64 ಲಕ್ಷ ನೋಟಾ ಮತ ಚಲಾವಣೆ

ಹೊಸದಿಲ್ಲಿ: ಈ ಬಾರಿ ಲೋಕಸಭಾ ಚುನಾವಣೆಯಲ್ಲಿ ದೇಶಾದ್ಯಂತ 64 ಲಕ್ಷ 'ನೋಟಾ' ಮತಗಳು ಚಲಾವಣೆಯಾಗಿವೆ.ದೇಶದಲ್ಲಿ ಅತಿಹೆಚ್ಚು ನೋಟಾ ಚಲಾವಣೆಯಾಗಿರುವುದು ಬಿಹಾರದಲ್ಲಿ , ಸುಮಾರು 8 ಲಕ್ಷ ಮಂದಿ ಮತದಾರರು ನೋಟಾಗೆ ಮೊರೆಹೋಗಿದ್ದಾರೆ.

ಇಲ್ಲಿ ನೋಟಾ ಪಡೆದ ಮತಗಳಿಕೆ ಪ್ರಮಾಣ ಶೇ. 2ರಷ್ಟು. ಅಂದರೆ ಎಐಎಂಐಎಂ(0.72%), ಬಿಎಸ್‌ಪಿ(1.67%) ಹಾಗೂ ಸಿಪಿಎಂ (0.07%)ಮತ ಗಳಿಕೆಗಿಂತ ಹೆಚ್ಚು ಎನ್ನುವುದು ಗಮನಾರ್ಹ. ರಾಜಸ್ಥಾನದಲ್ಲಿ 3.27 ಲಕ್ಷ ಮತದಾರರು ನೋಟಾ ಆಯ್ಕೆ ಮಾಡಿಕೊಂಡಿದ್ದಾರೆ.

2014ರಲ್ಲಿಯೂ 3.27 ಲಕ್ಷ ನೋಟಾ ಚಲಾವಣೆಯಾಗಿತ್ತು. ಇಲ್ಲಿ ಕೂಡ ಸಿಪಿಐ, ಸಿಪಿಎಂ ಹಾಗೂ ಬಿಎಸ್‌ಪಿಗಿಂತ ನೋಟಾ ಮತಗಳಿಕೆ ಪ್ರಮಾಣ ಹೆಚ್ಚಿದೆ. ಪಂಜಾಬಿನಲ್ಲಿ 1.54 ಲಕ್ಷ, ಹರಿಯಾಣದಲ್ಲಿ 45 ಸಾವಿರ ನೋಟಾ ಮತ ಚಲಾವಣೆಯಾಗಿದೆ. ಲಕ್ಷದ್ವೀಪದಲ್ಲಿ 100 ನೋಟಾಗಳನ್ನು ಮತದಾರರು ಆಯ್ಕೆ ಮಾಡಿದ್ದಾರೆ.