ಅಧಿಕಾರದಿಂದ ಬಿಜೆಪಿಯನ್ನು ಹೊರಗಿಡಲು ದೀದಿ-ನಾಯ್ಡು ರಣತಂತ್ರ

ಕೋಲ್ಕತ: ಪಶ್ಚಿಮ ಬಂಗಾಳ ಸಿಎಂ ಮಮತಾ ಬ್ಯಾನರ್ಜಿ ಪ್ರಧಾನಿ ನರೇಂದ್ರ ಮೋದಿ ಮತ್ತು ಆಂಧ್ರ ಪ್ರದೇಶದ ಸಿಎಂ ಚಂದ್ರಬಾಬು ನಾಯ್ಡು ಶತಾಯಗತಯಾ ಕೇಂದ್ರದಲ್ಲಿ ನರೇಂದ್ರ ಮೋದಿ ನೇತೃತ್ವದ ಬಿಜೆಪಿ ಸರಕಾರವನ್ನು ಹೊರಗಿಡಬೇಕು ಎಂಬ ಹಠಕ್ಕೆ ಬಿದ್ದಿದ್ದು, ಭಾರಿ ರಣತಂತ್ರವನ್ನೇ ಹೆಣೆಯುತ್ತಿದ್ದಾರೆ.

ಮಮತಾ ಬ್ಯಾನರ್ಜಿ ಮೋದಿ ಅವರ ಖಟ್ಟರ್‌ ವಿರೋಧಿ ಎಂದು ಇತ್ತೀಚಿನ ಹಲವು ಘಟನೆಗಳಿಂದ ಬಹಿರಂಗಗೊಂಡಿದೆ. ಆಂಧ್ರ ಸಿಎಂ ನಾಯ್ಡು , ದೀದಿ ಜತೆಗೆ ಉತ್ತಮ ಒಡನಾಟ ಹೊಂದಿದ್ದಾರೆ. ನಾಯ್ಡುಗೂ ಮೋದಿ ಮತ್ತೆ ಅಧಿಕಾರ ಹಿಡಿಯುವುದು ಬೇಡವಾಗಿದೆ. ಹೀಗಾಗಿ ಇಬ್ಬರೂ ಸೇರಿ ಬಿಜೆಪಿಯೇತರ ಸರಕಾರ ರಚನೆಯ ಸಂಕಲ್ಪ ಮಾಡಿ, ಒಡೆದ ಮನೆಯಾಗಿರುವ ಮಹಾಘಟಬಂಧನವನ್ನು ಒಟ್ಟಾಗಿ ಸೇರಿಸುವ ಹರಸಾಹಸ ನಡೆಸುತ್ತಿದ್ದಾರೆ.

ದೀದಿ ರಣತಂತ್ರದಂತೆ ನಾಯ್ಡು ಹಲವು ನಾಯಕರನ್ನು ಭೇಟಿಯಾಗಿ, ಚರ್ಚೆ ನಡೆಸಿ ಸಂಖ್ಯಾಬಲ ವೃದ್ಧಿಸಿಕೊಂಡು ಕೇಂದ್ರದ ಗದ್ದುಗೆ ಹಿಡಿಯುವ ಯತ್ನ ನಡೆಸಿದ್ದಾರೆ ಎಂದು ಹಲವು ನಾಯಕರು ವಿಶ್ಲೇಷಿಸಿದ್ದಾರೆ. ಇದೆಲ್ಲದರ ಹಿನ್ನೆಲೆಯಲ್ಲಿ ಮೇ 23ರಂದು ಸೋನಿಯಾ ಗಾಂಧಿ ನೇತೃತ್ವದಲ್ಲಿ ಆಯೋಜನೆಯಾಗಿರುವ ವಿಪಕ್ಷ ನಾಯಕರ ಸಭೆ ಭಾರಿ ಮಹತ್ವ ಪಡೆದುಕೊಂಡಿದೆ.