ಬೆಂಗಳೂರು ಮಹಾನಗರದ ಮತದಾರರು ನಿರುತ್ಸಾಹ ತೋರಿದ್ದಾರೆ.

ಕಳೆದ ವಿಧಾನಸಭಾ ಚುನಾವಣೆ ಸಂದರ್ಭದಲ್ಲಿ ಮತದಾನದಿಂದ ದೂರವುಳಿದು ತೀವ್ರ ನಿಂದನೆಗೆ ಗುರಿಯಾಗಿದ್ದ ಬೆಂಗಳೂರಿನ ಜನ ಈ ಬಾರಿಯೂ 'ಹಳೆಯ ಚಾಳಿ' ಮುಂದುವರಿಸಿದ್ದಾರೆ. ರಾಜಧಾನಿಯ ಮೂರು ಲೋಕಸಭಾ ಕ್ಷೇತ್ರ ವ್ಯಾಪ್ತಿಯಲ್ಲಿ ಸರಾಸರಿ ಮತದಾನ ಶೇ.50ರ ಆಸುಪಾಸಿನಲ್ಲೇ ನಿಂತಿದೆ. ಬೆಂಗಳೂರು ಕೇಂದ್ರದಲ್ಲಿ ಶೇ. 50.84, ಬೆಂಗಳೂರು ಉತ್ತರದಲ್ಲಿ ಶೇ.51.26 ಹಾಗೂ ಬೆಂಗಳೂರು ದಕ್ಷಿಣದಲ್ಲಿ ಶೇ.54.20ರಷ್ಟು ಮತದಾನವಾಗಿದೆ.